Edwɛndolɛ48
Zayɔn, Belemgbunli ne ye Tɛnlabelɛ
1Nana Nyamenle le kpole, na ɔfɛta nganvolɛ bedevinli wɔ ye Nyamenle sua zo!2Nea kɛ ye boka nwuanzanwuanza ne la ye kɛnlɛma bie a; ɔle aleɛabo amra amuala bɛ anyelielɛ. Boka Zayɔn wɔ sɔlɔ moamoa nehane; belemgbunli kpole ne ye suakpole ɔ.3Sua ne ɛhyelɛ nu da Nyamenle Ɛpepɛlielɛ ne ali.4Ɔluakɛ arelemgbunli ne mɔ huohuanle bɛ nloa; bɛdule bɛ nwo kɛ bɛba sua ne anwo zo.5Na bɛnwunle ye ala la ɔzinle bɛ nwo; bɛ nwo wozole bɛ, bɛguale ɛbɔ nu.6Ɛzulolɛ kpole hanle bɛ wɔ ɛkɛ; na bɛyɛle kɛ mraalɛ mɔɔ ɛvo awolɛ zo la.7Ɔlua anwoma ne mɔɔ vi sɛnzɛne aduduleɛ la azo, ɔbubule meli ne mɔ mɔɔ vi Tahyehye la.8Kɛmɔ yɛdele la, zɔhane ala noko yɛɛ yɛnwunle ye, wɔ sua ne mɔɔ le Ɛlɔne Awulae deɛ la, wɔ sua ne mɔɔ le yɛ Nyamenle deɛ mɔɔ ɔnlɛ awieleɛ, mɔɔ Nyamenle ɛkyekye la azo a.9O Nana Nyamenle, wɔ ɛhulolɛ kpundii ne mɔɔ ɛmbɔ aze ɛlɛ la, yɛɛ yɛdwenledwenle nwolɛ wɔ wɔ asɔne sua ne anu a.10Kɛmɔ wɔ duma ne de la, O Nana Nyamenle, zɔhane ala noko yɛɛ wɔ ayɛlɛyelɛ ne de wɔ ewiade amuala a. Ɛ sa fema ne azo yɛɛ konimlilɛ wɔ a.11Bɛmaa Boka Zayɔn ɛli fɛlɛko; bɛmaa Dwuda mralɛ mraalɛ anye ɛlie, wɔ wɔ ndɛnebualɛ nwo.12Kpɔsa, bɔ Zayɔn anwo mgbɔlɛka; tiedia ye esianwu ne mɔ.13Bɛnlea ye mbane ne mɔ. Bɛhɔ ye ahodoka ne mɔ anu, na bɛahola bɛaha bɛahile bɛ mra:14Kɛ ɛhye a le Nyamenle, yɛ damɛnlangoate Nyamenle ne a. Ɔbayɛ yɛ sinzavolɛ wɔ mekɛ mɔɔ ɔnlɛ awieleɛ.Biblica, Inc.