Edwɛndolɛ81
Siane fofolɛ ɛvindelɛ Edwɛndolɛ
1Bɛdo edwɛne bɛmaa Nana Nyamenle mɔɔ le yɛ wowavolɛ la; bɛva fɛlɛkolilɛ bɛvɛlɛ Gyekɔbo Nyamenle!2Bɛmaa edwɛne zo, na bɛha agole bɛgua nu; bɛva getae ɔ nee bɛ sa nu sanwunle ɔ nee awa bɛdo anyelielɛ edwɛne.3Bɛbɔ aweɛne ne anu wɔ ɛvoyialilɛ mekɛ ne anu; wɔ siane ɛdalɛ mekɛ ne anu.4Ɔluakɛ ɛhye le Yizilayɛ azɛlɛ zo amaamuo ngyehyɛlɛ mɔɔ vi Gyekɔbo Nyamenle ɛkɛ a.5Ɔvale mɛla ɛhye ɔmaanle Dwosefi abo zo amra, wɔ mekɛ mɔɔ ɔyele bɛ ɔvile Yigyibiti azɛlɛ zo la. Ɛnelɛ bie mɔɔ metɛtele ye ɛlɛ la ɛlɛka kɛ:6“Mame yɛɛ menyele ɛ bati adesoa ne, na menyele ɛ sa menvile kɛndɛne ne anu a.7Ɛvɛlɛle me wɔ wɔ nyanelilɛ nu, na menliele wɔ zo, na menyele wɔ. Mɔɔ ɛvɛlɛle me wɔ ahumu kpole ne anu bɔbɔ la, menliele wɔ zo; menzɔle wɔ meneanle wɔ Mɛleba nzule ne anwo.8Bɛdie me folɛ mɔɔ mebadu bɛ la, O me menli! O Yizilayɛma, kɛkala angome a, anrɛɛ bɛyɛ ɛnzolɛ bɛdie me!9Bɛmmadie nyamenle gyɛne biala bɛto nu; bɛmmabɔ bɛ ti aze bɛmaa nyamenle fofolɛ biala.10Mame a le bɛ Awulae Nyamenle ne a; mame a menyele bɛ menvile Yigyibiti azɛlɛ zo a. Bɛbukebuke bɛ nloa ne mɔ wanaanwo, na mebagua nu meamaa bɛayi tɛkɛɛ.11Noko akee me menli ne mɔ andie me ne; Yizilayɛ angulo kɛ ɔkɛde me nwo edwɛkɛ bɔbɔ.12Ɛhye ati mengyakyile bɛ memaanle bɛhɔlile bɛ anzosesebɛ ne anzi; na bɛdabɛ bɛlile bɛ adwenle ngyehyɛleɛ zo.13“O kɛkala angome a, anrɛɛ me menli ɛhye mɔ ɛdie me ne; me kunlu anu a anrɛɛ Yizilayɛma ɛva me adenle ne anu!14Ɔnrɛhyɛ biala mebahomo bɛ kpɔvolɛma anwo zo; na meahakyi me nzi meazi bɛdabɛ mɔɔ bɛkyi bɛ la amuala.15Bɛdabɛ mɔɔ bɛkyi Nana Nyamenle la bahakyi ahɔ ye ɛkɛ, na bɛ mekɛ ɛnrera awieleɛ ɛlɛ.16Mebava atoko mɔɔ yɛ fɛ kpalɛ la meamaa wɔali; na meamaa wɔ wolɛ mɔɔ vi bolɛ nu la meamaa wɔatafe ɛ kunlu adwo ɛ nwo.”Biblica, Inc.