ZEKARIA6
Zekaria okworekwa ebigaari bina, ekirunga n'Eitaagi
1Kandi naagaruka naimutsya amaisho; ku naagire kugira nti, naareeba ebigaari bina nibiruga ahagati y'enshozi ibiri; ezo nshozi zikaba ziri ez'emiringa.2Ekigaari ky'okubanza kikaba nikikururwa embaraasi zirikutukura, ekya kabiri nikikururwa ezirikwiragura;3ekya kashatu nikikururwa ezirikwera, kandi ekya kana nikikururwa ez'ebihuura by'obugondo.4Bwanyima naabuuza maraika owaabaire naagamba naanye nti: Ebi niki, Mukama wangye?5Maraika yangarukamu ati: Ebi nibiija kushohora kuza ei emiyaga ena y'omu iguru ereetwa, byaheza kweyoreka omu maisho ga MUKAMA ow'ensi yoona.6Ekigaari ekirikukururwa embaraasi ezirikwiragura nizigyenda nizitoora omu nsi y'obukiizi-bwa-bumosho; ezirikwera nizitoora omu nsi y'oburengyerwa-izooba, ez'ebihuura by'obugondo nizitoora omu nsi y'obukiizi-bwa-buryo.7Ezo mbaraasi ku zaashohoire, zaagira obwira bw'okwenda kugyenda hoona, nizeetegyereza ensi. Yaagira ati: Nimwirooko mugyendagyende omu nsi, mugyetegyereze. Zityo zaagyenda nizeetegyereza ensi.8Bwanyima yangambira n'eiraka rihango ati: Reeba, ziriya ezirikuza omu nsi y'obukiizi-bwa-bumosho ziikaikaniise ekiniga kyangye eki nyiniire ab'omuri egyo nsi.9Bwanyima ekigambo kya MUKAMA kyanyijaho nikigira kiti:10Iha omu baatwairwe omu bukwatwa Heludai, Tobiya na Yedaaya abarugire Babulooni, oze omwa Yosia mwene Zefania eri izooba.11Obaakye efeeza n'ezaabu, obiheeshemu ekirunga, okite aha mutwe gwa Yoshua mwene Yehozadaaki omunyamurwa omukuru,12omugire oti: Oku nikwo MUKAMA ow'amahe arikugamba naagira ati: Reeba, omuntu orikwetwa Itaagi; ahabw'okuba aryakurira gye omu mwanya gwe, kandi aryayombeka hekalu ya MUKAMA.13Niwe aryombeka hekalu ya MUKAMA, akagira ekitiinisa ky'obugabe, akashutama aha kitebe ky'obugabe, akategyeka. Kandi aha rubaju rw'ekitebe kye ky'obugabe haryabaho omunyamurwa, bombi bagire okumanyana kw'obusingye ahagati yaabo.14Ekyo kirunga kiryaguma omuri hekalu ya MUKAMA, kubeera Heludai, Tobiya, Yedaaya na Yosia mwene Zefania ekiijutsyo.15Bwanyima abariba bari hare baryaija, bahwere omu by'okwombeka hekalu ya MUKAMA; haza obwo muryamanya ku MUKAMA ow'amahe niwe abantumireho. Kandi ku murita omutima aha kworobera eiraka rya MUKAMA Ruhanga waanyu, ebyo biryabaho.Bible Society of Uganda