Muguba Ufulu Ulufalu10
1Ausi, na bosolufalumo, sulu dia ano no, kiwigagaluda, hebenefia suga saabi abulu. Ehe kenemo, fagulogulu saligafia, sobaisagalada ene guni saabia amaleba ufia, ene olegimo halo neegulu, aufia ene emo aidamo, de waiyagulu besabeo.2Sulu dia ano amohe, bugo wedino uleno fisigalu ene sone sefia labeo. Ene emo inaloalomo, salu hano galulu saabia emelafia ligia, ene emo fofonaloalomo, helefealu saabia emelaso.3Ausi, e, laeono hulologuba, koleba wuaaso. E auba wuaafia labi, hagana domoba gudusia, efea obegeba sodoguso.4Hagana domoba gudufasia afelesimo, hagana amohe sulu solumo na seleyofia labi, auluso sulu no hebenefia selesi dobelesia, eweguba seleso. “Sulu hagana gudulu domobahe selefe amo, ge asigi muguba homa, ulufaba selemabu.”5Aufia, sulu dia ano salu hano galulu saabiada, helefealu saabiada, emelafia yoba labeo amohe, ene sone ililibemo hebenefealo digiba lagoso.6Sone auba digiba lagofia, ehe koleba aiisia selesia, “Fogo adomo, saabia no male miliyobafe. Alefalu bebeada labe Gode amone wi alefasia, na sulu amo sealeba aiiba selesu. Hebeneda, kegele amofea waalebu suniada, mololu Gode amo E. Aufia, helefealuda, kegele amofea waalebu suniada, mololu amo E. Aufia, salu hano galuluda, kegele usu ami waalebu suniada, mololu amo E.7Sulu dia ano domo amohe ene belomo fuiyobafea hilia ami, Godene mugusilu muguba ufulu amo ene iminiba ufuluiya ami, holobagaeyobafe. Godehe ene saaba ofolo dabalu mololo inolofea samini waleba yaalugulu, moloyobafe.” Sulu dia ano amohe auba aiiba seleso.8Auba ausi, sulu goo, samini hebene lagifia selesi na dubulumone, saabia selesiamo nafea eweguba seleso. “Ga abiamo, sulu dia ano, ene emo nomo salu hano galulu saabia, ene emo nomo helefealu saabia emelafia labea ami goafia, bugo ene sone saabia fisigaba dobu amone, dia mala.”9Auba selesi, na sulu dia ano labea daafia, bugodeno sebumo nafea memesi haalilu. Ausi, e nafea selesia, difasia namenaba seleso. “Ogohe ge libo muba gagaiyobafe. Auluso, ge mofeyomo age hano nenalebalu nologuba naiyobafe.”10Auba selesi, nahe bugodeno amo, sulu dia anone sonehe seba labeafia, difasia mololu. Na mofeyomo, age hano nenalebaloguba naaso. Auluso, na gulubaisimo, amohe ne libo muba gagaso.11Aufasia, sulu no nafea eweguba seleso. “Gahe saabia saaba ofa walelabia abia, idele inolo wedinale misi bolo nonobada, aufia hele nonobada, aufia sulu sodo nonobada, kini nonobada, ilifea kegele dufia holobagaeyobafe amone walelabia malaba” seleso.
Wycliffe Bible Translators, Inc.