Edwɛndolɛ31
Nyanenwunlɛ nee Anwunvɔnezelɛ Edwɛndolɛ
1Wɔmɔ a mefa me rɛle mewula wɔ nu a, O Nana Nyamenle; mmamaa me nyunlu nyiane gua aze. Die me, ɔluakɛ wɔmɔ ɛle tenlene Nyamenle!2Saa mesu mefɛlɛ wɔ a, gua ɛ nzo aze tie me, na die me ndɛndɛ. Yɛ me Bodane kpole, na bɔ me nwo bane fi me kpɔvolɛma asa anu.3Ɔluakɛ wɔmɔ yɛɛ ɛle me anyelazo dievolɛ nee me nriandifeabelɛ a; zɔhane ati di me nyunlu na wowa me, kɛmɔ ɛdawɔ wɔbɔ me ɛwɔkɛ la.4Ye me fi ɛhane ne mɔɔ me kpɔvolɛma ɛzua me la anu; ɔluakɛ wɔmɔ a ɛle me sinzavolɛ a.5Ɛ sa nu a mefa me sunsum mewula a.Wɔmɔ a wɔlie me ngoane a, O Awulae Nyamenle nɔhalɛdivo.6Ɛkyi bɛdabɛ mɔɔ bɛsonle awozonle nee abɔdeɛ mgbane mgbane la; na mame ɛdeɛ, medie Nana Nyamenle medi.7Medi fɛlɛko, na me nye die wɔ wɔ anwunvɔnezelɛ nu; ɔluakɛ ɛze me nyanenwunlɛ kpokpoti; ɛze me sunsum nu anwubɛnyunlu muala.8Wɔanye me wɔammaa me kpɔvolɛma; wɔmaa menyia ndinli megyinla zo.9Nwu me anwunvɔne, O Nana Nyamenle, ɔluakɛ mewɔ anwongyelelɛ kpole nu; me nye ɛbɔ tɔɔ, O medɔ donvula.10Alɔbɔlɛ ɛyi me tɛkɛɛ; ɛzunlɛ ngome ɛmaa me ngoane zo ɛde. Nyanenwunlɛ ngome ɛmaa me nwo ɛgolo me; me agbɔkɛ nu ɛtuto bɔkɔɔ.11Meyɛ amgbuzilɛ baka memaa me kpɔvolɛma, bɔbɔ menli mɔɔ de bikye me la. Me gɔnwo mɔ ɛnriandi ɛgyakyi me; menli mɔɔ ze me la ɛnɛ sulo me.12Awie biala arɛle ɛvi me, kɛ asɛɛ mewu la; meyɛ kɛ ɛyɛba mɔɔ ɛdɔ aze ɛbɔ la.13Menli ɛlɛyɛ huhuhuhu wɔ me nwo; me nwo ɛha ɛzulolɛ ɛmaa bɛ. Bɛlɛfa me nwo akpame; bɛkpondɛ adenle bɛapɛ me ngoane zo.14Noko akee melɛ diedi wɔ wɔ nu, O Nana Nyamenle. Meka mesi zo kɛ, “Wɔmɔ a ɛle me Nyamenle a.”15Me ngoane wɔ ɛ sa nu dahuu: die me fi me kpɔvolɛma, nee bɛdabɛ mɔɔ bɛkyi me kɔkɔkɔkɔ la asa anu.16Yeye ɛ ti akunlu na die wɔ akɛlɛ; die me wɔ wɔ anwunvɔnezelɛ ti.17Mebodo mɛsɛlɛ wɔ, O Nana Nyamenle; mmamaa nyiane ku me. Maa me kpɔvolɛma bɛ munzule ɛbɔ bɛ ti zo, na bɛwu foo.18Maa adalɛ nabalabama ɛdɔ mumule, bɛmɛ mɔɔ bɛdi tenlenema anwo dasewia a.19O Awulae, wɔ atiakunlukpalɛ ne mɔɔ ɛyɛ ɛmaa menli mɔɔ sonle wɔ la le kpole! Wɔ atiakunlukɛnlɛma ne mɔɔ ɛyɛ ɛmaa bɛdabɛ mɔɔ die wɔ di la le kpole!20Ɛdie wɔ diedima ɛfi bɛdabɛ mɔɔ bɛfa bɛ nwo adwenle ɛtane la asa anu; na ɛfa bɛ ɛfea ɛ ndɛba abo; ɛfa bɛ ɛfea, na ɛmmaa munzule ɛnloanlɛ ɛnga bɛ.21Nyilalɛ ɛha Nana Nyamenle! Ɔluakɛ yemaa menwu ye nwanwane atiakunlukpalɛ ne, wɔ mekɛ mɔɔ me kpɔvolɛma bɔle me nwo mgbɔlɛka yiale la!22Meandwenle meangɔ moa na meaha kɛ, “Awulae ɛye ɔ nye wɔ me nwo zo.” Noko akee ɛnee yede me ne; na ɔliele me ɔvile nyanenwunlɛ nu.23O, bɛhulo Nana Nyamenle, bɛmɛ anwodelɛma. Ɔluakɛ Awulae di nɔhalɛdivoma adane; na ɔtea amemaabɛnwozovoma kɛmɔ ɔfɛta la.24Bɛnyia akɛnrazilɛ, bɛmɛ mɔɔ bɛdie Nana Nyamenle bɛdi la; bɛgyinla kpundii.
Biblica, Inc.