Edwɛndolɛ89
Nana Nyamenle ye Ngyehyɛlɛ mɔɔ ɔvale ɔluale Devidi anwo zo la; Ngoanelielɛ ɛwɔkɛbɔlɛ ne
1O Nana Nyamenle, mebado wɔ ɛhulolɛ kpundii ne mɔɔ ɔnlɛ awieleɛ la anwo edwɛne dahuu; mebava me nloa babonle ne meabɔ wɔ diedi ne anwo nolo meahile ewiade amra.2Ɔluakɛ wɔ ɛhulolɛ kpundii ne le ɛhulolɛ mɔɔ ɔnlɛ awieleɛ a; yɛɛ wɔ diedi ne noko gyi ye kpundii kɛ anwuma maanle ne la.3Wɔmɔ yɛɛ wɔha kɛ: “Meye menli mɔɔ me nee bɛ ɛyɛ ngyehyɛlɛ la: Meha ndane mehile me sonvolɛ Devidi kɛ:4‘Mebamaa ɛ bo zo amra adɛnla aze wɔ mekɛ mɔɔ ɔnlɛ awieleɛ; yɛɛ wɔ belemgbunli ebia ne noko badɛnla ɛkɛ ne dahuu amaa wɔ angabɛnzo amra.’ ”5O Nana Nyamenle, maa anwuma maanle ne ɛye wɔ nwanwane ninyɛne ne mɔ ayɛlɛ; na wɔ diedi ne ɛla ali wɔ nwuanzanwuanzama ayia ne abo.6Nwane a wɔ anwuma mɔɔ nee wɔ sɛ a, O Nana Nyamenle? Nwane a wɔ anwuma maanle ne amra avinli mɔɔ le kɛ wɔmɔ a?7Wɔmɔ mɔɔ nwuanzanwuanzama ayia bo amra sulo wɔ a; wɔmɔ mɔɔ ɛle totohyia na ɛ nwo yɛ ɛzulolɛ tɛla bɛdabɛ mɔɔ bɛbɔ bɛyia wɔ la a.8O Awulae, Ɛlɔne Nyamenle, nwane a le kpole kɛ ɛdawɔ, mɔɔ wɔ diedima ne mɔ ɛbɔ ɛ nwo mgbɔlɛka ɛyia a?9Wɔmɔ yɛɛ ɛdi nyevile mɔɔ ɛzɛkye bɔbɔ la azo belemgbunli a; saa ye azɛlɛkye ne mɔ dwazo a, ɛbɛlɛ bɛ aze fɛɛnye.10Wɔmɔ yɛɛ ɛhomonle Yigyibitima anwo zo kɛ boane funli; na ɛvale ɛ sa ɛnlomboɛ ne ɛbɔle wɔ kpɔvolɛma ne mɔ ɛzandele a.11Anwuma maanle ne le wɔ deɛ; zɔhane ala noko yɛɛ azɛlɛ ye le wɔ deɛ a. Ewiade ye, ɔ nee ninyɛne mɔɔ wɔ nuhua la kpokpoti, wɔmɔ yɛɛ ɛyɛle bɛ a.12Wɔmɔ yɛɛ ɛyɛle Sɔlɔ ɔ nee Nyiakɛ amuala a. Boka Teebɔ ɔ nee Boka Hɛmɔn lua fɛlɛkolilɛ nu ye wɔ duma ne ayɛlɛ.13Wɔmɔ ɛlɛ ɛsalɛ ɛnlomboɛ! Ɛ sa nu yɛ ɛsesebɛ, yɛɛ ɔto ɔkɔ moa!14Tenleneyɛlɛ nee pɛpɛlilɛ yɛɛ ɛfa ɛdi wɔ belemgbunli ne a; yɛɛ ɛhulolɛ kpundii ɔ nee diedi di ɛ nyunlu dahuu.15Nyilalɛ ɛha bɛdabɛ mɔɔ bɛze ɛvoyia edwɛne ne to; na dahuu bɛtudu agyakɛ bɛba Nana Nyamenle anyunlu,16na alehyenlɛ muala bɛye wɔ duma ne ayɛlɛ, na bɛbɔ wɔ tenleneyɛlɛ ne anwo ɛlawule la.17Ɔluakɛ wɔmɔ yɛɛ ɛle bɛ anwosesebɛ ne anwo anyunlunyia a; wɔ wɔ anwunvɔnezelɛ ne anu yɛɛ bɛkpogya ye zo anwuma a.18Wɔmɔ, O Nana Nyamenle, yɛɛ ɛdule ɛ nwo ɛziele ɛkɛ kɛ ɛkɛyɛ yɛ sinzavolɛ a; wɔmɔ Yizilayɛ Nwuanzanwuanza Nyamenle ne yɛɛ ɛyɛle belemgbunli ɛmaanle yɛ a.19Mɔmoane bie, ɛluale yekile zo ɛdendɛle ɛhilele wɔ diedinli ne ɛzele kɛ: “Meva belemgbunli kyɛlɛ ne mezoa ahenle ne mɔɔ le bedevinli la; mekpogya ahenle ne mɔɔ menyele ye menvile menli ne mɔ anu la zo.20Yemɔ a le Devidi, mɔɔ le me sonvolɛ la; meva me nwole nwuanzanwuanza ne mekpokpa ye.21Me sa ɛnlomboɛ ne bapepɛ alie ye dahuu; na me anwosesebɛ noko bawa ɔ nwo zo mekɛ muala.22Kpɔvolɛma ɛnrɛli ɔ nwo zo konim ɛlɛ; yɛɛ atisesebɛvoma noko ɛnrɛhola ɛnrɛbɛlɛ ye aze.23Mebahomo ye kpɔvolɛma anwo zo; na meabɔ bɛdabɛ mɔɔ bɛkyi ye la asande meagua bɛ lɔ.24Me ɛhulolɛ kpundii ne nee me diedi ne bara ɔ nwo zo; na ɔlua me duma nu, bɛbamaa ye zo anwuma anwuma.25Mebamaa ye tumi adɛlɛ, wɔ nyevile tandane ne nee azule muala anwo zo.26Ɔbazu yeavɛlɛ me yeaha kɛ: ‘Wɔmɔ a le Egya, me Nyamenle ɔ nee me Bodane wɔ ngoanelielɛ nu a.’27“Mebayɛ ye me belamunli ralɛ; arelemgbunli kpokpoti mɔɔ wɔ aleɛabo amuala bɛ kpanyinli.28Mebali me ɛhulolɛ kpundii ɛwɔkɛ ne azo meamaa ye wɔ mekɛ mɔɔ ɔnlɛ awieleɛ; na mebali me ngyehyɛlɛ mɔɔ me nee ye ɛyɛ la azo dahuu.29Menrɛmaa ye koliagyama abo zo ɛnrɛdu ɛlɛ; na wɔ mekɛ ala mɔɔ anwuma maanle ne wɔ ɛkɛ ne la, ye belemgbunlililɛ ne abo ɛnrɛpɛ ɛlɛ.30Emomu saa ɔ bo zo amra arɛle fi me mɛla me mɔ, na bɛanlua me ngyehyɛlɛ adenle ne azo, bɛambɔ bɛ ɛbɛla;31saa bɛbu bɛ nye bɛgua me mɛla ne mɔ azo, na bɛanli me ngyehyɛlɛ ne mɔ azo ɛdeɛ a,32yemɔ mebadea bɛ wɔ bɛ ɛtane ne mɔ ati. Mebabila bɛ empele, na meamaa bɛanwu bɛ nyunlu wɔ bɛ ninyɛndane ne mɔ ati.33Noko akee menrɛye me ɛhulolɛ kpundii ne menrɛvi Devidi anwo zo; anzɛɛ menrɛgyakyi kɛ menwɔli me ɛwɔkɛ zo menwɔmaa ye.34Menrɛbu me ngyehyɛlɛ ne azo; anzɛɛ menrɛhakyi edwɛkɛ biala mɔɔ vi me nloa anu ɛvinde la.35Kotokokye yɛɛ meha ndane zɛhae a, kɛ: Menrɛbɔ adalɛ menrɛhile Devidi.36Ye abusua ɛlɔnwɔne ne bawa ɛkɛ ne wɔ mekɛ mɔɔ ɔnlɛ awieleɛ; ye belemgbunli ebia ne abo ɛnrɛdu ɛlɛ, wɔ mekɛ ala mɔɔ sɛnzɛne tɛbɔ anwomanyunlu la.37Ɔbayɛ damɛnlangoate kɛ siane ne la; ɔbagyinla kpundii wɔ mekɛ ala mɔɔ anwuma maanle ne wɔ ɛkɛ la.”38Noko akee kɛkala ɛdeɛ, wɔkpo ye na wɔvuandi ye wɔgua; wɔ ɛya ne ɛdwazo ɛtia wɔ belemgbunli ne.39Wɔza ɛne wɔvi wɔ ngyehyɛlɛ ne mɔɔ ɛ nee wɔ sonvolɛ ne yɛle la anwo; na wɔgua ye belemgbunli kyɛlɛ ne anwo evinli.40Wɔfitifiti ye mbane ne mɔ anu; na wɔzɛkye ye konlendeɛ muala.41Menli mɔɔ pɛ nu se la kpokpoti fe ye agyapadeɛ ne; ɛnɛ yeyɛ amgbuzilɛ baka yemaa ɔ gɔnwo mɔ.42Wɔmaa ye kpɔvolɛma ɛli ɔ nwo zo konim; na wɔmaa bɛlɛdi fɛlɛko wɔ ye azedɔlɛ nwo.43Wɔmaa ye konlendeɛ muala ɛyɛ ninyɛne mgbane; wɔmaa ɔngola gyinla konle nyunlu bieko.44Wɔlie ye belemgbunli sɛkɛlɛneɛ ne wɔvi ɔ sa nu; na wɔvuandi ye belemgbunli ebia ne wɔdo ye aze.45Wɔpɛ ye ngoane zo; na wɔmaa anyunluguase ɛwula ye tɛladeɛ.46Kɔkpula kenle nzu, O Nana Nyamenle, yɛɛ ɛbava ɛ nwo wɔavea dahuu a? Kɔkpula kenle nzu, yɛɛ ɛbamaa wɔ ɛyavalɛ ne azɔ hulenyi kɛ senle a?47Kakye, O Awulae, kɛ yɛ ngoane tendenle si de la; nwu ye kɛ wɔmɔ yɛɛ ɛbɔle yɛ muala, yɛdayɛ menli mɔɔ ewule la ɛkɛ ne maa yɛ la a!48Sonla ne boni yɛɛ badɛnla ngoane nu, mɔɔ yemɔ ɔnrɛnwu ewule ɛlɛ a? Nwane ala yɛɛ ɔbahola yealie ɔdaye ye ɛkɛla yeavi ewule tumi sa nu a?49O Awulae, deɛ mɔɔ kile wɔ tete ɛhulolɛ kpundii ne la wɔ nienwu? Wɔ ɛwɔkɛ ne mɔ mɔɔ ɛbɔle ɛmaanle Devidi la amuala hale nienwu?50Kakye, O Awulae, kɛ bɛsi bɛsi wɔ sonvolɛ ye amgbu; ɔ nee kɛ mesi mesɔ anwubɛnyunlu ɔ nee amowalɛ mɔɔ menli wola gua me nwo zo la anu la.51Wɔ kpɔvolɛma ne mɔ bɔ wɔ belemgbunli ne mɔɔ wɔye ye la aholoba, O Nana Nyamenle; bɛsi wɔ belemgbunli ne agyakɛ ɛdudulɛ mgbane ne bɔbɔ amgbu.52Nyilalɛ ɛha Nana Nyamenle wɔ mekɛ mɔɔ ɔnle awieleɛ! Ɔyɛ ɛkɛ! Na ɔyɛ ɛkɛ!Biblica, Inc.