Turii ashkketitsi
1Kiristtoosara yin yeze yestta yinttana miintsane; mahi E siiqitan yinttana mintsitsane. Geeshi Ayyaanara yinttis fettetitsi yene; yin melluntsis dalgganen yiqsinttane.2Yikke, yin fettii qofara, fettii siiqora, fettii wozinaran fettii ayyaanara maaqqii tana folo ufayssote.3Yinttana kadhera woy ceeqinttize fatstsoosse amora fettii bazin oochippete. Yezin yin fetay fetayppa dammane yaga7i qoppikaayzara yinttana kawushshote.4Yin fetay fetaya, melluntsana maaddize baz koyote fattin yinttana maaddize baz xalaala koyppete.5Kiristtoos Yesuusa yeze qoftta yin gidda yessades beezane.6Ees ubba wode Xoozze hyano yene.Yinno maaqqikon, eza Xoozara fetto mahize hyano,wolqqara ekkodes koyikaaya.7Yezin, E faas yeze bonchchito ubba ashshii,aro maaqqida; asi fana yelinttida;asi maaqqii qonccida.8E fana kawushshida;hyayqqoos yellodes,melle atto yezin masqalalla afahyayqodes kiitinttida.9Yinnii gisho, Xoozii eza gaama dhoqi dhoqi yiizida;mahi suntsi ubbappa aadhize damma suntsi inggida.10Yinnii gisho salon sa7a,sa7appa oomora yeze ubbanna,Yesuusa suntsiti bonchchos bunqinttoda.11Asi ubba fa il7antsite,Yesuus Kiristtoosa Laatstsii ga7i,Xoozze Aday bonchchos markkidhoda.Hyanna alamttis foo7o maaqqe
12Ta ishuntso, taanii yinttara yeze wode ubba yin kiitinttide fana, hyatte ta yin kaleppa hyaakkikon, tiinonnippa aatsii, kiitinttodes beezane. Xoozis zhashimoran goqeran yin atotitsito beezize oocha oochchote.13E koyze qoftto oochchode fanan koyode fana yin gidda oochchize Xoozii.14Akko oochan oochitera zuuzinggikaayzara woy lallikaayzara oochchote.15Wobbon nagaranchcho asunts gidda bore baytsi, geeshshuntsanan boriso baayze Xoozze na7a maaqqote. Yin un gidda salo xoolintto fana foo7itera,16de7o benttize qaala ashshikaayzara mintsii aykkii; yinnii fana ta wotsitan ta oochita hyarii attoosse gisho Kiristtoosa ye7ize wode taas ceeqo maaqqada.17Yezin yin ammantten oochite zharsho gujjii ta shemppita lanttizakontana ufayssane. Yinttin taara ufayttoda.18Yinnii fana yinttin ufaytti tanan ufayssodes beezane.Ximotiyoosan Ephphaafiroditusa
19Taanii yin yestti baz si7i ta ufayttode fana Ximotiyoosa yinttago ellisii dakkode fana Laatstsi Yesuusa tana maaddodanno ammaninttane.20Yin yesttis wozinappa qoppize E gaarize asi melle oonin baaya.21Melluntsi fana maaddize baz koyanep attin Yesuus Kiristtoosa koyze baz oochchoos.22E taara fettilla maaqqii na7a fa adays oochchizanni fana Wonggele oocha oochchidayin ammaninttide asi maaqqizanno yin erane.23Yinnii gisho, ta baz wayadyezako bi7i ellisii eza yinttago dakkoda ga7i qoppane.24Taanii, ta ommite ukke wode yinttago hyanggodanno Laatstsalla ammaninttane.25Yin gaaran, taanii, ta isha Ephafiroditusa, taara wolla ta bagga maaqqii oochchidaya, olinttidayan, tana maaddodes yinttis kiitinttidya, yinttago kiittodes qoppida.26E yinttana ubba be7ades gaama amudhdhane. Mahi E hyargginttidanno yin si7ide gisho fa wozintte gaama un77inttane.27E turo hyargginttii hyayqos yii7i attida. Yezin Xoozii eza maarida. E xalaalas baayzin azzano azzanolla afa gujunttaame fana, taasin yiqsinttida.28Yikke, yin eza mahi bi7i ufayttode fana taasin ta wozintte michito toyissade fana ta eza ellisii yinttago dakkodes amudhdhane.29Laatstsa ammanze gisho ufayssara mokkote. Mahi E fana yeze as ubba bonchchote.30Yin ta kale maaqqii oochchodes dandda7oosse maade maaddii Kiristtoosa oocha gisho fa shemppitis yiqsinttanxi hyayqos yii7i attida.