Yemese3
1Ne nelewodali, ne nanodali, doma. Gili aleba ugi, inolo wedinalehe Godene sulu mana walelo alebaiyo hamelosi. Mau enebamo, Godehe walelo ine mana osolasiamo, idele inolo noolo ine mana osolaloguba, osolaeyobafale. Aubale. Ehe walelo ilifeamo nokene koleba osolaeyobafe.2Nini sunia mana wedinalefealomoda gelebaisalo. Auluso, inolo ene sulu sodofealomoda gelebaisalenaga, amo e isolu inolo koleba. Enebamo, ehe ene domala sunia isoba malesi, luba miliyodolu labe.3Eweguba asigima. Dofene hosomo, kelebulu bule labe. Auluso, e-mo nini hamefeguba malesine, ninihe ene mofemo aeyene gelelu haisimo diba ofolo. Aeyene amo sigisiamo, ninihe ene domala suniamo yasilo.4Aufia, dedeba sulu nomo ewe. Hano sibi amone mana amoda asigima. Sibi amo bule kegele. Fufulo kolelumohe sibimo salu hano saabia malesi mololo. Sibida isoba malesi, hanoda olabolo amo wedino kegele koleba. Auluso, selo inolohe nolobalo maiyo hilisesiamo, e olabolo amo noloba ofelesi, hano sibimo e hamefeguba ano. Hano sibi5Amogubasu, eanemo, e domalafea wedino kegele labeso, e bule koleba bamabamasia, eleliba ado. Nini hilisebu, de waiya wedinomo alefasia, ilo bule sunia dagiyodolu dobu.6Eane e-mo, de amogulu labe. Nine domala haisi haisiba aleba amimo, wedino kegele nomo, e. Auluso, amofea alefasia wolu kegele noolo holobagaba yaalo. Ehe domala sunia medesia, nugumaba ofelesia, mana wolu nokene nokeneba nine miliyolu aleba ami, de kolelu waiyaba ofolo. De amo, helifia ano koleba.7Inolohe ilo hele kelebulu suniada, hano aselo kelebulu suniada, hagada, koanoda, hanida, fofoyodolu dobuso, inolone eane fofoyodoluale koleba. Eane amo luba miliyodoluale wolu kegele koleba, e soiye aiyane inoloda dufa olalo amogulu labe.9Eane hamaga ule amo e-su alefasia, ninihe Saminilo nine Naone wi digiba safasia, inolo Godene mimisililu mololu labe amofea kaoba sodo.10Henelu suluda, kaolu suluda, mofe ule hamagasu aalifaba holobagagaba sodo. Nelewodali, nanodali, doma. Ewe auba miliyodoluale dobu.11Hano sugulo ulenohe, hano galagololuda, hano kabiluda, aalifaba holobagalola? Auba holobagalale.12Nelewodali, nanodali, doma. Olono ihe, olifi sebe helelola? Waini efolohe, olono sebe helelola? Auba helelale. Amogubasu, hano sugulo ubailu wolu amohe, hano galagololu holobagalale.13Gili aleba ugi, inolo asigi nafuluda, dawaloloda, labela? Inolo amogulu elenaga, e adefeamo, ene miliyolu isolu ligia, dawaloloda onafia ligia, mana nafulusu moloba waleyo dobu.14Auluso, babiyo haboloda, kabilu manada, asigume manada, gine libo ufia labenaga, amo ga koleba, “Na dawalolo inolo loluba” bamabamaba samabiyo. Gili auba selesenaga, seale sodomo dabagalaba selefe.15Enebamo, dawalolo amogulumo hebenefasia inigiale, helefealufia ano. Amo inolone asubanefeasu alefasia, enao henanefea dofelefia ano.16Enebamo, babiyo habolo manada, asigume manada, mana amogulu dobia ami, idele inolo belagusia, mana wolu nokene nokeneba moloba ado.17Auluso, dawalolo hebenefia ano amo, samini kolebamo, galagololu ano. Aufia, aeafia hameselo. Aufia, gadisiale onafia ado. Aufia, sulu solu sigiba dobolo. Aufia, kanululo wasigafia sebe nafulusu helelo. Aufia, waseba gigidifia osolalale. Aufia, dawalolo amo, masega sodale.18Aeaba ofa mololo idele inolo ilimo, aealo amone edo fififia, isolu mana amone sebe nafulu sulo.
Wycliffe Bible Translators, Inc.