LUKA2
1Luina longo, Bɔkɔta Ogisito Baalɔma, apasisha Isaliya nte nkombo yaanto lalikuli ya wooni ya konjami la Balɔma yaandekame.2Mandeka nkombo ya mala ntango ya bongo bolengo, ya kɛɛmi eleko eiki Kulɛnilɔ Bɔkɔta ba wooni ba Suliya.3Banto lalikuli baandi mbwi andikisa, kila onto wɔɔsɛngɛ bande ba mbotama.4Yɔsɛfu la ndako mimela Galilaya ɔɔsɛngɛ ba Nasalɛti. Achwe e Yudeya ɔɔsɛngɛ baotami Bɔkɔta Daudi, baelelamaki Bɛtɛlɛɛmu. Achwe engo aliko aiki o bolunga ba Daudi.5O nchwa mbwi andikisa achwe la Maliya ko bophoko aiki ndako atalake aiki la likundu mɛ la mbota.6Eleko eiki bako engo Bɛtɛlɛɛmu, luina la mbota yande ya koki.7Aoti weembe ande, bɔna a mpame. Aɔlɔtisa bisenda be likɛnda, la mboolaja ɔ lɔphɛphɛ longo lalelaki nyama aliko koo mba kaama e lulu laaŋɛni.8Oongo wooni, kwiki la bachungi. Bango bachungi baiki batayale wiileme o nchunga nyama yaɔ la ocho.9Kako nkango ephongo* ɛ Bɔkɔta aapaseli, la ekowa e bokuchu ɛ Bɔkɔta kebaenyisa kaama lalikuli. Balawi ike.10Kinaki, ephongo* aasimeli: «Kɔlawake nyo, aliko mbo kwela nyo besako belɔti bɛnɛ belangya banto lalikuli ike.11Lɛlɔ, bokakoli anyo ombootama ɔɔsɛngɛ ba Daudi, ataelelama Kilisito* lonkinɛ Bɔkɔta anyo.12Ɛnɛ ɛkwɛɛnya nyo nte ndako nkɛɛnɛ: akondotana nyo bɔna omboliphama bisenda be likɛnda, ombolajema ɔ lɔphɛphɛ loleelaka nyama». Bachungi bamboba besako be mbotama ya Yesu13Kako nkango, ongo ephongo* aɛnamwe oke la boloi bɔnɛnɛ ba biphongo bankinɛ mima e loola batakucha Kanamombe nte:14«Kanamombe a kuchame e loola la banto balangaka ndako e wooni babaa bii»!15Pa biphongo* baaŋani la bachungi, la bautoli e loola. Ango bachungi baanjisa nsimelana nte: «Wiingo tochu e Bɛtɛlɛɛmu, aliko tɔɛni o besao bɛmbɔkɛɛma, bengo betosimeli Bɔkɔta».16Bachwe engo loango batani Yɔsɛfu la Maliya la bɔna bɔkɛnyɛ ombolajema ɔ lɔphɛphɛ lolelaaka nyama.17Eleko esili bachungi mɛna bɔna, bachwe nsimeli banto besako bɛnɛ ephongo* aasimeli aliko la ongo bɔna.18Banto lalikuli baoki bengo besao, bɛlɔndi bachungi basebalali ike.19Kinaki, Maliya wiiki atakicha bengo besao lalikuli o lisolo jande la njala ataiyumbola aliko la beko ike.20E kantunda bango bachungi bautoli, baiki batachu batakucha Kanamombe la mbo weembela aliko la besao lalikuli beoki bako la mɛna. Aliko batani besao lalikuli ŋango baasimeli ephongo.21Akokisa bɔna biina ɛnaanɛi be mbotama, bawiili e weembe , pa mbilama e weembe baɔŋunyisa lokombo la Yesu, lɔnɛ laɛnyami ndako la ephongo* otamboka la Maliya mɛmba likundu.22Luina la mbɔkyama ya Yɔsɛfu la Maliya ya koki ningitana la Isaliya* ya Musa. Baoti ba Yesu bawɛɛmbi ɛ Yɛlusalɛma nte bawɛɛnya ɔmbɔweela ele Bɔkɔta .23Bakɛɛ ŋango aliko, kaandekami ŋango wiisaliya* ya Bɔkɔta nte: «Kila weembe lalikuli a mpame akondo yala a Bɔkɔta».24Lonkinɛ bapashisha mpato* ningitana la isaliya* ya Bɔkɔta ile nɔndaka nte: «bilenga biphee aɔ biasa biphee beelenga».25Ɔɔsɛngɛ ba Yɛlusalɛma kaiki bonto ɔmɔɔ aelelamaki Simo. Ongo Simo wiiki nde bonto a sɔlɔ atamboka ba Kanamombe la boso mbo wiimeya. Wiiki atakonge nkakolama yaanto ba Isilaeli. Lɔkɛngɛ Lɔɛlɔ wiiki kaama kamɔɔ la ndako,26lonkinɛ wiiki ataɛnyama nte phaɔsɔna mbwa iya ataɛni Kilisito* atomama la Bɔkɔta*.27Simo wiiki ataɛnyama la Lɔkɛngɛ Lɔɛlɔ, aingeli e lulu la Kanamombe* baoti ba Yesu bawɛɛmbi otema nte baokokeye ŋango bɔlɔndaka Isaliya*.28Simo aɛbisa bɔna Yesu waakasa bande, la nkucha Kanamombe, la nɔnda:29«Bɔkɔta, ɔmbɔ kɛɛ bosao bɔnɛ bolaki wɛɛ,anɛ aɔsɔna linsanjiya lemi bokambi abɛ,m'mbwibweele lami o bii.30Aliko lemi nɛɛmɛlɛ mbwiɛnɛla bokakoli* ɔnɛ ombotoma wɛɛ.31Ɔmbɔ ɔlɔngɔsɔla aliko ayale bokakoli* baanto lalikuli.32Ongo bokakoli ko ekowa ɛ ɛnya banto lalikuli,lonkinɛ ndako ka ɔya banto baɛ bokuchu».33Bengo besao belɔndi Simo aliko la Yesu, baoti bande ba sebalali.34Pa, Simo aachweli bochwako, aosimeli Maliya nyɛŋɛnde la bɔna nte: «Oka nyo: ɔnɛ bɔna ombootama aliko akwɛɛya banto e Isilaɛli la memaya ike asamba bako. Akondo yala imbali mima ele Kanamombe ɛnɛ ekila banto ike.35Laanɛ bamanya baanto ike bale bamboisama bakondoeyama. La wɛɛmɛlɛ akondoɛna tosoya wɛɛnte ongo ɔmbɔtɛmɔlama likɔnga o lisolo».36Kaiki, la wɛɛni ɔmɔɔ a wainto bokongo aelelamaki Ana. Aiki bophoko a Fanuɛli, a jooti ja Asheli. Ɔnɛ Ana okee bilongi esambaele too be nsɔŋama, bome ande abwe.37Ochikali obwele nende eleko iiki ndako oke bokongo ba bilongi baomu ɛnaanɛi la inɛi. Wiiki ataseke e lulu la Kanamombe atakambela Kanamombe bocho la yaani. Atalɔmbɛ koo ndɛ.38La ndako wiiye weengo eleko e Simo, la aanjisa nsakoya Kanamombe. Wiiki atalɔndɛ besako be Yesu waanto lalikuli banɛ bakongaki ŋango bakakola Kanamombe banto ba Yɛlusalɛma o tosoya taɔ.39Baoti ba Yesu basili nkɛɛ lalikuli bile Isaliya* ya Bɔkɔta yatalɔndɛ. Pa bautoli la ndako ɔɔsɛngɛ ba Nasalɛti e wooni ba Galilaya.40Bɔna amemeisa mbola la mba nkulu. Wiiki omboola la lokani, la wɛɛsɛ ba Kanamombe wiiki lande.41Kila ilongi, baoti ba Yesu baiki la bolengo ba nchwa e Yɛlusalɛma o libɛla ja Pasaka*.42Ango Yesu wiiki la bilongi joomu la iphee, ndako la baoti bande bauleli bako lalikuli nchwa o libɛla ja Pasaka* ŋango baiki bolengo Baayuda.43Ango asili libɛla ja Pasaka*, baoti ba Yesu bautoli kaɔ. Kinaki, Yesu achikali e Yɛlusalɛma, bako koo mbeya.44Bakanyaki nte Yesu olende asamba bolili ba baina labɔ ba lɔkɛndɔ. Bakɛndi wiina lalikuli, baanjisa mbowoona asamba baotwa landako la baeyana la ndako.45Kinaki, koo mboo wɛɛna. Wiingo bautoli lonkinɛ nende e Yɛlusalɛma o mbowoona.46Pa biina besato, baotani e lulu la Kanamombe*, atayale la Baekisi ba Isaliya* atabaoke la mboba umbola.47Banto lalikuli baokaki bengo besao, basebalali la lokani lande la mbucheya yande ya limanya.48Ango awɛɛni baoti bande, basebalali. Ango nyɛngɛnde awuumboli nte: «Aeeh bɔna ami, aliko laanke embo tokɛɛla wɛɛ ŋaanɛ? Lemi la isɛɛ twiiki la nkangi ike o nkoona».49La Yesu abauchisa: «Aliko laanke etamone nyo? Phaeye nyo nte kasana njale e lulu la Isɛmi»?50Kinaki, baoti bande koo mbeya aliko laanke embwasimela ndako ŋango.51E kantunda, Yesu autoli la bako e Nasalɛti. Wiiki atakee ŋango baosimelaki baoti bande. Bengo besao lalikuli nyɛŋɛnde wiiki ataikicha o lisolo jande.52La Yesu wiiki ataole la lokani la ntinda, lonkinɛ omemeisa nangya Kanamombe* la banto.
The Seed Company