Edwɛndolɛ107
Ayɛlɛyelɛ edwɛne mɔɔ bɛfa bɛmaa Nana Nyamenle, Pepɛdievolɛ ne la
1Bɛmaa “yɛyɛ Nana Nyamenle mo, ɔluakɛ ɔ ti akunlu le kpalɛ; ye ɛhulolɛ nwanwane ne wɔ ɛkɛ mekɛ mɔɔ ɔnlɛ awieleɛ!”2Bɛmaa bɛdabɛ mɔɔ yelie bɛ ngoane, ɔ nee bɛdabɛ mɔɔ yepepɛ yelie bɛ yevi bɛ kpɔvolɛma asa anu la kpokpoti ɛha zɔ.3Ɔ nee menli mɔɔ bɛvale bɛ bɛhɔle amanvoa la ɛzia ɛra, ɔvi aduduleɛ kɔdwu adɔleɛ, ɔvi sɔlɔ kɔdwu nyiakɛ.4Bie mɔ luoluale nuhua gyɛne wɔ fiemgbole ne azo kpondɛle tɛnlabelɛ kpalɛ, noko akee bɛannyia bie.5Ɛhɔne nee nzuhɔne hunle bɛ ɔmaanle bɛ nwo golole bɛ, na ɔlua zo ɛnee akee bɛnlɛ anyelazo bieko.6Akee bɛzunle bɛvɛlɛle Nana Nyamenle wɔ bɛ anwongyelelɛ mekɛ ne anu, na ɔyele bɛ ɔvile bɛ amaneɛnwunlɛ nu.7Ɔvale bɛ ɔluale adenle kpolomgbolo nu, kɔkpula kɛ bɛhɔdwule sua mɔɔ bɛtɛnla zo la azo la.8Bɛmaa bɛva moyɛlɛ bɛmaa Nana Nyamenle wɔ ye ahunlunyele ne ati, ɔ nee ye nwanwane gyima ne mɔ mɔɔ ɔyɛle ɔmaanle menli amra la.9Ɔluakɛ ɔmaa ɛkɛla ne mɔɔ nzuhɔne ku ye la nzule, yɛɛ mɔɔ ɛhɔne ku ye la, ɔmaa ye debie kpalɛ ɔdi.10Bie mɔ dɛnlanle awozinli kabii nu; bie mɔ noko lale efiade, na bɛvale nwɔnzɔnwɔnzɔ bɛguale bɛ sa nee bɛ gyakɛ.11Ɔluakɛ bɛdwazole bɛtiale Nyamenle edwɛkɛ ne, na bɛambu Anwuma Bedevinlinli ne ye folɛdulɛ.12Gyimayɛlɛ ɛsesebɛ maanle bɛ ahonle yɛle kpalikpali zɛhae; ɛhye ati bɛpepɛle bɛfifinle, mɔɔ awie biala ɛnle ɛkɛ mɔɔ baboa bɛ bɛadwazo a.13Akee bɛzunle bɛvɛlɛle Nana Nyamenle wɔ bɛ anwongyelelɛ mekɛ ne anu, na ɔliele bɛ ɔvile bɛ nyanewunlɛ nu.14Ɔliele bɛ ɔvile awozinli kabii nee ewule nu, na ɔtetele bɛ nwɔnzɔnwɔnzɔ ne mɔ anu nzokɛnzoka ɔguale bɛ lɔ.15Bɛmaa bɛva moyɛlɛ bɛmaa Awulae wɔ ye ɛhulolɛ kpundii ne ati; ɔ nee ye nwanwane gyima ne mɔ mɔɔ ɔyɛle ɔmaanle menli amra la.16Ɔluakɛ ɔbubule mbulalɛ nlenkɛ ne mɔ, na ɔpepɛle mbulalɛ mɔɔ deda bɛ nzi la amuala anu.17Ahoasea mɔɔ wɔ nu la anwo dole bɛ, wɔ bɛ ninyɛndane ne mɔ ati, na ɔlua bɛ ɛtane ne ati bɛnwunle nyane kpole.18Bɛkpole aleɛ biala mɔɔ bɛdi la, na bɛhwenle bɛbikyele ewule.19Akee bɛzunle bɛvɛlɛle Nana Nyamenle wɔ bɛ anwongyelelɛ mekɛ ne anu, na ɔliele bɛ ɔvile bɛ nyanenwunlɛ nu.20Ɔdendɛle wɔ ye tumi nu, na bɛ nwo zale; ɔliele bɛ ɔvile ɛzɛkyelɛ nu.21Bɛmaa bɛva moyɛlɛ bɛmaa Nana Nyamenle, wɔ ye ɛhulolɛ nwanwane ne ati; ɔ nee ye nwanwane gyima ne mɔ mɔɔ ɔyɛle ɔmaanle menli amra la.22Maa bɛbɔ moyɛlɛ azu bɛmaa ye, na bɛva anyelielɛ edwɛne bɛla ye nyɛleɛ ne mɔ mɔɔ yeyɛ la ali.23Bie mɔ vale meli hɔle nyevile ne mɔ azo; bɛhɔlile gyima wɔ azumgbole ne mɔ azo.24Bɛdabɛ noko bɛnwunle Nana Nyamenle nyɛleɛ ne mɔ mɔɔ yeyɛ la, ye nwanwane gyima ne wɔ nyevile kunlu nehane.25Ɔdendɛle wɔ tumi nu, na ahumu dule, mɔɔ maanle nyevile azɛlɛkye mgbole mgbole dwazole a.26Meli ne mɔ kpogyale bɛ nwo zo hɔle anwuma anwuma, na bɛnlomanle nyevikuma ne abo. Ɛhye maanle bɛ akɛnrazilɛ ne hakyile bɛ ahonledulɛ.27Bɛdudule bɛ gyakɛ kɛ nzanobovolɛma la; bɛ adwenle yɛle bɛ tindaanwu.28Akee bɛzunle bɛvɛlɛle Nana Nyamenle wɔ bɛ anwongyelelɛ mekɛ ne anu, na ɔliele bɛ ɔvile bɛ nyanenwunlɛ nu.29Ɔbɛlɛle ahumu ne mɔ aze fɛɛnye, na ɔmaanle nyevile azɛlɛkye guale dii.30Akee bɛ nye liele, ɔluakɛ debie biala lale fɔɔnwo, na ɔvale bɛ ɔdwule ɛleka mɔɔ bɛkɔ la anzondwolɛ nu ala.31Bɛmaa bɛva moyɛlɛ bɛmaa Nana Nyamenle wɔ ye ɛhulolɛ kpundii ne ati, ɔ nee ye nwanwane gyima ne mɔ mɔɔ ɔyɛle ɔmaanle menli amra la.32Maa bɛla ye bedevinliyɛlɛ ne ali wɔ menli ne mɔ ayiaku ne anu, na bɛye ye ayɛlɛ wɔ mgbanyinli ne mɔ ayia bo.33Awulae maa azule azule sesa bɔkɔɔ, na ɔmaa amumuyɛvoma bɛ azɛlɛ kpalɛ ne mɔ kakyi fiemgbole.34Ɔmaa azɛlɛ kpalɛ zo ɛva kakyi ngyenle, ɔlua menli mɔɔ de zolɛ la bɛ amumuyɛ nyɛleɛ ti.35Eza ɔmaa fiemgbole kakyi azɛlɛ kpalɛ mɔɔ bɛdua aleɛ zo a; ɔmaa nzule vi azɛlɛ mɔɔ kpakyekpakye la anu ba maa ɔyɛ azɛlɛ kpalɛ.36Ɛkɛ ne yɛɛ ɔmaa bɛdabɛ mɔɔ ɛhɔne ku bɛ la tɛnla, na bɛkyekye bɛ azua kɛ bɛtɛnla nu a.37Bɛso bɛ egyinli na bɛduolua aleɛ aleɛ wɔ nu, na bɛbu aleɛ dɔɔnwo bɛfi nu.38Bɛlua ye nyilalɛ ne azo bɛwo, na ɔmmaa bɛ nlankɛ bo ɛndu ɛlɛ.39Saa bɛkomo Nana Nyamenle ye menli nwo zo na bɛbɛlɛ bɛ aze wɔ nzisi, anwongyelelɛ ɔ nee alɔbɔlɛ nu a,40ɔwola ye ɛyavalɛ ne ɔgua arelemgbunli nwo zo, na ɔmaa bɛduolua nuhua mgbane mgbane wɔ fiemgbole ne mɔ azo.41Emomu, ɔyɛ ehyiavolɛma ɔfi bɛ anwongyelelɛ nu, na ɔmaa bɛ nwo so kɛ nyɛmoa ekpunli ekpunli la.42Nɔhalɛdivoma nwu ɛhye, na bɛdi nwolɛ fɛlɛko; na amumuyɛvoma ɛdeɛ, bɛnwu ɛhye a ɛnee bɛdɔ mumule.43Mɔɔ le nrɛlɛbɛvolɛ la, bɛmaa ɔyɛ ɛnzolɛ ɔmaa ninyɛne ɛhye mɔ; bɛmaa ɔnwu Awulae ye ɛhulolɛ kpundii ne bolɛ mɔɔ ɔsonle a.Biblica, Inc.