Edwɛndolɛ56
Aluoluanuvolɛ ne mɔɔ bɛkpo ye la ye Edwɛndolɛ
1Nwu me anwunvɔne, O Nana Nyamenle, ɔluakɛ bɛlɛtietia me nwo zo; alehyenlɛ kpokpoti, me kpɔvolɛma sisi me.2Alehyenlɛ dahuu, me kpɔvolɛma ko tia me; bɛdabɛ mɔɔ bɛdwazo bɛtia me la anwo zonle dɔɔnwo.3O Awulae Bedevinli, saa ɛzulolɛ ka me a, wɔ nu a mefa me rɛle mewula a.4Medie Nyamenle medi, ɛhye ati menzulo. Me rɛle wɔ Nyamenle nu, ɛhye ati meye ye ayɛlɛ. Duzu bɔbɔ a sonla dasanli kɛhola kɛyɛ me a?5Alehyenlɛ muala, me kpɔvolɛma kpondɛ kɛ bɛsɛkye me; bɛ adwenlenzuzulɛ ɛtane muala tia me.6Bɛkye bɛ nwo file, bɛbu bɛsia, na bɛnea me nyɛleɛ.7Kɛmɔ alehyenlɛ biala bɛ nye la kɛ bɛ sa kɛha me la, zɔhane ala a wɔ wɔ ɛyavalɛ nu, ɛ nee bɛ ɛli ye ɛnwonle a, na ka bɛ aze fɛɛnye, O Nana Nyamenle!8Ɛze ɛvɛlɛ mɔɔ mevɛ a; ɛze monle dodo mɔɔ mehwi a. Asoo bɛtɛkɛlɛle ɛhye wɔ wɔ buluku ne anu ɔ?9Mekɛ biala mɔɔ menwɔvɛlɛ wɔ la, me kpɔvolɛma bagua ɛbɔ nu. Meze ɛhye mesie kɛ Awulae Nyamenle wɔ me afoa.10Wɔ Nana Nyamenle ne mɔɔ mekanvo ye la duma nu, wɔ Awulae ne mɔɔ meye ye ayɛlɛ la duma nu;11Nyamenle nu a me diedi wɔ a, ɔti menwɔzulo ɛhwee. Duzu bɔbɔ a sonla dasanli kɛhola kɛyɛ me a?12Me ɛwɔkɛ mɔɔ mebɔ wɔ la, ɔwɔ kɛ medi zolɛ, O Nana Nyamenle. Mebava moyɛlɛ azubɔlɛ meamaa wɔ.13Ɔluakɛ wɔmɔ wɔye me ɛkɛla wɔvi ewule nu. Nɔhalɛ nu, wɔammaa bɛanli me nwo zo konim; ɛhye ati mebava wienyi mealua Nana Nyamenle duma nu, wɔ me ɛbɛlabɔlɛ nu.Biblica, Inc.