Agele Dimodi2
1Maugaba sulu na gafea kiwigaaba selesumo, ewe. Idele inolo sunia hiliseba, Godedai sulu saamale. Auba Godedai sulu selesiamo, ine higinilu sagoba homesineda, ilifea ediliba homesineda, saamale. Aufia, ili hiliseba, Godefea henelu sulu amoda saamale.2Kinida, gamanene kiwigagalu sunia sebu amoda, hiliseba ligia, aubasu Godedai sulu saamale. Nini ili amone sisa ligia, Godene hame kuliba abia, helegeba ligia, gadaeaba onaba miliyone, auba Godedai saamale.3Godedai sulu auba selefe ewe nafulu ligia, nine Gasiba Dafelagoba Dilo Godemo heneba ofelefe.4Ehe inolo sunia seale sodone dawalolo dimesi hilisesia, ili sunia gasiba dafelagoba diyoba hilisefe.5Nini asigibu, Gode ule koleba labe. Aufia, Godedai, idele inolodai, lala isolomo, ule E labe. Inolo Keliso Yesu amo, E.6Hilia Godehe iminiba ufulumo holobagasi, Ehe Ene miliyolumo weasesia, idele inolo sunia obegeba diba elegeyone, E Ene meleba su suluba melu.7Auba saamesine, Godehe na iminilumo, hilibaisi daalu dabalu moloba ligia, Ene sulu weba ado melesi gadefalu. Na seale koleba selesu. Na gegeba selesuale. Yau idele inolo asigi ule seale homesine, Ehe na ine walelo melesi gadefalu.8Aulugulu, na hamefemo, inolo suniahe ine sone galagololu digifia, ine miliyolu Godefea mesia, gadilo malefia, hegeba sulu saabale ligia, Godedai sulu saeyo dobu. Sone galagololu digifia, Godedai sulu saamale.9Aufia, idelefeamo, na eweguba hamefe. Ilihe fagulo kakasiamo, ilifea isoba fofonaloabale muulu bamesi kaamale. Ilihe momadasiamo, ine guni alu dofasiada, helebe naiyada, goloda, fagulo mesegeluda, domalafea yogoleba momadasiale, auluso mana nafulu mololo amone koleba momada dimale. Auba momadafe amo, Godefea gulugululoba selefe idelemo muulu babiyobafe.11Idele ili koleba, hamedofa helea ligia, sulu saufia, Godene sulu diyo dobu.12Nahe idele ili Godene sulu inolofea walemaleyalesia, fogo mesuale. Aufia, ilihe inolo waagi yasimesialene fogoda mesuale. Aubale. Idele ilimo, sulu saufia misiyo dobu.13Enebamo, Godehe Adamadale maugaba mololu. Aufia, dufia Ehe Iba mololu.14Gegesi sulu sigidubulumo, Adama e-ale. Aubale. Gegefemo sigiba dofasia, wolu mololumo, ido e.15Auluso, idelehe faibe seba diaba ligia, Kelisofea asigi ule ofasia, ine miliyolu hamedufulu ligia, galagololu alefasia, hamesefia adabia daabasu adesenaga, Godehe ili gasiba dafelagoba diyobafe.
Wycliffe Bible Translators, Inc.