Edwɛndolɛ50
Nɔhalɛ Nyamenle ɛzonlenlɛ ne
1Nana Nyamenle, Awulae Nyamenle ne mɔɔ bo debie biala anwo zo la ɛlɛtendɛ ahile aleɛabo amuala, ɔbɔ ye sɛnzɛne aduduleɛ mɔɔ kɔ ye adɔleɛ la.2Nyamenle ɛlɛta avi Zayɔn, sua mɔɔ di munli na eza ɔle kɛnlɛma la azo.3Yɛ Nyamenle ne ɛlɛba, ɔnrɛyɛ koonwu bieko; sendɔlɛra kpole bie li ɔ nyunlu, na ahumu totohyia ɛbɔ ye mgbɔlɛka ɛyia.4Yedo ɛsalɛ yevɛlɛ anwuma nee aze kɛ bɛrɛla bɛranlea ye ndɛnebualɛ.5Bɛhuohua bɛdabɛ mɔɔ bɛdie me bɛdi la anloa; bɛdabɛ mɔɔ bɛlua azubɔlɛ zo bɛ nee me ɛyɛ ngyehyɛlɛ la.6Anwuma belemgbunli maanle ne da Nyamenle ye tenleneyɛlɛ ne ali; ɔluakɛ Nyamenle ɔdaye mumua ne ɔle Ndɛnebuavolɛ.7Bɛdie, ebiamɔ, mebadendɛ. O Yizilayɛma, mebali daselɛ meatia bɛ. Mele Nyamenle, bɛ Nyamenle ne.8Membua bɛ ndɛne fɔlɛ wɔ bɛ azubɔlɛ nwo; ɔluakɛ bɛ deɛyelalɛ azubɔlɛ ne mɔ dwu me nyunlu dahuu.9Memkpondɛ ɛnlankɛ nyinli ko bɔbɔ menvi bɛ aako nu; anzɛɛ abɔnkye nyinli menvi bɛ tunli nu.10Ɔluakɛ ɛbɔ nu nyɛmoa kpokpoti le me deɛ; yɛɛ nlankɛ mɔɔ wɔ awoka ne mɔ noko azo la amuala.11Meze anwomanyunlu nloma muala, yɛɛ debie biala ɛnlua azɛlɛ ye azo mɔɔ ɔnle me deɛ a.12Saa ɛhɔne ku me a ɔnle kɛ meka mekile bɛ; ɔluakɛ ewiade anu ninyɛne kpokpoti le me deɛ.13Bɛde kɛ medi ɛnlankɛ nane, anzɛɛ meno mbɔnkye mogya ɔ?14Bɛva moyɛlɛ azubɔlɛ bɛmaa Nana Nyamenle, na bɛdua bɛ ɛwɔkɛ ne mɔɔ bɛbɔ bɛmaa Nyamenle mɔɔ wɔ anwuma moamoa lɔ la;15na bɛvɛlɛ me wɔ bɛ ɛmianlɛ mekɛ nu. Mebalie bɛ, na bɛdabɛ noko bɛawula me anyunlunyia.16Nyamenle tendɛ se amumuyɛvo ne kɛ: “Duzu tumi yɛɛ ɛlɛ ye mɔɔ ɛdawɔ ɛka me mɛla nwo edwɛkɛ; anzɛɛ kɛ ɛfa ɛ nloa bɔbɔ ɛbɔ me ngyehyɛlɛ zo a?17Ɔluakɛ ɛtia me ndeanlɛ, na ɛtu me nloa edwɛkɛ ɛgua.18Ɛ nee nwule yɛɛ atu a; yɛɛ ɛ nee awuvolɛvalɛma noko yɛɛ adua a.19Ɛtane ngome ala a vi ɛ nloa anu finde a; yɛɛ adalɛ ala a ɛbɔ a.20Ɛde ɛkɛ ne yɛɛ ɛtendɛ ɛtia ɛ diema a, ɛdawɔ ɛ nli akunlu ralɛ.21Zɛhae ninyɛne ne yɛɛ wɔyɛ a; medame noko meyɛ koonwu; ɔti ɛdwenle kɛ mele kɛ ɛdawɔ la. Na kɛkala, akee mebua wɔ ndɛne, na meaye wɔ ɛtane ne meado ɛ nyunlu.22Wɔmɔ mɔɔ ɛ rɛle ɛvi Nyamenle a, nea ɛhye boɛ! Ammaa meantete wɔ nu nzokɛnzoka, mɔɔ awie ɛnle ɛkɛ mɔɔ kɛhola kɛlie wɔ wɔ me sa nu a.23“Awie biala mɔɔ fa ye moyɛlɛ azubɔlɛ bɛlɛ me la di me eni; awie biala mɔɔ yɛ ye ninyɛne gyɛlɛɛnye la, mebahile ye kɛ Nana Nyamenle si kola die ngoane la!”Biblica, Inc.