Maga15
1Keafa nigilibale, soba melone guni inoloda, muguli manane dawalolu inoloda, asidaluda, galisolo inolo ili suniada, sulu neneba labeofia, ami alebale sulu ule ufulu. Aufasia, ilihe Yesu dofafia, ulubia abia, Filadusufea seba melu.2Ausi, Filadusuhe Yesufea doba bisigia, “Yuda mosomune kinimo, seale Ga-la?” Yesu obegeba selesia, “Sulu amo, gene ga selefe waaga.”3Soba melone guni inolo ilihe Yesufea fadaasia, oloba koweba sulu wedinale solu.4Ili auba selesi, Filadusuhe Yesufea selesia, “Ilihe sulu oloba koweba sulu wedinale Gafea selefe ogo, Ga obegeba saeyalebula?”5Auluso, Yesuhe sulu obegeba selefale baafia, Filadusu e momoleba abulu.6Sigilo hilia adesimo, Filadusuhe hamu sunia mana ewegubasu mololo. Dibolo dafalibagolu inolo ilimo, idele inolohe inolo amone sububa dafelagomaba selefeguba, sububa dafogolo.7Hilia amimo, inolo uleno dibolo asulu amone wi Balabasa, ehe gamane inolodai gisa diaba ligia, inolo dufa olalu.8Aufia, idele inolohe Filadusufea e molologuba molomesifia, doba babiyo mulu.9Ausi, Filadusuhe ilifea doba bisigia, “Nahe Yudane kini inolo ewe sububa dafelagomesiba asigifela?”10Enebamo, Filadusuhe bisigia, soba melo inolo ilihe, Yesu waaselaba bisigiane, E seba mefebuba eloba abulu.11Auluso, soba melone guni inolo ilihe, idele inolone asigi degeba ofa selesia, Filadusufeamo Balabasa subu dafogomaba saamalu.12Idele inolo auba selesi, Filadusu selesia, “Na auba molosenaga, inolo, gili Yudane kiniba selesego, na Efea eneba molomesi selese?”13Auba doba besabi, ili wuaaba selesia, “Ogo imolane uluba homa-aaa!”14Auba selesi, Filadusuhe ilifea doba bisigia, “Enesi? E wolu amene mololubiyo?” Auluso, ili koleba wuaaba selesia, “E imolane uluba homaba” solu.15Filadusuhe idele inolo henemesifia, Balabasamo ilifea sububa dafogosia, ene ibolo selu inolohe Yesu fegomesi gadefalu. Auba molofasia, E imolane uluba homesi, yobolo inolone sone saabia ufulu.16Ilihe Yesu gamane molo amone lalolu no ami ulubia hugafia, ibolo selu sunia wafe dulu.17Ilihe Yesu hegofia ligia, fagulo genelu Efea kaaba ofelesia, efolo aiye gagalu mabufasia, kinine habugagulu, Ene gunia saligaba ufulu.18Aufia, ili Efea baaba gaidesia, selesia, “Yudane kini, Ga! Keafa nafulu! Nini Ga wabialesu.”19Aufasia, ilihe solobo difasia, Yesune guni saabia doweba dafalisia, Efea gau fodolu. Ilihe E sisa emo hugulumo sagaba sigia, Ene wi masega wabialelu.20Auba moloba labeofia, fagulo genelu kaalumo huba ofasia, fagulo Enemone kaaba ofasia, E imolane uluba ufiyone baealo ulubia daalu.21Yesumo ulubia daaba ligia, ilihe dauno Salini inolo uleno eno aiba miliba labi wakalifasia, Yesune imolane efea digimesi egedidilu. Inolo amo Alegesadadai, Lufusudai, aine enaomo, ene wimo, Saimono.22Aufia, ilihe Yesu ulubia abia, hele Gologodaba soiya ami goalu. Gologoda amone sulu kiwi sisamo Guni Kiwi Hele.23Ami goafia, ilihe naga gelemesi waini hanodai, mulumulo hanodai besifia, namenesi meluso, Yesu amo mololuale.24Aufia, ili E imolane uluba ufulu. Imolane uluba ofasia, ibolo selu inolo ilihe, Yesune fagulo dugulumo osolasia, abe difelaba babiyosia sadu dailu.Yesu imolane uluba ufia labi, ibolo selu ilihe sadu daisi, guni inolohe E baaba gaidesi, Ene kuliba silo ili yegiliba labe.25Keafa halosi agofolo adesi, Yesu imolane uluba ufulu.26Uluba ofelesia, Eda godolumone maumo, beba gelelu amofea seleba ofelesia, imolanefea baaba ufulu. Eweguba seleba ufulu, Ewe Yudane Kini.27Aufia, Yesu E imolane uluba ofasiamo, fadilo inolo aidamo E aniba imolane uluba ufulu. Nomo inaloaloba, nomo fofonaloaloba uluba ufulu.29Idele inolo Yesuda imolane uluba ufuluiya amolo, suniaba dedaleba ligiamo, ine guni folalelabia dedaleba ligia, baaba gaidesia, soaneba selesia, “Ha ha! Sebele molo bidifasia, hilia osoloa diyobasuba solu inolo amo, Ga!30Aga Gene meleba gasiba dafogosia, imolane afasia, helea hugama!”31Soba melone guni inoloda, muguli manane dawalolu inoloda, ilida aubasu baaba gaidesia selesia, “Ehe inolo noolo gasiba dafelagoba diloso, ene meleba gasiba dafelagoba diyale adefe-eee!32Inolo Gode Iminifia Molobebelelu lago Ga, Isolaelene kini lago Ga, imolane afasia, nini si bafasia, asigi ule homesine, huga mila-aaa!” Ili auba selesi, fadilo inolo aida, E aniba imolane uluba ufulu amoda, aubasu nagamesi kanoba ofa selaba alolu.33Halo dogo adesi, helefealu nigiligagalu gasiagufia ligiasu, halosi osoloa alolu.34Halosi osolo adesi, Yesu koleba wuaasia, eweguba solu. “Eloi, Eloi, lama sabagadani?” Sulu amo eweguba besife. “Ne Gode, Ne Gode, Mau enene, Na hafinimesi, Ga Na faiso mese?”35Idele inolo imolane aniba alebailumo, sulu amo dofasia selesia, “Doma, E Elaiya wefebu.”36Aufia, inolo uleno naguba daafia, fagulo gelelu uleno difasia, kaiamesi waini hano besegililu gefia, i aafo dofafia, inigia, Yesufea sunimesi mesia, selesia, “Aso baaba mela. Elaiya milifasia, E sububa dafogofelaba babiyone.”37Aufia, Yesu koleba galagilifia, hame suluba dafulu.38Ausi, fagulo sebele moloa ami goloba helelumo, anafia sunia aidaba sosoaba helea asuba dafogolu.39Yobolone yasilo Yesu aniba kalugaafia alolu amohe, E olafemone bafasia, eweguba solu. “Lago seale Godene faibe kolebabu.”40Auba labi, idele noolo wedino hago ligia, sidafia alebailu. Idele ili aleba ami alolumo, ido nomo, hele Magadala ido, Malia. Aufia, enesaiyo nomo, Yemesedenodai, Yosesedai, aine enaemo, Malia. Ido nomo, Salome.41Yesu Galili helea ami aso siba labimo, idele ili eweda E kuliba siba ligia, E sagoba ofolabia silo. Idele wedinale nooloda, Yesu Yelusalame saabi fogomo, Edai mulumoda ami alolu.42Geidesi, Alimadia inolo Yosebe mulu. E Yuda mosomune galisolo asigida dulu, uleno e alolu. Godehe Yasifia Luba Ligia Saminilo Ada miliyobafemo holobagaeyobafefia yasiba asulu. Aidemo, Sabada hilia holobagaeyobafegulu, agayagi amone madeneyoba. Aulugulu geidesi, e sagilibale Filadusu labea daafia, Yesune domalamo diyone doba abulu.44Filadusu e Yesu ama olaluba selefemo hidigiba dobelesiamo, ibolo selu inolofea seale olalulaba bea malalu.45Ibolo selu inolohe Yesu seale olaluba selesi, Filadusu e Yosebefea “Yesune domala waagi dia malaba” solu.46Aufia, Yosebe e fagulo hoolu elegea daafia, Yesune domala sububa difasia, fagulo amo masofia, digidibia abia, abane usu inolo baliyone nageleiya ami ufulu. Ofasia, Yosebehe abane no bebelolabia abia, abane nagelelu enomo kaaba dafulu.47Ausi, Magadala ido Maliada, Yosesene enae Maliada, aaluhe Yesune domala ami baliba ofelefemo abulu.
Wycliffe Bible Translators, Inc.