Edwɛndolɛ145
Gyihova nee Nyamenle Bedevinli ne
1Me Nyamenle ɔ nee me belemgbunli, mebado wɔ kpoleyɛlɛ ne anwo edwɛne; mebayɛ wɔ mo wɔ mekɛ mɔɔ ɔnlɛ awieleɛ.2Alehyenlɛ biala mebayɛ wɔ mo; na meahanvo wɔ duma wɔ mekɛ mɔɔ ɔnlɛ awieleɛ3Nana Nyamenle le totohyia, na ɔfɛta ayɛlɛyelɛ kpole; ye kpoleyɛlɛ ne bo ndelebɛbo muala anwo azo.4Bɛbaye wɔ ayɛlɛ, ɔvi ɛlɔnwɔne ko anwo zo kɔdwu ɛlɔnwɔne ko anwo zo, na bɛabɔ wɔ nwanwanendeɛ mgbole mgbole ne mɔ anwo nolo.5Bɛbaha wɔ anyunlunyia ne nee wɔ belemgbunlililɛ ne anwo edwɛkɛ; na medame noko mebadwenledwenle wɔ nwanwanendeɛ ne mɔ anwo.6Menli baha wɔ gyima mgbole mgbole ne mɔ anwo edwɛkɛ, na mame mebala wɔ bedevinliyɛlɛ ne ali.7Bɛbaha wɔ kpalɛyɛlɛ ne amuala anwo edwɛkɛ, na bɛado wɔ ahunlunyele ne anwo edwɛne.8Nana Nyamenle le ɛlolɛmaavolɛ ɔ nee anwunvɔnesevolɛ; ɔkyɛ na yeava ɛya; ɛhulolɛ nwanwane ɛyi ye tɛkɛɛ.9Nana Nyamenle ati akunlu le kpalɛ maa awie biala, na ye anwunvɔnezelɛ wɔ debie biala mɔɔ ɔdaye yebɔ ye la anwo zo.10Wɔ abɔndeɛ muala bava moyɛlɛ amaa wɔ, O Nana Nyamenle, na wɔ anwodelɛma kpokpoti bayila wɔ.11Bɛbaha wɔ anyunlunyia ne mɔɔ wɔ wɔ belemgbunlililɛ tumi ne anu la anwo edwɛkɛ, na bɛala wɔ anwosesebɛ ne noko ali;12amaa awie biala anwu wɔ nwanwane gyima mgbole mgbole ne mɔ, ɔ nee wɔ anyunlunyia tumi ne mɔɔ wɔ wɔ belemgbunli maanle ne anu la.13Wɔ belemgbunlililɛ ɛnlɛ ye awieleɛ, yɛɛ ɛle belemgbunli dahuu. Awulae di nɔhalɛ maa ye ɛwɔkɛ kpokpoti yɛɛ debie biala mɔɔ ɔyɛ la le kpalɛ.14Nana Nyamenle boa bɛdabɛ mɔɔ bɛwɔ anwongyelelɛ nu la; na ɔkpogya bɛdabɛ mɔɔ bɛde aze la zo.15Abɔndeɛ kpokpoti su fɛlɛ wɔ wɔ bɛ anyelazo nu, na ɔmaa bɛ sa ka bɛ ngyianlɛndeɛ wɔ mekɛ mɔɔ ɔfɛta la anu.16Ɔmaa bɛ mɔɔ sa bɛ di la, na ɔmaa awie biala nyia ye ahunludwolɛdeɛ.17Nana Nyamenle le tenlene wɔ debie biala mɔɔ ɔyɛ la anu; ɔle anwunvɔnesevolɛ wɔ ye nyɛleɛ kpokpoti anu.18Nana Nyamenle twe bikye bɛdabɛ mɔɔ bɛfɛlɛ ye la; ɔba bɛdabɛ mɔɔ bɛsu bɛfɛlɛ ye nɔhalɛ nu la ɛkɛ.19Bɛdabɛ mɔɔ bɛdi ye eni la, ɔmaa bɛ sa ka bɛ ngyianlɛndeɛ kpokpoti; eza ɔtie bɛ nzɛlɛlɛ na ɔdie bɛ ngoane.20Nana Nyamenle bɔ bɛdabɛ mɔɔ bɛlɛ ɔ nwo ɛhulolɛ la anwo bane na ninyɛndaneyɛvoma ɛdeɛ, bɛmɛ ɔbabɔ bɛ bo zo bɔkɔɔ.21Mebaye Nana Nyamenle ayɛlɛ dahuu; bɛmaa abɔndeɛ kpokpoti ɛye ye duma nwuanzanwuanza ne ayɛlɛ wɔ mekɛ mɔɔ ɔnlɛ awieleɛ.Biblica, Inc.