Edwɛndolɛ103
Tumi mɔɔ bɛnyia ye bɛava bɛayila Awulae la
1O, me ɛkɛla ye Awulae ayɛlɛ! Me sonlabaka ne kpokpoti kanvo ye duma nwuanzanwuanza ne!2O me ɛkɛla, ye Nana Nyamenle ayɛlɛ; mmamaa ɛ rɛle fi ye nyele ɛwolaa ne.3Yemɔ yɛɛ ɔfa me ɛtane kpokpoti ɔkyɛ me, na ɔyɛ me ewule kpokpoti ayile a.4Yemɔ yɛɛ ɔye me ɔfi ewule kuma nu, na ɔfa ye ɛhulolɛ kpundii ne nee ye anwunvɔnezelɛ ne ɔyila me a.5Ɔmaa menyia ninyɛne kpalɛ mɔɔ me ngoane hyia nwolɛ la, amaa meanyia anwosesebɛ fofolɛ kɛ kɔleɛ ɛdeɛ ne la.6Nana Nyamenle bua tenlene ndɛne, na ɔdi ɔmaa bɛdabɛ mɔɔ bɛsisi bɛ la.7Ɔlale ye ngyehyɛleɛ ne mɔ ali ɔhilele Mosisi, na ɔmaanle Yisilayɛma nwunle ye nwanwane nyɛleɛ ne mɔ.8Nana Nyamenle se anwunvɔne na ɔda ye nyele ali; ɔkyɛ na yeava ɛya, na ye ɛhulolɛ kpundii ne yi bulubulu zolɛ.9Ɔngɔ zo ɔndea dahuu; yɛɛ ɔmmaa ye ɛya ɛndɛnla ɛkɛ ne mekɛ mɔɔ ɔnlɛ awieleɛ;10Ɔ nee yɛ ɛnli ye kɛmɔ yɛ ɛtane ne mɔ si de la, yɛɛ ɔndea yɛ kɛmɔ ɔfɛta yɛ nvonleɛ ne mɔ la.11Kɛmɔ anwuma maanle ne ɔ nee azɛlɛ ye azo bɛ avinli te la, zɔhane ala yɛɛ ye ɛhulolɛ kpundii ne wɔ ɛkɛ ne maa bɛdabɛ mɔɔ bɛsulo ye, na bɛbu ye la a.12Kɛmɔ aduduleɛ nee adɔleɛ bɛ avinli wale la, zɔhane ala yɛɛ Awulae ɛmaa yɛ nee ɛtane avinli ɛwa a.13Kɛmɔ selɛ se ɔ ra anwunvɔne la, zɔhane ala yɛɛ Nana Nyamenle se bɛdabɛ mɔɔ bɛdi ye eni la anwunvɔne a.14Ɔze kɛ bɛzile bɛbɔle yɛ la; ɔ rɛle ɛnvi kɛ yɛle ɛva nee nzonle.15Sonla ɛdeɛ, yɛ ngoane le kɛ ndile, yɛnyi ndɛndɛ zo kɛ ɛbɔ nu ndotolo la,16na akee anwoma bɔ fa zo; na ɔngyɛ, ɛnee yɛminli minlimɛnla, ɔ bo zo amra ɛngakye ye bieko.17Na emomu Nana Nyamenle ɛhulolɛ kpundii ne, wɔ ɛkɛ mekɛ mɔɔ ɔnlɛ awieleɛ maa bɛdabɛ mɔɔ bɛwula ye anyunlunyia la; na ye tenleneyɛlɛ ne tenrɛ kɔdwu bɛ mra nee bɛ mra anwo zo,18wɔ bɛdabɛ mɔɔ bɛdi ye ɛwɔkɛ ne azo na bɛkakye kɛ bɛkɛli ye mɛla ne mɔ azo la.19Nana Nyamenle ɛzie ye belemgbunli ebia ne wɔ anwuma maanle ne anu; ɔle belemgbunli wɔ abɔdeɛ biala anwo zo.20Bɛye Nana Nyamenle ayɛlɛ, bɛmɛ anwumabɔvolɛma amuala, bɛmɛ tumivolɛma mɔɔ bɛdi ye mɛla zo, na bɛtie ye edwɛkɛ biala mɔɔ ɔkɛha la.21Bɛhanvo Nana Nyamenle, bɛmɛ anwuma maanle nu tumi kpokpoti, bɛmɛ mɔɔ bɛle ye sonvolɛma, mɔɔ bɛyɛ ye ɛhulolɛdeɛ la!22Bɛyila Nana Nyamenle, bɛmɛ mɔɔ bɛle ye abɔndeɛ wɔ ɛleka biala mɔɔ ye tumi ne wɔ la. Me ɛkɛla, ye Awulae ayɛlɛ!Biblica, Inc.