Edwɛndolɛ27
Edwɛndovo ne ye Arɛlekyekyelɛ ɔ nee ye Anyelazo wɔ Konimlilɛ nu
1Nana Nyamenle le me kɛnlaneɛ ɔ nee me ngoanedievolɛ; nwane bieko bɔbɔ a ɔwɔ kɛ mesulo ye a? Awulae le me ɛkɛla ne anwosesebɛmaavo; nwane bɔbɔ a kɛhola kɛgyinla me nyunlu a?2Saa atiakunlutanevolɛma, bɔbɔ, me kpɔvolɛma, dwazo me kɔme zo kɛ bɛku me a, bɛ munzule bɔ bɛdabɛ bɛ ti zo.3Ɛlɔne ekpunli ekpunli babɔ me nwo mgbɔlɛka ayia ɛdeɛ; noko akee me ahonle ɛnrɛdu ɛlɛ. Me kpɔvolɛma badwazo me nwo zo wɔ konle nu ɛdeɛ, noko akee me diedi zo ɛnrɛde ɛlɛ.4Debie kokye a mebiza mefi Nana Nyamenle lɔ a; debie kokye a mekpondɛ a: Kɛ menwɔdɛnla Awulae aako nu dahuu, na menwɔnwu ye anyunlunyia kɛnlɛma ne, na menwɔzonle ye wɔ ye Asɔne Sua Kpole ne anu.5Saa anwubɛnyunlu to me a ɔbabɔ me nwo bane; Ɔbava me yeavea Nwuanzanwuanzaleka ne wɔ ye Asɔne Sua Kpole ne anu. Ɛkɛ ne yɛɛ nyanenwunlɛ biala ɛnrɛdo me a;6amaa meali konim wɔ me kpɔvolɛma anwo zo, na meava fɛlɛkolilɛ nee edwɛnedolɛ meabɔ azu meamaa Awulae wɔ ye Asɔne Sua Kpole ne anu. Mebado edwɛne, mebahanvo Nana Nyamenle.Bɛ nwo banebɔlɛ Nzɛlɛlɛ
7Saa mefɛlɛ wɔ a, tie me, O Nana Nyamenle! Nwu me anwunvɔne, na bua me!8Mekɛ mɔɔ ɛzele kɛ, “Bɛla bazonle me” la, membuale wɔ wɔ me ahonle nu menzele kɛ, “Mame ɛne, O Nana Nyamenle!”9Mmaye ɛ nyunlu ɛfea me; mmafa ɛya ɛye wɔ sonvolɛ ali. Ɛle me boavolɛ, mmaye me ali, yɛɛ eza noko mmagyakyi me adevinli, O Nana Nyamenle, me ngoanedievolɛ.10Egya nee ɔmɔ bɔbɔ kɛkpo me ɛdeɛ, noko akee Nana Nyamenle anye bawa me nwo zo.11Kilehile me mɔɔ ɔwɔ kɛ meyɛ a, O Nana Nyamenle; na fa me dua adenle kpalɛ zo. Ɔluakɛ me kpɔvolɛma ɛzo somaa.12Mmaye me ɛmaa me kpɔvolɛma; ɔluakɛ alasevolɛ adalɛma ɛdwazo me nwo zo ɛlɛdi dasewia atia me atisesebɛ nu ala.13Meze ye wienyi kɛ mebanwu Nana Nyamenle anyunlunyia ne wɔ teasema azɛlɛ zo.14Die Nana Nyamenle di, maa ɛ nwo ɛyɛ wɔ ɛsesebɛ; gyinla kpundii, na fa ɛ rɛle wula Awulae nu.Biblica, Inc.