ZAABURI147
Okusiima Ruhanga ahabw'amaani ge n'ebirungi ebi yaakoreire Abaisraeli
1Haleluya!Ahakuba ni kirungi okweshongorera Ruhanga waitu eby'okuhimbisa;Ahabw'okuba n'ow'embabazi, kandi okuhimbisa kuhikire.2MUKAMA ayombeka busya Yerusaalemu,Ataruura Abaisraeli abaabingirwe.3Akiza ab'emitima ehendekire,Ashemba obuhuta bwabo.4Amanya obwingi bw'enyonyoozi,Zoona azeeta amaziina gaazo5MUKAMA waitu ni mukuru, kandi n'ow'obushoboorozi bwingi;Okwetegyereza kwe kurengire orugyero.6MUKAMA akwatirira abacureezi;Kwonka ababi abanagira kimwe ahansi.7Mweshongorere MUKAMA n'okusiima;Mweshongorere Ruhanga waitu n'enanga!8Niwe ashweka eiguru ebicu, akateekateekyera ensi enjura,Kandi akameza obunyaatsi aha migongo.9Aha enyamaishwa eby'okurya byazo,Kandi ariisa abaana b'ebikoona abarikwaniira.10Tayesiimira maani g'embaraasi,N'amaguru g'omuntu tigo ashemerererwa,11Kureka MUKAMA ashemerererwa abarikumutiina,Bakeesiga embabazi ze ezitahinduka.12Iwe Yerusaalemu, himbisa MUKAMA!Naiwe Saayuuni, himbisa Ruhanga waawe!13Ahakuba akagumya empimbi z'amarembo gaawe;N'abaana baawe abari omuriiwe yaabaha omugisha.14Areeta obusingye omunda y'emyatano yaawe;Akwijuza engano nungi munonga.15Atweka ekiragiro kye ahansi;Ekigambo kye kiirukanga munonga.16Agwisa ebirika nk'ebyoya;Amaamagiza ekime ky'embeho nk'eiju.17Anaga orubaare rwe nk'oburagarika.N'oha owaakubaasa kwemera embeho ye?18Atweka ekigambo kye, abiyazya;Ahuuhisa omuyaga gwe, amaizi gagyenda.19Amanyisa Yakobo ekigambo kye,Na Israeli amumanyisa ebiragiro bye n'emicwere ye.20Tihariho ihanga erindi ryona eri aragizire atyo;Kandi n'emicwere ye tibakagimanyaga.Haleluya!Bible Society of Uganda