Edwɛndolɛ25
Bɛlɛvoma Nzɛlɛlɛ
1O Nana Nyamenle, wɔmɔ yɛɛ mefa me nzɛlɛlɛ meto ɛ nyunlu a.2O me Nyamenle, wɔmɔ yɛɛ mefa me rɛle mewula wɔ nu a. Mmamaa anyiemgba ka me; mmamaa me kpɔvolɛma di me nwo zo konim.3Nɔhalɛ nu bɛdabɛ mɔɔ bɛkakyi bɛ nzi bɛsi wɔ la, yɛɛ anyiemgba ka bɛ a.4Kilehile me ɛ gyakɛ abo ndenle ne mɔ. O Nana Nyamenle kilehile me wɔ nɔhalɛ ndenle ne mɔ.5Kilehile me, na maa menlua wɔ nɔhalɛ ndenle ne mɔ anu; ɔluakɛ wɔmɔ a ɛle me ngoanedievolɛ Nyamenle a; wɔmɔ a me rɛle wɔ wɔ nu dahuu a.6Kakye wɔ anwunvɔnezelɛ ne, O Nana Nyamenle; kakye wɔ ɛhulolɛ kpundii ne, mɔɔ sumunli mɔlebɛbo ne wɔhile la.7Fa me mbɛda nu ɛtane mɔɔ menyɛle la, ɔ nee mɛla mɔɔ medo la amuala kyɛ me. Fa kyɛ me, O Nana Nyamenle, wɔ wɔ anwunvɔnezelɛ nee wɔ ɛhulolɛ molozo ne anu.8Nana Nyamenle le tenlene na ɔdi nɔhalɛ; zɔhane ati ɔkilehile ɛtanevolɛma adenle kpalɛ mɔɔ ɔwɔ kɛ bɛfa zo a.9Ɔwowa mɛlɛbɛnwoazema mɔɔ tenrɛ la, na ɔkilehile bɛ ye ɛhulolɛdeɛ ne.10Nana Nyamenle ndenle nu le ɛhulolɛ nee anwunvɔnezelɛ maa bɛdabɛ mɔɔ bɛdi ye mɛla nee ye ngyehyɛlɛ zo la.11Di wɔ ɛwɔkɛ ne azo, O Nana Nyamenle, na fa me ɛtane kyɛ me. Ɔluakɛ me ɛtane ɛyɛ kpole.12Nwane mɔ a sulo Nana Nyamenle a? Bɛmɛ yɛɛ Awulae bahile bɛ adenle mɔɔ ɔwɔ kɛ bɛfa zo a.13Bɛbahɔ ye boɛ dahuu; na azɛlɛ ne bayɛ bɛ mra deɛ.14Nana Nyamenle fealera nu edwɛkɛ ɛnvea bɛdabɛ mɔɔ bɛdi ye mɛla zo la; bɛmɛ bɛze ye ngyehyɛlɛ ne mɔ.15Nana Nyamenle le me anyelazo dahuu; ɔ ngomekye ala yɛɛ ɔkola ɔdie me ɔfi munzule nu a.16Twe bikye me, O Awulae, na nwu me anwunvɔne; ɔluakɛ menlɛ agɔnwolɛ; meyɛ anwunvɔne:17Nyane kpole ɛyi me ahonle tɛkɛɛ; O ye me fi anwofofolɛ nu.18Nea me amaneɛnwunlɛ nee ateetee; na fa me ɛtane muala kyɛ me.19Nea kɛ me kpɔvolɛma ɛzo bie a; nea kɛ bɛsi bɛkyi me kɔkɔkɔkɔ a!20Sinza me na die me; mmamaa anyiemgba ka me. Ɔluakɛ wɔ nu a melɛ arɛlekyekyelɛ a.21Maa tenleneyɛlɛ nee nɔhalɛlilɛ ɛdoa me dahuu; ɔluakɛ wɔmɔ a me nye la ɛ nwo zo a.22Die Yizilayɛ ngoane, O Nana Nyamenle, fi ye ɛvɛlɛ kpokpoti anu.Biblica, Inc.