ZAABURI80
Okushaba Ruhanga okusaasira abantu be n'okubagarura busya
Aha Mukuru w'abeeshongozi, omu iraka eririkwetwa Emyangangye. Zaaburi y'ebi Asafu yaahamize
1Tega okutu, Iwe Omuriisa wa Israeli,Oyebembera Yosefu nk'obusyo!Iwe oshutama aha kitebe ahagati ya baakerubi, jwisa omushana gwawe!2Omu maisho ga Efuraimu, Benyamiini na ManaaseSisiimura amaani gaawe, oije otujune!3Otugarure aha buteeka, ai Ruhanga,Otwakize amaisho gaawe, tubone kujunwa!4Ai MUKAMA Ruhanga ow'amahe,Oryahitsya hi okugwerwa kubi okushaba kw'abantu baawe?5Obagaburiire okurira nk'eby'okurya,Waabanywaisa amarira maingi munonga.6Otuhindwire eki bataahi baitu barikurwanira;Abazigu baitu nibeeshekyera.7Ai Ruhanga ow'amahe, otugarure aha buteeka;Otwakize amaisho gaawe, tubone kujunwa.8Okaiha omuzaabibu omuri Misri,Waabinga amahanga, waagubyara.9Waaguhingirira, gwahitsya emizi okuzimu,Gwabuga ensi.10Gwarandira aha bibungo byona,N'amataagi gaagwo gaashweka emyereezi mihango;11Gwanaga amataagi, gaahika aha Nyanja,Gwazaara abaana, baahika aha Mugyera mukuru.12Mbwenu ahabw'enki osheenyire orugo rwagwo,Ngu abahinguzi boona bagucweho?13Engiri z'omu ihamba nizigushiisha,Enyamaishwa z'omu ishwa nizigwona.14Ai Ruhanga ow'amahe, nitukweshengyereza otugarure aha buteeka,Oyeme omu iguru, oreebe oyetegyereze,Ote omutima ahari ogu muzaabibu,15Ekitsintsi kyawe eki waayebyariire,Kandi eitaagi eri waayehamiize.16Bagwokize n'omuriro, baagutema.Nkaahenwa ki bahwerekyerezibwa okuhana kw'ekitsyori kyawe!17Kwonka omukono gwawe gugume aha muntu waawe empika,Aha mwana w'omuntu ou waahaire amaani kukugasira.18Mbwenu obwo naitwe titurigaruka enyima, tukakutsigaho;Otuhe amagara, tugume tutakire eiziina ryawe!19Ai MUKAMA Ruhanga ow'amahe, otugarure aha buteeka,Otwakize amaisho gaawe, tubone kujunwa!Bible Society of Uganda