Madiyu2
1Helodo kini labi, fogo amohe, Yesumo disiligi Yudia Bedeleheme dauno ami seba dulu. Aufia labi, dufia sigabine mana dawalolu inolo noolo halo holobagalofealofia inigia, Yelusalame goafia, ilihe eweguba doba bebelesia selesia, “Faibe subobo Yudane kini miliyobafemo, e wagi dobu? Ninihe ene sigabimo halo holobagalofealo ami holobagasi baafia, nini efea guluguluyone mulu.”Sigabine mana dawalolu inolo noolohe Yesu babiyo aafe.3Ausi, kini Helodo sulu amo dofasia, e wedinale keleba hiliselu. Aufia, Yelusalame idele inolo noolo ilida aubasu keleba hiliselu.4Ausi, Helodohe soba melone guni inoloda, muguli manane dawalolu inolo nooloda, ili sunia weba gagaiyolu. Ili sunia gagaiyofia labi, ehe ilifea wanesia, “Keliso seba diyobafe, hele amo wagi?”5Ili obegeba selesia, “Amo Bedeleheme dauno Yudia ami. Maumo, Godene Bugo usu, eweguba saaba seleba ufulu dobu.6‘Bedeleheme, Yudia helea ufulu dauno-o! Ga Yudia helea dauno wida labe aleba amone faisale labe. Aubale koleba. Mau enebamo, gafea alefasia yasilo uleno holobagaeyobafe. Ehe Ne Isolaele mosomu amo yasiba luba miliyobafe.’ ”7Helodohe sulu selefe amo dofasia, ehe sigabine mana dawalolu inolo muguba wefasia, ilifea nafuluba wanesia, “Fogo halaiyago koleba, sigabi ewe holobagaso?”8Ili sulu obegefia labi, ehe ili Bedeleheme malasia selesia, “Gili daafia, faibe amo nafuluba isamale. Aufia, gilihe e baafiamo, nafea sulu obegeba saeyo milale. Aufia, nada daafia, efea guluguluyoba.”9Kini sulu auba selefe amo dofasia, ili daalu. Ili aasimo, sigabi ili halo holobagalofealo labi abulumo, amodale ili saminiba daaba labeofia, faibeda dobia molo saabia ami, ama kalugaafia alolu.10Ili sigabi amo bisigiamo, ili nokene koleba henelu.11Molosu suga daafia, ilihe faibedai, Ene enae Maliadai, abulu. Aufia, ili emo hugulumo sagafia, hele saabia sauba fufunalofia, faibe amofea gulugululu. Aufia, ine samolo fisigafia, ilihe beleme amoda, kasineda kegele noolo amoda, i mile ibi amoda, ulu kegelegulu efea melu.12Aufia nigiliba, ili udiasia, ilifea haguguba selesia, gili Helodo labea obegeba malabiyoba selesi dubulu. Auba dofasia, ili ine helea obegeba abia, eno nolobalo maiyo daalu.13Sigabine dawalolu inolo ilimo daafia labi, Saminilone sulu dia ano e Yosebe labea, udia holobagafia selesia, “Ga degema! Faibedai, enaedai, luba difasia, hele Isibi ami fisaba maiyo mala. Nahe saabia no sulu gafea selesimo dubiyone yasisia, Isibi ugi melale. Maumo, Helodohe faibe ogo dufa dafiyofia isafe.”14Ausi, e degefia, faibeda, enaeda, luba difasia, nigiliba hamagi ehe ili Isibi luba dibia maiyo daalu.15Helodo e olamesi yasisia, Yosebeda ili Isibi waagi alolu. Auba aulumo, sulu ule Saminilohe saaba ofolone mofeofeafia eweguba solumone wakaliba sugalu. “Ne Faibemo Isibi labi, Nahe e-mo hele amifia milaba wesi, E mulu.”Yosebeda, Maliada, aalu faibedai hele Isibi ami fisaba aafe.16Ausi, sigabi mana dawalolu inolo ilihe Helodo e gegelububa eloba baafia, ene libomo kanoba dafulu koleba. Aufia, ehe inolo noolo Bedeleheme dauno amida, mosomu noolo aniba amida dedalemalefia, inolo faibe hamu osoloada aso sunialualemo sunia yasoba dafalimalelu. Helodohe faibe hamu osoloada sunialuale iminilu, maumo sigabi hili holobagalumo hamu aida samodolububa selesi dubulu.17Auba molosi, saaba ofolo Yelemaia samini solu auba wakaliba sugalu. E eweguba solu.18“Lama dauno ami, wedinale kuanoba yegiliba labi, gala dobelefe. Amo Leisolo ehe, ene faibe subobo danelune yagunagaba yeefe. Ene faibe ili sunia saabalene, ili noolohe ene libo nafuluba homesiale habofe.”19Helodo olafia labi, Isibi ami Saminilone sulu dia ano ulenohe Yosebe labea udia holobagafia, selesia, “Inolo faibeda dufa olaeyo hamelumo ili olaba yaalu. Aulugulu, ga degefia, faibedai, enaedai, luba difasia, Isolaele obegeba malale.”21Ausi, e degefasia, faibeda, enaeda, luba difasia, Isolaele mosomu helea obegeba daalu.22Abiamo, ehe dobelesia, Akelausumo ene enao Helodone fogo difasia, Yudiane kini labeba solu dubulu. Aulugulu, e amolo maiyomo sagililu. Aufia, udia haguguba saaba mesi, Yosebeda ili Galili disiligifealo daalu.23Ili ami daafia, dauno Nasaledeba soiya ami asulumo, saaba ofolo noolo sulu eweguba solumone wakaliba sugasia aulu. “Ilihe E Nasaledeneba wi saeyobafe.”
Wycliffe Bible Translators, Inc.