Read YEREMIA 32

YEREMIA32

Yeremia okuragiirwa okugura omusiri Anatoosi

¹Omu mwaka gwa ikumi ogw'omu bisingye bwa Zedekia omugabe wa Yuda, nigwo mwaka gwa ikumi na munaana gwa Nebukadeneeza, ekigambo kikaruga ahari MUKAMA, kyaija ahari Yeremia.²Omu bunaku obwo eihe ry'omugabe wa Babulooni rikaba rigootsire Yerusaalemu, kandi nabi Yeremia akaba akomeirwe omu kibuga ky'abarinzi ekiri omu kikaari ky'omugabe wa Yuda.³Ahakuba Zedekia omugabe wa Yuda akaba amutaire omu kihome, naamugira ati: Ahabw'enki noohanuura, okagira oti: Oku nikwo MUKAMA arikugamba naagira ati: Reeba, oru rurembo niinyija kuruhayo omu mikono y'omugabe wa Babulooni, arukwate;⁴na Zedekia omugabe wa Yuda tarikira Bakaludaaya, kureka buzimazima aryaheebwayo omu mikono y'omugabe wa Babulooni, bagambe hamwe nibareebana;⁵bwanyima aryatwara Zedekia Babulooni; okwo niyo ariguma okuhitsya obu ndimutaayaayira; nikwo MUKAMA arikugira. N'obu murirwanisa Abakaludaaya, timuribabaasa.

⁶Yeremia yaagira ati: Ekigambo kya MUKAMA kiinyizireho nikigira kiti:⁷Reeba, Hanameeli, mwene Shalumu shwento, naija kukwijaho akugire ati: Gura ekibanja kyangye ekiri Anatoosi; ahabw'okuba niiwe oine obushoboorozi bw'okukicungura, okakigura.⁸Bwanyima Hanameeli mwene tatento yanshanga omu kibuga ky'abarinzi, nk'oku ekigambo kya MUKAMA kyabaire kiri, yangira ati: Ninkweshengyereza, gura ekibanja kyangye ekiri Anatoosi omu ishaza rya Benyamiini; ahabw'okuba niiwe oine obushoboorozi bw'okukihungura n'okukicungura; mbwenu okyegurire. Ntyo naamanyira aho ku ekyo kigambo kirugire ahari MUKAMA.

⁹Bwanyima naagura ekyo kibanja ekyabaire kiri Anatoosi ahari Hanameeli mwene tatento, naamupimira obuguzi bwakyo, shekeli z'efeeza ikumi na mushanju.¹⁰Naata omukono aha ndagaano, naagitaho akamanyiso, naareeta baakareebi, naapima efeeza aha minzaani.¹¹Bwanyima naatwara endagaano y'okugura etairweho akamanyiso, hamwe na kopi yaayo etakubire, nk'ebiragiro n'emigyenzo byabyo oku byabaire biri;¹²egyo ndagaano naagiheera Baruki mwene Neria, mwijukuru wa Maaseya, omu maisho ga Hanameeli mwene tatento, n'omu maisho ga baakareebi abataire emikono aha ndagaano, kandi n'omu maisho g'Abayudaaya boona abaabaire bashutami omu kibuga ky'abarinzi.¹³Naayehanangiririza Baruki omu maisho gaabo nti:¹⁴Oku nikwo MUKAMA ow'amahe, Ruhanga wa Israeli, arikugamba naagira ati: Twara ezi ndagaano z'okugura, egi etairweho akamanyiso n'etakubire, ozite omu nyungu y'eibumba, zibone kumara ebiro bingi.¹⁵Ahabw'okuba oku nikwo MUKAMA ow'amahe, Ruhanga wa Israeli, arikugamba naagira ati: Amaju n'emisiri n'emisiri y'emizaabibu, biryagaruka bigurwe omu nsi egi.

¹⁶Ku naaherize kuha Baruki mwene Neria egyo ndagaano y'okugura, naashaba MUKAMA ningira nti:¹⁷Ai Mukama RUHANGA, niiwe waahangiise eiguru n'ensi obushoboorozi bwawe n'omukono gwawe ogugoroire. Tihariho kintu na kimwe ekikurema.¹⁸Iwe ogirira embabazi abantu enkumi n'enkumi. Kwonka ohoora abaana noobatura ebibi bya baishenkurubo. Ori Ruhanga omukuru; MUKAMA ow'amahe niryo iziina ryawe.¹⁹Ori rugambwa omu naama, kandi omu kukora ori ow'amaani; amaisho gaawe gareeba emitwarize y'abantu yoona, noozimuurira buri muntu nk'emitwarize ye n'ebirugire omu bi akozire oku biri.²⁰Niiwe waayorekire obumanyiso n'eby'okutangaaza omu nsi ya Misri, okaguma noobyoreka omu Baisraeli n'omu bantu boona n'okuhitysa hati, kandi okeetungira eiziina, nk'oku kiri hati.²¹Okaiha abantu baawe Abaisraeli omuri Misri, waabaihisayo obumanyiso n'eby'okutangaaza n'omukono gw'amaani ogubangire n'okutiinisa kwingi;²²waabaha ensi egi, ei waarahiire kuha baishenkurubo, ensi y'amate n'obwoki,²³baagizamu, baagikubuura; kwonka tibaayorobera iraka ryawe, n'obu kwakuba okugyendera omu biragiro byawe; tibaagira kintu na kimwe eki baakora omu bi waabaragiire byona. Nikyo waabareeteireho akabi aka koona.²⁴Reeba eby'okutemberaho bigootsire orurembo; baahikire aha rurembo kurukwata; kandi orurembo ruhairweyo omu mikono y'Abakaludaaya, abarikururwanisa, ahabwa rurara n'enjara n'orufu. Ebi waagambire byona bihikiriire; naiwe nookireeba.²⁵Kwonka ai Mukama RUHANGA, n'obu orurembo ruraabe ruhairweyo omu mikono y'Abakaludaaya, ongizire oti: Gura ekyo kibanja n'efeeza, kandi ogire baakareebi.

²⁶Bwanyima ekigambo kya MUKAMA kyagaruka kyaija ahari Yeremia nikigira kiti:²⁷Reeba, ndi MUKAMA, Ruhanga w'ebiine omubiri byona; hariho ekirikundema?²⁸N'ahabw'ekyo, oku nikwo MUKAMA arikugamba naagira ati: Reeba, naaza kuhayo oru rurembo omu mikono y'Abakaludaaya n'omu mikono ya Nebukadeneeza omugabe wa Babulooni, arukwate.²⁹Abakaludaaya abarikururwanisa nibaija kwija, barutwekyemu omuriro, barwotsye, hamwe n'amaju agu batuura nibootererera aha mitwe yaago Baali obubaane, bakashukiriraho baaruhanga abandi empongano z'eby'okunywa, kungwisa kubi.³⁰Ahakuba Abaisraeli n'Abayuda, okwiha omu buto bwabo, tibaine kindi eki barakozire omu maisho gangye kureka ebibi byonka; kandi Abaisraeli tibaine kindi eki barakozire kureka okungwisa kubi n'ebi bakora; nikwo MUKAMA arikugira.³¹Oru rurembo rukanyitsa ekiniga, rwangwisa kubi, okwiha aha izooba eri rwayombekyeirweho n'okuhitsya hati; n'ahabw'ekyo niinyija kurwiha omu maisho gangye,³²nintura Abaisraeli n'Abayuda ebibi byona ebi baakozire kungwisa kubi, abagabe baabo, abanyiginya baabo, abanyamurwa baabo, baanabi baabo, abantu ba Yuda n'abatuuzi ba Yerusaalemu.³³Omu mwanya gw'okuntaho amaisho bakanteera omugongo; kandi n'obu ndaabe ntuura nimbegyesa, tibakategaga matu kuhurira okwegyesibwa.³⁴Bakata ebirikunugwa byabo omu nju erikwetererwa eiziina ryangye kugihagara.³⁵Bakombekyera Baali emyanya mikuru y'okuramizamu omu ruhanga rwa mwene Hinoomu, kuhongyererayo Moleki abaana baabo b'aboojo n'ab'abaishiki, eki ntarabaragiire, kandi ekitakaijaga mu biteekateeko byangye, ngu bakore ekirikunugwa ekyo okusiisisa Yuda.

Yeremia okuhanuura aha ndagaano nsya n'embabazi za Ruhanga

³⁶N'ahabw'ekyo oku nikwo MUKAMA, Ruhanga wa Israeli, arikugamba ahari oru rurembo oru orikugira ngu ruhairweyo omu mikono y'omugabe wa Babulooni kwitwa rurara, enjara n'orufu,³⁷naagira ati: Reeba, ndyabataaruura, mbaihe omu nsi zoona ezi naababingiiremu, ngwirwe kubi, nyine ekiniga, kandi nyine ekiniga kingi, mbagarure omuri ogu mwanya, mbatuuzemu buhooro.³⁸Kandi baryaba abantu bangye, naanye mbe Ruhanga waabo.³⁹Ndyabaha omutima gumwe n'emitwarize emwe, babone kuntiina ebiro byona, babe gye, bo n'abaana baabo abarikurataho.⁴⁰Ndyaragaana nabo endagaano etarihwaho, ku ntarireka kubakorera gye, kandi ndyata okuntiina omu mitima yaabo, ngu barekye kundugaho.⁴¹Ndyashemerererwa okubakora gye, mbabyare omuri egi nsi omu mazima n'omutima gwangye gwona n'amagara gangye goona.

⁴²Ahakuba oku nikwo MUKAMA arikugamba naagira ati: Nk'oku naareetsire ako kabi kahango koona ahari aba bantu, nikwo ndibareetaho ntyo ebirungi byona ebi ndikubaraganisa.⁴³Bwanyima egi nsi, ei murikugirangu n'amatongo, etarimu bantu nari amatungo, kureka ehairweyo omu mikono y'Abakaludaaya, niyo muriguramu ebibanja.⁴⁴Abantu baryagura ebibanja n'empiiha, bahandiikye endagaano z'okugura, baziteho emikono n'akamanyiso kandi zigire na baakareebi, omu ishaza rya Benyamiini, omu myanya eyehinguririize Yerusaalemu, omu ndembo za Yuda, omu ndembo z'omu nsi y'ebibungo, omu z'omu mpita n'omu ndembo z'omuri Negebu; ahabw'okuba ndyagarura abantu baabo abaatwairwe omu bukwatwa.

Bible Society of Uganda

https://app.library.bible/content/9bf4c154bb6029f7