Edwɛndolɛ147
Nyamenle anye mɔɔ wɔ ye Menli nwo zo la
1Bɛye Awulae ayɛlɛ! Ɔle kpalɛ kɛ bɛkɛdo ayɛlɛyelɛ edwɛne bɛkɛmaa yɛ Nyamenle ne a; ɔluakɛ ɔle ɛlolɛmaavolɛ, yemɔti ɔfɛta kɛ bɛkɛye ye ayɛlɛ.2Nana Nyamenle ɛlɛmaa Gyɛlusalɛm zo azie ɔ bo zo dɛba ne; ɔ nee Yizilayɛma mɔɔ bɛvale bɛ bɛhɔle amanvoa la ɛlɛsia ara.3Ɔyɛ bɛdabɛ mɔɔ bɛgyakyi bɛ arɛlevilɛ nu bɛmaa bɛ ɛbolɛ ɛde la ayile, na ɔkyekye bɛ nganlɛ ne mɔ.4Ɔze nwɔlɛra dodo mɔɔ wɔ anwomanyunlu la, na ɔfa bɛ nuhua ko biala duma ɔfɛlɛ ye.5Yɛ Awulae le bedevinli, na tumi ɛyi ye tɛkɛɛ; ye nrɛlɛbɛ, bɛsuzu a bɛnnwu ɔ bo, yɛɛ bɛtia a bɛnnwu ɔ nloa.6Nana Nyamenle kpogya anwoazehanlɛma zo anwuma; na atisesebɛvoma ɛdeɛ, ɔti bɛ motomoto kɛ munlutu la.7Bɛdo moyɛlɛ edwɛne bɛmaa Nana Nyamenle; bɛbɔ edwɛne wɔ sanwunle ne azo bɛmaa yɛ Nyamenle.8Ɔfa amungu ɔkeda anwomanyunlu, ɔtɔ nzule ɔgua azɛlɛ ye azo, na ɔmaa ndile nee mbaka mbaka fifi wɔ awoka ne mɔ azo.9Ɔfa nyɛmoa muala bɛ aleɛ ɔmaa bɛ na ɔmaa ahɔhɔsɛlɛ ngakula aleɛ, saa bɛsu bɛfɛlɛ ye a.10Ye anyelielɛ ɛnle konlendeɛ bɛ anwosesebɛ nu anzɛɛ ɔ nye ɛnlie azogya katakyiema anwo;11na emomu, Nana Nyamenle anye die bɛdabɛ mɔɔ bɛdi ye eni la anwo; ɔlɛ bɛdabɛ mɔɔ bɛfa bɛ rɛle bɛwula ye ɛhulolɛ nwanwane ne anu la anwo ɛhulolɛ.12Ye Nana Nyamenle ayɛlɛ, O Gyɛlusalɛm! Ye wɔ Nyamenle ne ayɛlɛ, O Zayɔn!13Ɔluakɛ yemɔ yɛɛ ɔsinza wɔ nlenkɛ ne mɔ ɛsesebɛ ɛsesebɛ nu a; na ɔyileyila wɔ menli ne mɔ wɔ wɔ mbane ne mɔ anu.14Ɔmaa anzondwolɛ ba wɔ ɛweɛne ne mɔ azo; na ɔmaa wɔ ahunludwolɛ abɛlɛ ma.15Ɔtendɛ wɔ tumi nu ala ɔkile aleɛabo amra; na bɛyɛ debie biala mɔɔ ɔse bɛ la ndɛndɛ zo.16Ɔtɛlɛ asukɔntweaba wɔ azɛlɛ ye azo kɛ kundu la, na ɔbɔ ɛbɔlɛ ɔkponde kɛ nzonle la.17Ɔtɔ ye ayese kɛ ahɔndɔma la; na nwane yɛɛ kɛhola kɛzɔ ɛyɛlɛ ne mɔɔ ɔfa ɔba la a?18Ɔsoa ye edwɛkɛ ne maa ɔba, na ayese ne kolo gua; ɔmaa anwoma ne bɔ, na azule ne mɔ tenrɛ se.19Ɔfa ye edwɛkpa ne ɔmaa Gyekɔbo; ye ngilehile ɔ nee ye mɛla ne mɔ dwu Yizilayɛ anwo zo.20Ɔtɛyɛle ɛhye ɔtɛmaanle maanle gyɛne biala; ɔluakɛ bɛnze ye ngyehyɛlɛ ne mɔ. Bɛye Awulae Ayɛlɛ!Biblica, Inc.