Edwɛndolɛ135
Ayɛlɛyelɛ mɔɔ Awulae ye Sonvolɛma fa maa ye la
1Bɛye Nana Nyamenle ayɛlɛ! Bɛye ye duma ne ayɛlɛ, bɛmɔ mɔɔ bɛle Awulae ye sonvolɛma,2bɛmɔ mɔɔ bɛwɔ Nana Nyamenle ye Asɔne Sua ne anu wɔ yɛ Nyamenle ye Aako ne anu la.3Bɛye Nana Nyamenle ayɛlɛ, ɔluakɛ ɔ ti akunlu le kpalɛ; bɛdo edwɛne bɛhanvo ye duma ne, ɔluakɛ ɔle ahunlunyelenli.4Awulae ɛza nu ɛye Gyekɔbo ɛmaa ɔ nwo, yeva Yizilayɛ yeyɛ ɔdaye ye agyapadeɛ.5Meze ye wienyi kɛ Nana Nyamenle le bedevinli, ɔbo awozonle kpokpoti anwo zo.6Debie biala mɔɔ Nana Nyamenle kulo la yɛɛ ɔyɛ a, wɔ anwuma maanle ne anu, ɔ nee aleɛabo, wɔ nyevile nu, ɔ nee azukunlu amuala.7Ɔmaa ahumu amungu ne mɔ dwazo wɔ aleɛabo; ɔmaa ɛsɛlɛmanye kpakyekpakye wɔ ezuledɔlɛ mekɛ nu, na ɔfɛlɛ anwoma ne ɔfi ye fealera nu.8Yemɔ yɛɛ ɔhunle menli nee nyɛmoa bɛ belamunli mralɛ wɔ Yigyibiti azɛlɛ zo a.9Ɛkɛ ne yɛɛ ɔyɛle sɛkɛlɛndeɛ ɛzulolɛ ɛzulolɛ ɔ nee nwanwanendeɛ, ɔvale ɔdeanle Faro ɔ nee ye maanle mgbanyima a.10Yemɔ yɛɛ ɔbɔle maanle maanle bɛ bo zo, na ɔhunle arelemgbunli katakyie ne mɔ a.11Saehɔn, mɔɔ le Amoritema bɛ belemgbunli ne; Ɔɔg, mɔɔ le Beeshyanema bɛ belemgbunli ne; ɔ nee arelemgbunli mɔɔ wɔ Keena maanle nu la amuala.12Ɔvale bɛ azɛlɛ ne mɔ kɛ damɛnlangoate agyapandeɛ bie la, na ɔvale ɔmaanle ye menli, Yizilayɛ.13O Nana Nyamenle, bɛbala wɔ duma ne ali dahuu kɛ Nyamenle; ɛlɔnwɔne kpokpoti bahakye wɔ.14Nana Nyamenle bapepɛ alie ye menli; ɔbaze ye azonvolɛ ne mɔ anwunvɔne.15Maanle maanle bɛ awozonle ne mɔ le nvutuke nee dwɛtɛ fufule abaaba ngome; sonla dasanli asa anloa gyima ɔ.16Bɛlɛ ɛnloanlɛ, noko akee bɛngola tendɛ; bɛlɛ ɛnyelɛ, noko akee bɛnnwu debie.17Bɛlɛ ɛnzolɛ, noko akee bɛnde edwɛkɛ; bɛngola bɛngu ɛnwomenle bɔbɔ.18Kɛmɔ bɛde la, zɔhane ala a menli mɔɔ yɛle bɛ la noko de a, na bɛfa bɛ rɛle bɛwula bɛ nu noko.19O Yizilayɛma, bɛye Nana Nyamenle ayɛlɛ! O Aalɔn azɛlɛvolɛ mgbanyinli, bɛhanvo Nana Nyamenle!20O Livaema azɛlɛvolɛ, bɛye Awulae Gyihova ayɛlɛ! O bɛdabɛ mɔɔ bɛsonle ye la, bɛhanvo ye duma ne!21Bɛye Nana Nyamenle ayɛlɛ wɔ Zayɔn, wɔ Gyɛlusalɛm, ye Aako ne anu. Bɛye Awulae ayɛlɛ!Biblica, Inc.