Agele Kolidi13
1Na helefealu idele inolone sulu nokene nokeneba isoba waagi selesenagada, aufia Godene sulu dia anone sulu amoda isoba waagi selesenagada, auluso, nafea hameselo mana malenaga, na belo balu fuusi, ilibo masega galaloguba galafe.2Saaba ofolone dawalolomo nafea ligia, nahe kegele mugusilu dobumo sunia fadaba asigilu lolunagada, nahe kegele sunia dawaloba dulu lolunagada, auluso nafea hameselo mana malenaga, amo na balu eleda male lolu. Seale, nahe asigi ule ufulu kolelu adesia, hele galefea gigilimasi, gale amo gigilisenagada, auluso nafea hameselo mana malenaga, amoda na balu eleda male koleba lolu.3Nahe ne kegele sunia weagulu idele inolofea sagaba samodosenagada, aufia nahe no anogo sagoba ofaiyesia, ne domalamo de waiya usu waagi dafogomasi weasesenagada, auluso nafea hameselo mana malenaga, na mololu amohe, na sagoba ofelesiale, balu weasefe.4Hameselo e-mo hamedofa esebalo ado. Hameselo ehe mana nafulu heafuba mololo. Hameselo ehe no anogofea haboba hiliselale. Ehe bamabamaba adale. Ehe elelilale.5Ehe no anogo woba ofolale. Ehe ene meleba hiliselale. Ehe alebale hegelale. Noolohe efea heleba molofemo, ehe sabeyo hiliselale.6Ehe mana isoluale molofe amo bisigiamo, henelale. Aubale, ehe seale sodofea henelo.7Ehe sunia hagugubasu ado. Ehe sigiba dobolabasu ado. Ehe hame diba ofelagofia yasifiasu ado. Ehe afelesiale kalugaafia, daabasu ado.8Hameselo mana, e koleba asigileyobafale. Auluso, saaba ofa sodomo asigileyobafe. Asubanene sulu nonoba sodo mana amoda asigileyobafe. Inolone asigiloda dulu sunia amoda asigileyobafe.9Enebamo, asigilo nini aga dulumo, haisi haisibasu dulu. Aufia, aga nini saaba ofa selesiamo, nini haisi haisibasu selaba lolu.10Auluso, dufiamo, kegele suniada moloba samodoyo hilia amo adesi, haisi haisiba mololo mana amo afiyobafe.11Ewemo, faibe bulelo mana amogulu adefe. Na faibe wedino aso ligiamo, na-mo faibe deseine molologuba mololo. Aufia, ne asigida, ne sulu sododa, ne asigiloda, na boloda, faibe deseine molologuba moloba alolu. Aga na bulefasia, inolo adesiamo, faibe deseinene manamo sunia afolu.12Aga ninihe Godene kegelemo haisi haisibasu asigibu. Nini hewofea fufuneba bolo amoguba bisigia, sunia fadaba aso bosoluale. Auluso, dufia, ninihe seale si galiba, mi gagiba bisigiamo, ninihe E nafuluba fadaba babiyo. Aga na aso E haisi haisiba asigiba lolu. Godehe na aga asigiba samodofeguba, dufiada nahe E asigiba samodoyo.13Aulugulu, mana osoloa ewemo ufiasu miliyobafe. Asigi ule ufiyo manada, Hame diba ofelagofia yasiba miliyo manada, Aufia, hameselo manada, Mana osoloa amo ufiasu miliyobafe. Auluso, mana osoloa amone olaibomo, hameselo mana koleba.
Wycliffe Bible Translators, Inc.