Edwɛndolɛ71
Anwodelɛnli Akpanyima bie ye Edwɛne nee ye Nzɛlɛlɛ
1O Nana Nyamenle, wɔmɔ yɛɛ mefa me rɛle mewula wɔ nu a; mmamaa me nyunlu nyiane gua aze kenlebie maanle nu ɛlɛ.2Wɔ wɔ tenleneyɛlɛ ne anu, boa me na die me; yɛ ɛnzolɛ maa me, na die me ngoane.3Yɛ Bodane maa me, na bɔ me nwo bane; ɔluakɛ wɔmɔ yɛɛ ɛle me sinzavolɛ, ɔ nee me nriandifeabelɛ a.4Pepɛ die me, O me Nyamenle, fi me kpɔvolɛma asa anu; ye me fi amumuyɛvoma ɔ nee atisesebɛvoma bɛ tumi nu.5Ɔluakɛ O Awulae, wɔmɔ yɛɛ ɛle me anyelazo a; wɔ nu yɛɛ meva me rɛle mewula sumunli me mgbavolɛ nu a.6Wɔmɔ yɛɛ mehisa wɔ vi me mbɛda nu a; wɔmɔ yɛɛ ɛyele me ɛvile ɔmɔ akunlu a; dahuu me ayɛlɛyelɛ dwu ɛ nwo zo.7Mehakyi nwanwane debie wɔ menli nye zo; noko akee wɔmɔ yɛɛ ɛle me feabelɛ ɛsesebɛ ɛsesebɛ a.8Wɔ ayɛlɛyelɛ ɛyi me nloa tɛkɛɛ; alehyenlɛ biala mebɔ wɔ anyunlunyia ne anwo nolo.9Mmaye me rɛle ɛto me sa nu wɔ me mgbanyinliyɛlɛ mekɛ nu; mmamaa ɛ rɛle fi me wɔ mekɛ mɔɔ me anwosesebɛ kɛwie la.10Ɔluakɛ me kpɔvolɛma fa me ɛhunlɛ nwo akpame; bɛkeha me nwo edwɛke ɛtane ɛtane.11Bɛka kɛ, “Nyamenle ɛkpo ye; bɛdu ye ako kɛ bɛkɛhye ye; ɔluakɛ awie biala ɛnle ɛkɛ mɔɔ ɔkɛlie ye a.”12O Nana Nyamenle, mmate ɛ nwo ɛkɔ moa ɛfi me nwo; O me Awulae, bɛla ndɛndɛ na balie me!13Maa me kpɔvolɛma anwo ɛdo na bɛyela dwɛɛ; maa anyunluguase nee anyiemgba ɛha bɛdabɛ mɔɔ bɛkpondɛ bɛazɛkye me la.14Noko akee mame ɛdeɛ, mebava me rɛle meawula wɔ nu; na meaye wɔ ayɛlɛ dahuu dahuu.15Mebabɔ wɔ tenlene nyɛleɛ ne anwo ɛlawule, mɔɔ fale wɔ ngoanelielɛ ne anwo la dahuu; ɔluakɛ bɛ dɔɔnwo bo me adwenle zo.16Mebalua Awulae Nyamenle nyɛleɛ mgbole mgbole ne mɔ anu meara ɛ nwo; na meaye ye tenleneyɛlɛ ne mɔɔ le ɛ ngomekye wɔ deɛ la ayɛlɛ.17O Nana Nyamenle, wɔhilehile me sumunli me ngakula nu; yɛɛ kɛkala bɔbɔ, metɛbɔ wɔ nwanwane ninyɛne ne anwo ɛlawule.18Zɔhane ati, bɔbɔ wɔ me mgbanyiyɛlɛ, ɔ nee me mbelerayɛlɛ nu, mmakpo me, O Nana Nyamenle, kɔkpula kɛ menwɔbɔ wɔ anwosesebɛ ne anwo nolo menwɔhile angabɛnzoma mɔɔ ɛlɛba la.19Wɔ tumi nee wɔ tenleneyɛlɛ, O Nana Nyamenle, dwu anwuma moamoa nehane. Wɔmɔ yɛɛ wɔyɛ ninyɛne mgbole mgbole a. O Nana Nyamenle, nwane yɛɛ nee wɔ sɛ a?20Ɛdawɔ mɔɔ wɔmaa menwu anwubɛnyunlu dɔɔnwo la, yɛɛ ɛbamaa meadwazo bieko a. Ɛbaye me wɔavi azɛlɛ ne abo nehane wɔara ngoane nu bieko.21Ɛbado me anyunlunyia nu, na wɔakyekye me rɛle bieko.22Medame noko mebava sanwunle meahanvo wɔ diedi kpundii ne, O me Nyamenle; mebava getae meaye wɔ ayɛlɛ, O Yizilayɛ Nyamenle Nwuanzanwuanza.23Mebali fɛlɛko wɔ mekɛ mɔɔ meto ayɛlɛyelɛ edwɛne meamaa wɔ la; me ɛkɛla ne mɔɔ wɔlie ye ngoane la noko baye wɔ ayɛlɛ zɔhane ala.24Akee me tafinlima noko baha wɔ tenlene moalɛ ne anwo edwɛkɛ dahuu; ɔluakɛ wɔmaa nyiane nee anyiemgba ɛha bɛdabɛ mɔɔ anrɛɛ kpondɛ azɛkye me la.Biblica, Inc.