LUKA7
1Asili Yesu nɔnda binɛ lalikuli asamba banto baolangaki, achwe ɔɔsɛngɛ ba Kapɛlɛnaumu.2Woongo ɔsɛngɛ, kaiki waiyolo ɔmɔɔ baakɔlɔbɔi, aiki la bokambi ande alangaki ndako ike. Ɔnɛ bokambi aiki nkɔna mɛ la mbwa.3Ɔnɛ waiyolo aakɔlɔbɔi aoki ndako besako be Yesu, aotomeli bekongo bɛmɔɔ Beayuda, bachu mbooseya aande mbikya bokambi ande.4Bengo bekongo aiye bako ele Yesu, ba ɔsɛi ike la nɔnda: Ɔnɛ waiyolo aakɔlɔbɔi asana mamolama,5aliko ndako olangaka wooni baso, lonkinɛ ndako katophikeli Basaŋanelo* baso.6Yesu achwe bolili laako. Ango aiki bako sukɛlɛ la mbiya e lulu la ongo waiyolo aakɔlɔbɔi, ongo waiyolo aakɔlɔbɔi, atomi biseka bende basimele Yesu nte: Simela nyo ndako nte ataijake wiina manda kami, aliko lemi phalasane ndako aingele e lulu lami.7Aliko laingo, mbwiyɛna nte lemi phalasane manda kande. Kinaki alɔndɛ too bosao bɔmɔɔ, la bokambi ami akondo ika.8Aliko lemi ŋango akɔ nende entina la baiyolo bami, la lemi njalaka la bakɔlɔbɔi entina lami; n'nɔndake la ɔmɔɔ: «Chwaka»! La ndako ochaaka, la iya n'nɔndake la ɔnkinɛ! «Aka»! La ndako akonoanda. La iya n'similake bokambi ami nte: «Kɛɛ ɛnɛ! La ndako ɔkɛɛka».9Ango aoki Yesu bingo, asebalali ike aliko la ongo waiyolo aakɔlɔbɔi. Ango atulwe la nɔnda la boloi baanto baolingitaki, aasimeli: Mbokosimela nyo nte koonga asamba wooni lalikuli ba Isilaɛli, ntaɛni bonto boso limanya linɛnɛ ja ŋaanɛ.10Bango banto batomami la ongo waiyolo baakɔlɔbɔi autoli bako e lulu, batani ongo bokambi ombosila mbika.11Pa Yesu aingeli ɔɔsɛngɛ baelelamaki Naini. Baeki* bande la banto bankinɛ ike bachwe la ndako.12Asukameli ndako lɔkukɛ la likula ja ɔsɛngɛ, asaŋani la banto baiki batachu nkuja bojo ba boponjo ɔmɔɔ. Ɔnɛ bomponjo aiki bɔna etike e obwele ɔmɔɔ. Banto ike ba ongo ɔsɛngɛ baiki batatindeya ongo obwele.13Awɛɛni Bɔkɔta, awookeli ŋandi ike aosimela nte: «Lele kolelake»!14Yesu asɛmɛli sukɛlɛ la Jɛnɛsa e ojo la nke koola. Banto baiki bataɛmbɛ baemali. Yesu alɔndi nte: «Bompojo, mbɔlɔnda: Emwa»!15Ongo ompojo abwe kako nkango aemwe, oyali osongosongo, la manja nɔnda. Yesu awuuchisa ele nyɛŋɛnde.16Banto lalikuli ba baɛmi la wɔɔma, baanjisa nkucha Kanamombe* la nɔnda nte: «Wɛɛni ɔnɛnɛ ombo pasela asamba iso»! Lonkinɛ ɔlɔndi: «Kanamombe* omwanda nkakola banto bande»!17Besao bɛnɛ bɛ kee Yesu be balaŋani o wooni lalikuli ba Yudeya la beoni lalikuli bemamani.18Bengo besao lalikuli be kee Yesu, baeki* ba Yɔani oso mbatisa baosimeli. Aliko la ingo, Yɔani aeleli baphee asamba bako.19Aatomi bachu mumbola Bɔkɔta nte: «Wɛɛ ko ongo Masiya* ataande? Aɔ tokonge ɔnkinɛ»?20Bango baeki baiye eiki Yesu baosimeli nte: «Yɔani oso mbatisa kombo totoma kaɛ tokuumbole iya wɛɛ ko Masiya ɔnɛ ataande aɔ tokonge onkinɛ»?21Weengo eleko Yesu aikisa banto ike, la baiki batatumbyama la beale la bitumbe la mbita basombo ba babe la bentongo ike baɛni.22Ekantunda Yesu abauchisa bango baeki ba Yɔani nte: «Chwaka nyo lokosimele Yɔani bingo bimwɛna nyo la mboka. Bentongo bamwanja m'mɛna, la bitumbe bamwanja n'kɛnda, la baso nsuli bambo ika, bimpokolo bamwanja mboka, la babwe bambo tondwa la beola bake baekyama Besako Bɛlɔti. 23Alombele ongo bonto ole phalimeyaki limanya jande kami»!24Bango baeki* ba Yɔani bautoli. Yesu aanjisa nsimela boloi baanto besao aliko la Yɔani nɔnda: Achwe nyo nenda ekambwa nke engo woosowe*? Onde, achwe nyo mɛna litɛtɛ ja tɛkyamaki la lɔphɛphɔ? Jɛ!25Iya jɛ, ochwe nyo mɛna nke? Bonto alɔti bisenda bilɔti? Jɛ! Kinaki, baso ndɔta bisenda be nombo bayalaka la luiko lɔlɔti, bayalaka nde o lulu la Bɔkɔta.26Laango, onsimele nyo, achwe nyo nenda nke? Mɛna wɛɛni*? Ole! Mbokosimela nyo nte aiki wɛɛni*, lonkinɛ aiki omboleka wɛɛni.27Ongo Yɔani ko Lɔɔsi Lɔɛlɔ lɔmbɔlɔnda aliko lande nte:Oka nyo! Lemi mbotoma bokambi ami akotangolele ,aliko akɔlɔngɔsɔlɛlɛ mboka.28«Mbokosimela nyo nte, asamba banto lalikuli ba bɔnɛ wooni, koo ɔnɛ aeta Yɔani oso mbatisa. Kinaki koonga ŋaanɛ, ole mpɔu weekeleka e Kanamombe* ko waiyolo mbeta Yɔani».29«Banto lalikuli la bangɛjisi ba kɔdi baoki besao be Yɔani, baeyi nte Kanamombe* olende bɔlɔti, nende eimisa bako mbatisiwa la Yɔani.30Kinaki, Bafalisayɔ* la Baekisi ba Isaliya*, baikileli isaliya ya Kanamombe* yaiki ndako la yako. Wiingo bakili mbatisama la Yɔani».31Yesu alɔndi lonkinɛ nte: Nani aɔsɔna lemi mbɛɛlamya la banto ba jooti ja lɛlɔ? La bambo elama la nani?32Balende bambo elama la bana bata yale bata elolelana boloi bɔmɔɔ la bonkinɛ nte:Tombo kophomela nyo ŋɔma, kinaki koo kɛnya nyo!Lɔnkinɛ tombo koembela nyo bɛkɛlwa be lotoko, kinaki koo ndela nyo!33«Aliko eleko eandi Yɔani oso mbatisa, ataika atale kitumbula la nywa difai, la nyo aiki nyo atalɔndɛ nte: ‹Olende la bosombo›34Eleko lemi Bɔna a Onto mbwiiya ndɛ la nywa, la nyo andalɔndɛ nyo nte: ‹Lenda nyo! Ɔnɛ onto olende bolei lonkinɛ bolɛwi, lɔnkinɛ keseka ke baso ngɛja kɔdi, la boso njambi›!35Kinaki, limanya ja Kanamombe* jataeyama njala sɔlɔ o bango lalikuli bata wiimeya».36Mufalisayɔ* ɔmɔɔ, aeleli Yesu nte aande ndɛ lilɛ e lulu lande. Yesu aingeli e lulu la ongo Mufalisayɔ*, ayali ndɛ lilɛ.37La woongo, ɔɔsɛngɛ kwiki la wainto ɔmɔɔ oso njambi. Ongo wainto aoki ndako nte Yesu olende e lulu la ongo Mufalisayɔ*, aingeli engo, ole la lintupa ja bauta ba limbala ja lisombi joolo.38Aemali sukɛlɛ la bekolo be Yesu ɔɔkɔngɔ atalele. Biinsɔli bende beanjisa ntɔcha bekolo be Yesu. Pa aanjisa nimola la libo jande. Wainto a loseka o limoli bekolo be Yesu la biinsɔli bende39Eleko engo Mufalisayɔ aeleli Yesu awɛɛni, akanyisa o lisolo jande nte: «Iya onto ɔnɛ otoyala sɔlɔ wɛɛni*, otoeya nte ɔnɛ wainto ole a bolengo nke, otoeya nte olende boso njambi».40Ango Yesu aosimeli ongo Mufalisayɔ nte: «Simo, nende la bosao bankosimela». La Simo awuuchisa: «Sɔlɔ Weekisi, lɔnda».41Yesu alɔndi: «Kwiiki banto ba phee baiki la ningo e onto ɔmɔɔ. Ɔmɔɔ wiiki la ningo e dinali miya itano, onkinɛ dinali baomu atano .42Bango baphee, aɛni bako bapha la obaelo ba ngɛla engo ningo ɛbɔ, ongo aasɔmbisa aachikeli bako lalikuli baphee. Asamba bako baphee, nani alanga ike ongo onto aasɔmbisa ningo»?43Simo auchisa: «Lakanya nte ongo achikelami ningo nɛnɛ». Yesu aosimeli: «Ombuucha bɔlɔti».44Pa, Yesu achwe ele ongo wainto la nsimela Simo: «Ɔmwɛna ɔnɛ wainto? Aingeli lemi e lulu labɛ, koo limpa iloko ya mbɔkya bekolo bemi. Kinaki, ɔnɛ wainto ndako ɔmɔ mbɔkya bekolo bemi la bampɔpɔ ba biinsɔli bende, la linimola la libo jande.45Wɛɛ koo linsumpa o limbɛbɛya, kinaki, ɔnɛ wainto, manja aingeli lemi anɛ anda memeya nsumpa bekolo bemi.46Wɛɛ koo linkucha la linkila bauta wɔɔtɛ, kinaki, ndako omonkila bauta ba limbala weekolo .47Wiingo mbokosimela ŋaanɛ koonga njambi ya ɔnɛ wainto iiki ike, lalikuli imbochikelama. Ingo nde imbotoma mɛnya nte omboolanga ike. Kinaki, bonto ombochikelama inchɛ olangaka inchɛ».48Pa Yesu asimeli ongo wainto nte: «Njambi yabɛ imbo sokolelama».49Banto lalikuli baiki batale la Yesu baanjisa mumbolana: «Bonto a bolengo nke ɔnɛ ata sokolela banto njambi»?50Kinaki, Yesu asimeli ongo wainto nte: «Lokani labɛ lombo kokakola. Chwaka bɔlɔti».
The Seed Company