OKUSHUURUURWA1
1Ebyashuurwirwe Yesu Kristo, ebi Ruhanga yaamuhaire kworeka abahuuku be ebyabaire nibyenda kubaho juba, nawe akatuma maraika we kubimanyisa omuhuuku we Yohaana,2owaahamize ebi yaareebire byona eby'ekigambo kya Ruhanga n'eby'okuhamya oku Yesu Kristo yaahamize.3Orikushoma ebigambo by'obunabi obu aine omugisha, kandi baine omugisha abarikubihurira, bakata omutima aha bihandiikirwemu; ahabw'okuba obunaku buri haihi.
Okweyoreka kwa Yesu ahari Yohaana
4Nyowe Yohaana naabahandiikira imwe amakanisa mushanju ag'omuri Asia; nimbendeza embabazi n'obusingye ebirikuruga ahari Ogwo oriho, kandi owaabaire ariho, kandi oribaho, kandi ebirikuruga aha myoyo mushanju eri omu maisho g'ekitebe kye eky'obukama,5kandi ebirikuruga ahari Yesu Kristo kareebi omwesigwa, omujigaijo omu kuzooka, kandi omutegyeki w'abagabe b'ensi. Ogwo otukunda, kandi owaatukomoroire omu bibi byaitu n'eshagama ye,6akatuhindura obukama n'abanyamurwa ahari Ruhanga we kandi Ishe, aheebwe ekitiinisa n'obutegyeki ebiro byona. Amiina.7Reeba, naija n'ebicu, kandi eriisho ryona riryamureeba, n'abo abaamucumitsire; n'enganda zoona ez'omu nsi ziryaborooga ahabw'okwija kwe. Eego, Amiina.8Niinye Alufa na Omega; nikwo Mukama Ruhanga arikugira, oriho, kandi owaabaire ariho, kandi oribaho, Ow'obushoboorozi bwona.9Nyowe Yohaana mwene waanyu, okwataniise naimwe omuri Yesu omu busaasi n'omu bukama n'omu kugumisiriza, nkaba ndi aha kirwa Patumo, ntuzirwe ekigambo kya Ruhanga n'okuhamya ebya Yesu.10Aha izooba rya Mukama nkaba ndi omu Mwoyo, naahurira eiraka rihango nk'ery'enzamba enyima yangye,11nirigira riti: Ebi oraareebe obihandiikye omu kitabo, okyoherereze amakanisa aga mushanju, eya Efeso, Sumuruna, Perugamo, Suatira, Saadi, Filudelafia na Laodikea.12Ahonaaho naahinduka kureeba owaabaire naagamba naanye; ku naahindukire, naareeba ebikondo by'etabaaza mushanju eby'ezaabu,13kandi ahagati y'ebyo bikondo hakaba hariho Orikushusha Omwana w'omuntu, ojwaire ekijwaro ekihikire aha bigyere, kandi ayezirikire orukoba rw'ezaabu omu kifuba;14omutwe gwe n'eishokye rye bikaba nibyera nk'ebyoya by'entaama, nibyerera kimwe nk'orubaare; amaisho ge gakaba gari nk'endimi z'omuriro,15ebigyere bye bikaba nibyengyengyeta nk'omuringa ogushemereziibwe omu iziiko, kandi eiraka rye rikaba nirihoorera nk'amaizi maingi;16omu mukono gwe gwa buryo akwaitsemu enyonyoozi mushanju, omu kanwa ke haarugamu rurara ey'amoogi abiri, kandi ahamaisho ge hakaba nihamurinkana nk'eizooba eririkujwisa amaani.17Ku naamureebire, naagwa aha bigyere bye nk'ofiire. Kwonka yantaho omukono gwe gwa buryo naagira ati: Otatiina; niinye w'okubanza kandi ow'aha muheru, mbwenu ohuriire.18Nkaba nfiire, mbwenu ndi ohuriire ebiro byona; kandi nyine ebishumuruzo bya Rufu n'Okuzimu.19Mbwenu handiika ebi waareeba, ebiriho kandi ebiribaho bwanyima.20Amakuru g'enyonyoozi mushanju ezi waareeba omu mukono gwangye gwa buryo, kandi n'ebikondo by'etabaaza mushanju eby'ezaabu, ezo nyonyoozi mushanju nibo baamaraika b'ago makanisa mushanju, kandi ebyo bikondo by'etabaaza mushanju nigo makanisa mushanju.Bible Society of Uganda