Edwɛndolɛ59
Ɛtane ahatualɛ mɔɔ fɛta la anwo Edwɛndolɛ
1Die me fi me kpɔvolɛma asa anu, O me Nyamenle; bɔ me nwo bane fi bɛdabɛ mɔɔ bɛdwazo me kɔme zo la asa anu!2Die me fi amumuyɛvoma ɛhye mɔ asa anu; ye me fi ahodiawu ɛhye mɔ anloa anu.3Me kpɔvolɛma ɛzia kpoonwu kpondɛ me ahu me; amumuyɛvoma ɛhye bɛ nwo file ɛdwazo ɛtia me. Tɛ kɛ asɛɛ meyɛ ɛtane metia bɛ la ati ɔ,4yɛɛ tɛ ɛvonlɛ mɔɔ mevo bɛ la ati a ɛmaa bɛlɛtu me ako a, O Awulae.5Kɛha ɛ nwo! Bagyinla me nzi, na boa me! Ɛdawɔ nea, Yizilayɛ Nyamenle! Wɔmɔ Awulae Ɛlɔne Nyamenle! Dwazo na tea menli mɔɔ ɛnzonle wɔ la kpokpoti; mmase bɛ nuhua kotokokye bɔbɔ anwunvɔne.6Aledwolɛ biala bɛsia bɛba, bɛbakpo wowo wowo kɛ ahwea la; na bɛbɔ sua ne anwo mgbɔlɛka bɛyia.7Bɛmɛ a bɛgua nehane la; nea kɛ bɛlɛtwi bɛ gye bie a. Noko akee bɛdwenle kɛ awie ɛnde bɛ nganeɛ.8Na wɔmɔ Nana Nyamenle, ɛzelekɛ ala a ɛsele bɛ a; ɛnva bɛdabɛ mɔɔ bɛnzonle wɔ la ɛnye ɛhwee.9O me Nyamenle, mɔmɔ mɔɔ ɛle me anwosesebɛ a, mebado ayɛlɛyelɛ edwɛne meamaa wɔ; ɔluakɛ wɔmɔ, O Nana Nyamenle, yɛɛ ɛle me nriandifeabelɛ a.10Me Nyamenle kulo me, ɔti ɔbaralie me; me Nyamenle bamaa meali me kpɔvolɛma anwo zo konim.11Mmaku bɛ, anrɛɛ yemɔ bɛ rɛle kɛvi. Maa wɔ tumi ne ɛdinda bɛ bɔkɔɔ, na ɔha bɛ aze fɛɛnye, O me Nyamenle nee me Sinzavolɛ!12Ɔlua bɛ nloa nee bɛ tafinlima edwɛkɛ ɛtane ti, maa bɛ munzule ɛbɔ bɛ ti zo; ɔluakɛ bɛbɔ adalɛ na eza bɛwa amonle.13Yela bɛ wɔ ɛyavalɛ nu ala; yela bɛ maa bɛdɔ nzonle; amaa menli anwu kɛ Nyamenle di belemgbunli wɔ Gyekɔbo anwo zo, na ye belemgbunlililɛ dwu maanle ti nee maanle bo.14Aledwolɛ biala bɛsia bɛba, bɛbakpo wowo wowo kɛ ahwea la; na bɛbɔ sua ne anwo mgbɔlɛka bɛyia.15Bɛle kɛ ahwea mɔɔ luolua nu kpondɛ aleɛ ali, na saa bɛannyia bie dɔɔnwo a, bɛsu bɛ kunlu la.16Na mame mebado wɔ tumi ne anwo edwɛne; mebado wɔ anwunvɔnezelɛ ne anwo edwɛne nwonlomɔ biala. Ɔluakɛ wɔmɔ wɔyɛ me feabelɛ, me nriandifeabelɛ wɔ me amaneɛnwunlɛ mekɛ nu.17O me Nyamenle wɔmɔ mɔɔ ɛle me anwosesebɛ a, mebado edwɛne meaye wɔ ayɛlɛ; ɔluakɛ wɔmɔ Nyamenle yɛɛ ɛle me nriandifeabelɛ a. Nyamenle ne mɔɔ maa menwu ye ɛhulolɛ kpundii ne la.Biblica, Inc.