EZERA1
Omugabe Kuuro okuragiira kwombeka hekalu
1Omu mwaka gw'okubanza ogw'omu busingye bwa Kuuro omugabe wa Perisi, MUKAMA akakora aha mutima gwa Kuuro ogwo, ngu ekigambo kye ekyagambirwe Yeremia kihikiirire, yaaragiira kuranga ebigambo ebi omu bugabe bwe bwona, kandi n'okubihandiika, naagira ati:2Oku nikwo Kuuro omugabe wa Perisi arikugamba naagira ati: MUKAMA, Ruhanga w'eiguru, ampaire obugabe bwona obw'omu nsi, kandi anyehanangiriize kumwombekyera enju omuri Yerusaalemu ey'omuri Yuda.3Mbwenu omuntu weena omuriimwe ow'omu bantu be, Ruhanga we agume nawe, ainamukye Yerusaalemu ey'omuri Yuda, ayombekye enju ya MUKAMA, Ruhanga wa Israeli, (niwe Ruhanga otuura omuri Yerusaalemu),4kandi omuntu weena owaahonokireho, ori ei yaashuhuukiire, abantu baayo bamuhwere n'efeeza n'ezaabu, kandi n'ebintu n'amatungo, otabariireho mitoijo ahabw'enju ya Ruhanga ey'omuri Yerusaalemu, ei barikureeta n'omutima gwekundiire.5Ahonaaho abakuru b'amaju ga baishenkuru b'Abayuda n'ab'Ababenyamiini baimuka n'abanyamurwa n'Abaleevi, hamwe n'abandi boona, abu Ruhanga yaakozire aha mutima kwinamuka kuza kwombeka enju ya MUKAMA ey'omuri Yerusaalemu;6kandi abaabaire batwire nabo baabatwera ebintu by'efeeza, n'ezaabu n'ebindi bintu n'amatungo, n'ebintu by'obuguzi bwingi, otabariireho ebindi byona ebi baatoizire n'omutima gwekundiire.7Kandi omugabe Kuuro yaashohoza ebintu by'enju ya MUKAMA, ebi Nebukadeneeza yaabaire anyagire Yerusaalemu, akata omu nju ya baaruhanga be.8Kuuro omugabe wa Perisi yaaragiira Misiredaasi omubiiki kubiihamu, akabibarira Sheshebazaari omunyiginya wa Yuda.9Kandi ogu nigwo mubaro gwabyo: eshohaani z'ezaabu makumi ashatu, n'ez'efeeza rukumi, ebyoterero makumi abiri na mwenda,10enyabya z'ezaabu makumi ashatu, n'ez'efeeza enkumi ibiri na magana ana na ikumi, n'ebindi bintu ebirikukoresibwa rukumi;11ebintu byona eby'ezaabu n'efeeza bikaba biri enkumi itaano na magana ana na makumi mukaaga na mwenda. Ebyo byona Sheshebazaari akabiinamukana, obu enkwatwa zaihwa Babulooni kugarurwa Yerusaalemu.Bible Society of Uganda