Edwɛndolɛ139
Nyamenle ne mɔɔ nwu debie biala la ye anyunlunyia
1O Nana Nyamenle, wɔmɔ wɔnleɛnlea me ahonle nu, na wɔnwu debie biala mɔɔ wɔ me nwo la.2Wɔmɔ ɛze me azedɛnlanlɛ nee me ɛdwazolɛ nu, ɛnwu me adwenle nu ngyehyɛleɛ kpokpoti ɛfi moamoa.3Wɔmɔ ɛnwu me, saa melɛyɛ gyima anzɛɛ melɛdie me ɛnwomenle a; na ɛze me nyɛleɛ kpokpoti.4Bɔbɔ kolaa na edwɛkɛ bavi me nloa anu avinde la, O Nana Nyamenle, ɛnee ɛze mɔɔ mebaha la amuala.5Wɔbɔ wɔyia me wɔ me foa nee foa; ɛfa wɔ tumi totohyia ne ɛsinza me.6Wɔ nrɛlɛbɛ wɔ me nwo le kuloonwu zɛhae; ɔbo me ndelebɛbo zo bɔkɔɔ.7Nienwu bɔbɔ a menwɔhola menwɔva menwɔvi wɔ sunsum ne abo a? Anzɛɛ nienwu bɔbɔ yɛɛ menwɔhola menwɔva menwɔnriandi menwɔvi ɛ nyunlu a?8Saa mefo mekɔ anwuma maanle ne anu a, ɛwɔ ɛkɛ ne; saa medwu ɛbolɔ kuma ne anu a, ɛwɔ ɛkɛ ne.9Saa mefa nwonlomɔ ɛndɛbalɛ na metu mekɔtɛnla nyevile kunlu nehane bɔbɔ a,10ɛkɛ ne yɛɛ ɛ sa ɛnlomboɛ ne kɛyɛ me atuu a, ɛwɔ ɛkɛ ne mɔɔ ɛbaboa me a.11Mekola meka kɛ maa awozinli kabii ɛheda me nwo zo anzɛɛ wienyi ne mɔɔ ɛbɔ ɛyia me la ɛhakyi aledwolɛ,12noko akee awozinli kabii ne wɔmɔ ɔnle awozinli ɔmmaa wɔ, yɛɛ aledwolɛ ne noko ta wienyi kɛ alehyenlɛ la. Awozinli kabii nee wienyi le deɛ ko ne ala maa wɔ.13Wɔmɔ yɛɛ ɛbɔle me nwo nane ne ye ɛleka biala a; wɔmɔ yɛɛ ɛnwonle me wɔ ɔmɔ ako ɛzɛne ne anu a.14Meye wɔ ayɛlɛ, ɔluakɛ ɛ nwo yɛ ɛzulolɛ nee nwanwane; debie biala mɔɔ ɛyɛ la le nwanwane, na eza ɔyɛ ɛzulolɛ. Meze ɛhye mesie wɔ me ahonle nu.15Me sonlabaka mumua ne anvea wɔ wɔ mekɛ mɔɔ ɛnee bɛlɛyɛ me fealera nu wɔ ɔmɔ akunlu la. Nwanwane nu ala yɛɛ bɛyɛle me wɔ azɛlɛ ne abo nehane a.16Bɔbɔ mɔɔ ɛnee bɛtɛyɛle me la, ɛnee ɛze ɔmɔ amodinli ne. Wɔ buluku ne anu yɛɛ bɛhɛlɛle me nwo ninyɛne ne amuala wɔ nu wɔ mekɛ mɔɔ ɛnee bɛtɛnrenzɛle me la a, bɔbɔ wɔ mekɛ mɔɔ ɛnee bɛtɛyɛle me nwo debie biala la.17O Nana Nyamenle, nea kɛ wɔ adwenle ne mɔ sonle bolɛ maa me bie a! Nea bɛ tɛtɛbonle kɛ ɔde a!18Saa mese kɛ metia bɛ ngoko ngoko a, bɛbazo bɛadɛla ɛnweazo anwea bɔbɔ. Saa mevi nla nu medwazo a, me nee wɔ a wɔ ɛkɛ a.19O Nana Nyamenle, me kunlu anu a anrɛɛ ɛbahu amumuyɛvoma ne mɔ! Saa menli mɔɔ ka mogya gua la kɛgyakyi me bɛkɛmaa menwɔva me nwo kɔlɔɔnwo a, anrɛɛ ɔkɛyɛ me fɛ totohyia.20Bɛfa adwenle ɛtane ɛtane bɛtia wɔ; bɛtendɛ atisesebɛ nu ala bɛtia wɔ, na bɛgua wɔ duma ne anwo evinli.21O Nana Nyamenle, nea kɛ mesi mekyi bɛdabɛ mɔɔ bɛkpɔ wɔ la bie a! Nea kɛ mesi mekpɔ bɛdabɛ mɔɔ bɛdwazo bɛtia wɔ la bie a!22Mekpɔ bɛ ɛkpɔlɛ mɔɔ di munli a; mebu bɛ kɛ me kpɔvolɛma.23Neɛnlea me ahonle nu nea, O Nana Nyamenle, na nwu me adwenle nu. Sɔ me nea na nwu me adwenle ne mɔ.24Nea kɛ saa ɛkɛnwu ɛtane bie wɔ me nu a, na fa me fa adenle ne mɔɔ ɔnlɛ awieleɛ la azo.Biblica, Inc.