Edwɛndolɛ115
Ayɛlɛyelɛ mɔɔ bɛfa bɛmaa Nana Nyamenle ye Anyunlunyia ne la
1Ɛ ngomekye, O Nana Nyamenle, ɛ ngomekye wɔ duma ne ala, na emomu tɛ yɛmɛ yɛ deɛ ne, yɛɛ anyunlunyia ɛha ye a. Ɔlua wɔ ɛhulolɛ kpundii ne nee wɔ nɔhalɛlilɛ ne ati, maa awie biala ɛye wɔ ayɛlɛ.2Duzu ati a ɔwɔ kɛ maanle maanle biza kɛ, “Bɛ Nyamenle ne wɔ nienwu a?”3Yɛ Nyamenle ne wɔ Anwuma maanle ne anu; na mɔɔ ɔkulo la yɛɛ ɔyɛ a.4Bɛ awozonle ne mɔ le sonla sa anloa ninyɛne, mɔɔ bɛva dwɛtɛ fufule nee nvutuke bɛyɛ a.5Bɛlɛ ɛnloanlɛ, noko akee bɛndendɛ; bɛlɛ ɛnyelɛ, na bɛnnwu ɛhwee!6Bɛlɛ ɛnzolɛ, noko akee bɛnde edwɛkɛ; bɛlɛ ebonyile, na bɛnde nvoanle!7Bɛlɛ ɛsalɛ, noko akee ɛti bɛ a bɛnde; bɛlɛ egyakɛ, na bɛngola tia; bɛngola bɛnva bɛ kominza bɛnyɛ alɛra biala.8Menli mɔɔ yɛle zɔhane awozonle ne mɔ la, le kɛ bɛdabɛ ala la pɛ; zɔhane ala yɛɛ bɛdabɛ mɔɔ bɛva bɛ rɛle bɛwula bɛ nuhua la de a.9O bɛmɛ Yizilayɛma, bɛva bɛ rɛle bɛwula Nana Nyamenle anu! Ɔle bɛ boavolɛ; ɔle bɛ wowadeɛ.10O bɛmɛ Aalɔn azɛlɛvolɛ, bɛva bɛ rɛle bɛwula Nana Nyamenle anu, ɔle bɛ boavolɛ; ɔle bɛ wowadeɛ.11Bɛmɛ mɔɔ bɛdi Nana Nyamenle eni la, bɛva bɛ rɛle bɛwula ye nu; ɔle bɛ boavolɛ; ɔle bɛ sinzavolɛ.12Awulae adwenle wɔ yɛ nwo zo alehyenlɛ biala, na amgba ala ɔbayila yɛ; ɔbayila Yizilayɛma, ɔ nee Aalɔn aako nu amra kpokpoti.13Ɔbayila bɛdabɛ mɔɔ bɛdi ye eni la kpokpoti, ngakula nee mgbanyinli muala.14Nana Nyamenle ɛmaa bɛlɔ, bɛmɛ nee bɛ mra!15Nana Nyamenle mɔɔ bɔle anwuma nɛ aze la ɛyila bɛ.16Anwuma maanle ne le Nana Nyamenle angomekye deɛ, na emomu yeva azɛlɛ nwo maanle ne yemaa sonla dasanli.17Mɔwuamra ɛngola ɛnye Awulae ayɛlɛ, anzɛɛ bɛdabɛ mɔɔ bɛhɔ ewule kuma nu la.18Na emomu, yɛmɛ anyewɔzo amra yɛbava moyɛlɛ yɛamaa ye, ɔvi ɛnɛ kɔdwu mekɛ mɔɔ ɔnlɛ awieleɛ!Haleluya! Bɛye Awulae Ayɛlɛ!
Biblica, Inc.