Edwɛndolɛ112
Nana Nyamenle ye Nyilalɛ mɔɔ wɔ bɛdabɛ mɔɔ bɛdi ye Mɛla zo la anwo zo la
1Bɛye Nana Nyamenle ayɛlɛ! Nyilalɛ a le sonla ne mɔɔ sulo Awulae na ɔdi ye eni; na ɔlɛ anyelielɛ molozo wɔ Awulae mɛla ne mɔ azo ɛlilɛ nu la.2Ɔ mra bayɛ menli mgbole mgbole wɔ azɛlɛ ne azo, ɔ bo zo amra banyia nyilalɛ.3Agyapadeɛ nee anwonyia badɛnla ye aako nu, na ye tenleneyɛlɛ ne wɔ ɛkɛ ne dahuu.4Wienyi ta wɔ awozinli nu maa tenlenema, bɛdabɛ mɔɔ bɛse anwunvɔne, bɛle atiakunlukpalɛ, na bɛdi nɔhalɛ la.5Awie mɔɔ yɛ awie mɔ moalɛ na ɔbɔ ehyiavolɛma bosea, na eza ɔdi pɛlepɛle wɔ ye gyimayɛlɛ nu la wie ye boɛ.6Ɔluakɛ tenlenema abo ɛnrɛdu ɛlɛ, bɛbahakye ye dahuu.7Ye ahonle ɛndu wɔ adawu ɛtane ɛtane nwo; ye diedi gyi ye kpundii, na ɔ rɛle wɔ Nana Nyamenle nu.8Dahuu ɔsi pi anzɛɛ ɔnzulo debie biala; ɔze ɔsie kɛ ɔbanwu ye kpɔvolɛma awieleɛ.9Ɔgo ɔ sa atiakunlukɛnlɛma nu ala ɔmaa ehyiavolɛma, yɛɛ ye tenleneyɛlɛ ne wɔ ɛkɛ ne mekɛ mɔɔ ɔnlɛ awieleɛ; menli arɛle ɛnrɛvi ye nyɛleɛ ɛlɛ, na bɛbamaa ye zo wɔ anyunlunyia nu.10Ninyɛndaneyɛvoma nwu ɛhye na bɛfa nwolɛ ɛya; bɛtwi bɛ gye, na bɛnwa nwolɛ; bɛ anyelazo kpokpoti te minli wɔ melɛ mɔɔ ɔnlɛ awieleɛ.Biblica, Inc.