Hilibaisi Daalu10
1Sisalia sidi ami, inolo uleno asulumo, ene wi Koniliusu. E Lomene aamine yasilo uleno alolu. Inolo daabulubasu daabuluba (100) e sisa ado. Idaline Yobolo Mosomuba sodomone uleno, e alolu.2Inolo Koniliusu amo, Gode hamefegubasu kuliba abia, ene damene ene moloa kakainalomoda, ili sunia Gode sisa ado. Ehe mole kegele wedinale Yudane weagulu inolo sagoba waalemesi mesia, aufia hilia sunia e Godedai sulu selaba ado.3Hilia uleno, halosi osolo geidesi, ehe halaga bologuba ulufaba bisigia, Godene sulu dia ano uleno molo usu suga saabi abulu. Sulu dia ano amo efea selesia, “Koniliusuba” solu.4Auba selesi, Koniliusu e baafia sagilisia selesia, “Saminilo, amo enebuba” solu. Sulu dia ano Koniliusufea selesia, “Godehe ga Edai sulu sodomo dofasia, aufia gahe mole kegele weagulu inolofea melomone hilisesia, Ehe ge mana amo hamebu.5Aga gahe inolo noolo Yoba dauno ami, inolo uleno iwi milesi saeyone mebaimale. Inolo amo ene wimo Saimono, ene wi nomo Fida.6Inolo amo ene enesaiyone moloa saabe. Enesaiyomo e dofene keao bado dabalu mololo. Ene molomo salu hano galubu aniba labe.”7Sulu dia anomohe Koniliusufea sulu saaba mefasia, daafia labi, Koniliusu ene dabalu mololo aleba ami inolo aida wesia, aami inolo ulenodai milalu. Aami inolo amomo, eda mana Gode hamefeguba kuliba abia, hilia sunia Koniliusudai adomo, no e.8Aufia, Koniliusuhe kegele efea mololumo sunia nafuluba inolo osoloa amofea saaba mefia, ehe ilimo Yoba dauno maiyone malalu.9Adigi keafa amone haloa, ili Yoba dauno hagoaleba ami goaba labi, Fida e Godedai sulu saeyone molo fagia ana felalu.10Fogo amo, e mamiasi, e naiyo naiyo hiliselu. Ausi, ili ilogo naiyo aso madeneba adesi, Fidahe halaga bologuba abulu.11Ehe anakiwi sogoba ofelesi baafia, kegele uleno fagulo bulegulu hau binibamo sefia, helea dia huga saabi abulu.12Fagulo amone saabiamo, kelebulu noolo suniada, koanoda, haga nooloda amo saabia yoba alebaibi abulu.13Aufia, Fidahe mofe uleno eweguba selesi dubulu. “Fida, ga degefia, kelebulu ogo yasofia namena.”14Auba selesi, Fida selesia, “Saminilo, na koleba naiyale. Nugumalu kegeleda, aiyalu kegeleda, hilia uleno na mololualene, agada na naiyale.”15Ausi, mofebu saabia aganebo efea selesia, “Kegele Gode alefasia aiyalale gadefalumo, gahe aiyayoba samabu.”16Kegele amo osoloaba holobagafia, fagulo amo alebale anakiwifealo haiba sigiba diba lagolu.17Ausi, Fidahe wedinale keleba hilisefia selesia, “Na halaga abulumone, maumo enebi?” E auba aso hilisefia labi, inolo Koniliusu malaba solumo, ili molo isalabia abia, Saimonone molo baafia, eno saliba ami kalugaafia ligia, doba bisigia, “Saimono, ene wi no Fida amo, iwi saabela me malela?”19Fidahe halaga abulu amo aso hiliseba labi, Asubane Noekenemohe efea selesia, “Saimono, inolo osoloahe ga isafe.20Aulugulu, ga degefia suga mala. Nahe ili hilibailugulu, ga ili galiba maiyone sesaimabiyo.”21Fida suga daafia ilifea selesia, “Inolo gili isafe ogomo, na. Gili enesi mulu?”22Ausi, ilihe selesia, “Koniliusu e-mo, aami inolo daabulubasu daabuluba amone yasilomo, ehe nini malaso. E isolu inologulu, e Gode baaba sagililo. Yuda mosomu ili sunia selesia, e inolo nafuluba sodo. Godene sulu dia ano noekene uleno efea saaba mesia, inolo Fida amo ge moloa lubia milafia, sulu e selefemo, ga domaleba soluso.” Inolo osoloa Fidafea auba solu.23Ili selefemo dofasia, Fidahe ilimo ene moloa suga milafia, ehe ili heneba luba alolu. Aufia, adigi keafa e degefia, ilidai ua daalu. Ausi, sigidubulu elewodali noolo Yoba ami alolumo ilida e galiba dedalelu.24Fidada, inolo ili amoda, abia, hilia uleno eno kia hanefasia, ili abia, Sisalia sidi goalu. Koniliusuhe ili ami obegeba miyobafeba yasifia ligia, ene mosomuda, ene samadalimoda, weba sigilu. Ili milibaifia, ene moloa gagaiyofia kakainalu.25Fida e molo usu sugasi, Koniliusu e wakaliyosia inigia, Fidane emo sisa emo hugulumo sagaba sigia, efea gulugululu.26Auluso, Fidahe e degemesi selesia, “Ga degema! Nada, na inolo balu loluba” solu.27Edai sulu selabia molo usu sugasia, bosolufalumo, idele inolo wedinale gagaiyofia kakainabi abulu.28Aufia, Fidahe ilifea selesia, “Nini Yudamo, yau idele inolodai gagaiyosia wakalimabiyoba elo ufulumo, amo gili asigibu. Auluso, Godehe nafea walelumofea alefasia, nahe inolo ulenofea nugumaluba aiyaba saeyale.29Aulugulu, na gine welu dofasia, gine sulu saidafelesiale mulugulu, aga na asigiyo hamefe. Gili na welumo, eneyone welu?”30Auba selesi, Koniliusu selesia, “Hilia biniba hanefia, halosi osolo eweguba geide adesi, na Godedai sulu selaba ligia, bosolufalumo, inolo uleno fagulo elalelu kaafia, na mia kalugaasia selesia, ‘Koniliusu, Godehe ga Edai sulu sodomo dofasia, mole kegele ga weagulu inolofea melomo amone hiliselu.32Gahe inolo noolo Yoba dauno ami malalesiamo, inolo Saimono, ene wi no Fida, amo milalemale. Inolo amo ene enesaiyone moloa saabe. Enesaiyo amo e dofene keao bado dabalu mololo. Ene molomo salu hano galubu amone aniba labe.’33Inolo amo auba selesi, na ga alebale milalemalelugulu, ga mulumo, nafulu koleba. Aulugulu, nini sunia Godene si saabia gagaiyofia lolu ewemo, Saminilo sulu gafea saaba melu amo ninifea saaba memesi hamefe.”34Koniliusu auba selesi, Fida selesia, “Seale koleba, aga na hilisefe, Godehe idele inolo suniafeamo mana imini ulusesu mololo.35Mosomu sunia E sisa ligia, mana isoluda molofe ili amo, E hamelo.36Nini Isolaele mosomufea Gode sulu nafulu saaba melu. Sulu nafulu amomo, ewe. Yesu Keliso E alefasia nini Godedai aeaba melesi seloaba ufulu. Yesu E suniane Saminilo labe.37Yonehe idele inolo hano gemaleba saaba mefasia, kegele Galili ami maugafia, Yudia hele sunia moloba samodolu amo, gili asigibu.38Godehe Nasalede inolo Yesu iminiba ofelesia, Ene Asubane Noekenemo kiwigagalu buleda Efea mesihe, E siba ligia, idele inolo noolo sagoba ufulu amo, gili hilisebu. Gode Edai ligiane, Ehe inolo sunia henanene kiwigagalu sisa alolumo nafulu molosia, waiba waalelumo, gili asigibu.39Kegele sunia Yesuhe Isolaele helea amida, Yelusalame sidi amida, mololu amo, nine si abulu. Aulugulu, nini abulumone sulu saaba dafelagoba lolu. Ilihe E imolane baaba dofasi, E olaso.40Auluso, hilia osoloa alefasia, Godehe e haiba degeba ifofasia, idele inolo noolo E bamesi gadefaso.41Idele inolo ili sunia E abuluale. Auluso, Godehe samini ene sulu saamesi molobebelelu nini amosu, E si abulu. E haiba degeba ifofasia labi, ninimo naiyoda hanoda Edai ua mololu.42Ehe ninifea idele inolofea saamesi, eweguba sawaba saaba dafelagomalu. ‘Idele inolo aso bebea kakainabu ili amoda, daneba yaalu ili amoda, Osolaeyone Iminilu Inolo amo, E-su labe. Godehe E amo moloyone iminifia gadefalu.’ Ehe ninifea auba saamalelu.43Saaba ofolo ili suniahe koleba saaba ofa selesia, idele inolo sunia Inolo ewefea asigi ule ofelesi, Godehe ine wolu hamasia heeba dafelesia galiyobafeba solu.”44Fida e aso sulu amo selaba labi, bosolufalumo, Asubane Noekenemo sulu amoda dobelefe ili amo suniafea suga mulu.45Yuda mosomune sigidubulu inolo noolo Fidadai milibailumohe, idele inolo ili amohe Asubanene sulu nonoba selesia, Godene wi digife amo dobelesia, ili hidigifia selesia, “Bama. Godehe Ene Asubane Noekenemo yau idele inolo ilifeada, ulu kegele meloguba, guguba dafogolububa” solu.47Aufia, Fida selesia, “Mosomu ewe Asubane Noekenemo nini duluguba difegulu, abehe ili hano geyaleba eloba kaeyo?”48Aufia, Fidahe idele inolo amofea selesia, “Gili Yesu Kelisone wifea alefasia, hano gemaleba” solu. Hano geba yaafasia, ilihe e-mo hilia noolo ilidai melaleyobileba doba bebelelu.
Wycliffe Bible Translators, Inc.