Muguba Ufulu Ulufalu8
1Dofene Sibi Edohe gamali dadalu adagililu domomo olabosi, hebene lagimo kegele sunia waminisiale heefia ligia, halosi aoa haisi uleno amogulu adeso.2Aufia dufia, na bisigia, bosolufalumo, sulu dia ano domobamo Godene olegia ada ami kalugagafia labeo. Aufia, ilifea belo fuulo domobamo meba yaaso.3Ausi, na bisigia, bosolufalumo, sulu dia ano no saabi, na abulu. E inigia, soba meyone defene olaboiya ami miliyo saabeo. Ehe sao kasineda seyone golo disi uleno selubiyo. Ausi, ilihe sao kasineda nafulu saludiale efea meso. Ausi, ehe sao amodai, sulu Godene muuba kalilu idele inolo suniahe Edai solu amodai, disi usu ua gegoaba ofeleso. Auba ofasia, amo golohe defene olaboiya ami soba meyone diba ofeleso. Soba meyone defene olabolu amo Godene asefalu ailalu amone olegia ami dobiyo.4Auba ausi, golo disi ene sone sebia amifia, kawa kasineda nafulu Gode labea felaso. Sulu sigidubulu idele inolohe Godedai solu amoda felabia, Godene olegia goaso.5Ausi, sulu dia ano amohe, soba meyone defene olaboiya amifia de difasia, disi usu fofaso. Aufia, disi fofalu amo helefealu saabia guguba dafogoso. Auba ausimo, yabagelesia, hagana fisasia, gala dafelesia, heleli sigiso.6Aufia, sulu dia ano domoba amohe belo fuulo domobamo sesaifia ligia, fuuyone madenefia alebaibiyo.7Sulu dia ano agelehe, ene belomo fuusi, hele-kano badiluda, deda, ibidai besifasia, helefealu saabia guguba dafogoso. Ausi, helefealu amone haisi osoloa amone, ulenomo de naaso. Aufia, i suniane haisi osoloa amone, ulenomo de naaso. Aufia, gisi hagaea sunia amoda, de naaso.8Aufasia, sulu dia ano aganebohe, ene belomo fuusi, hele gale bule uleno, de waiyada alolu amogulumo, salu hano galulu usu ami dafogosi, hodobaiso. Ausi, salu hano galulu amone, hano haisi osoloa amone, ulenomo ibi adeso.9Ausi, salu hano galulu usu ami bebeada alebaibu amone, haisi osoloa amone, ulenomo daneba yaaso. Aufia, hano sibi ami sibaisafe amone, haisi osoloa amone, ulenomoda woba dafeleso.10Aufasia, sulu dia ano osolohe, ene belomo fuusi, sigabi aiyeeba daalu, gele waiyagulu, anakiwifia hodobaiso. Hodobaisiamo, hano sodolo dobia amida, hano sugulo dobia amida, hodobaiso. Hano sunia dobia amiale. Hano haisi osoloa amone, haisi ulesu dobia ami hodobaiso.11Sigabi amone wimo, Kabilu. Amo hodobailu dobi, helefealu hano amo sunia amone, haisi osoloa amone, ulenomo kabilu adeso. Hano kabilu amo naasi, idele inolo wedinale daneba yaaso.12Aufasia, sulu dia ano binibohe, ene belomo fuusi, haloda, aubeda, sigabida, amone haisi osoloane, ulenomo dowesi, haisi amone yanemo nigiligagaso. Ausi, yaidada, nigilibada, amone haisi osoloa amone, haisi ulenomo nigili gagaba disia, yaneda male dobiyo.13Na ami sidafia labi, dobelesufalumo, uso uleno anakiwi dogolea lagi, hauba dia sisia, koleba wuaasia, eweguba selesi dubulu. “Yeele, Yeele, Yeele! Sulu dia ano noolo osoloa aso fuuluale amohe, ine belomo fuusi, idele inolo sunia helefealu kakainabia amimo, higinilu bule holobagaeyobafe.”
Wycliffe Bible Translators, Inc.