EBYAKOZIRWE4
Okukwatwa kwa Petero na Yohaana
1Ku baabaire nibakigamba n'abantu, baayecura abanyamurwa n'omurinzi omukuru wa hekalu n'Abasadukaayo,2babagwereirwe kubi, ahabw'okwegyesa abantu, nibabagambira ngu omuri Yesu nimwo okuzooka omu bafu kubonekyeire.3Baabakwata, baabata omu kihome okuhitsya omu kasheeshe, ahakuba bukaba buri omu mwabazyo.4Kwonka baingi ahari abo abaahuriire ekigambo ekyo bakaikiriza; n'omubaro gw'abashaija gwayeyongyera, gwahika nk'enkumi itaano.5Ku bwaseesire, abategyeki baabo n'abakuru b'abantu n'abahandiiki baateeranira Yerusaalemu,6na Aana omunyamurwa omukuru na Kayaafa na Yohaana na Alegizanda, n'abandi boona ab'omuryango gw'omunyamurwa omukuru.7Ku baaherize kubeemereza ahagati, baababuuza bati: Ni bushoboorozi ki, nari n'iziina ki, ebyabakoresa eki?8Petero, aijwire Omwoyo Orikwera, yaabagarukamu ati: Imwe abategyeki b'abantu n'abakuru,9ku turaabe nitubuuzibwa hati ahabw'ekirungi eki tukoreire omuntu ogwo ekirema, n'ekimukirize,10imwe mwena n'abantu boona Abaisraeli mumanye ngu omu iziina rya Yesu Kristo owa Nazareesi, ou mwabambire aha musharaba, kandi ou Ruhanga yaazoire omu bafu, ahabw'Ogwo omushaija ogu ayemereire omu maisho gaanyu akizire.11Yesu ogwo niwe ibaare imwe abombeki eri mwayangire, eryahindukire obuhamizo bw'enju.12Kandi tihariho ondiijo ou twakuboneramu okujunwa, ahakuba tihariho rindi iziina ahansi y'eiguru eryahairwe abantu, erishemereire kutujuna.Abakuru okurekura entumwa
13Ku baareebire obumanzi bwa Petero na Yohaana, haza nibamanya ku bari abantu babisi abateegyesiibwe, baatangaara; bwanyima baijuka ku baabaire batuura na Yesu.14Kandi ku baareebire omushaija ogwo okizire ayemereire hamwe nabo, baabura oku baraabahakanise.15Ku baaherize kubaragiira kushohora aheeru y'eishengyero, baahanuura bonka,16nibagira bati: Abashaija aba tubagire tuta? Abantu boona abatwire Yerusaalemu nibamanya ku bakozire eky'okutangaaza ekirangainwe, kandi naitwe titurikubaasa kukyehakana.17Mbwenu okukizibira kubuga omu bantu, murekye tubakangise, okuruga hati batagira omuntu ou baagaruka kugambira omu iziina eryo.18Nikwo kubeeta, bakabeehanangiriza kutagaruka kuteeza n'obu kwakuba okwegyesa omu iziina rya Yesu.19Kwonka Petero na Yohaana baagarukamu, nibabagira bati: Ku kiraabe kihikire omu maisho ga Ruhanga kuhurira imwe okukira Ruhanga, naimwe mukireebe;20kwonka itwe titurikubaasa kuhunama kutagamba ebi twareebire, n'ebi twahuriire.21Ku baaherize kugaruka kubakangisa, baabarekura, ahabw'okuba bakabura oku baraabahane ahabw'okutiina abantu; ahakuba boona bakaba nibahimbisa Ruhanga ahabw'ekyo ekikozirwe.22Kandi omushaija ogwo, owaakoreirwe eky'okutangaaza ekyo eky'okukizibwa, akaba ahingwize emyaka makumi ana.Ekanisa okushaba Ruhanga obumanzi
23Ku baarekwirwe, baagyenda baashanga bagyenzi baabo, baabatekyerereza byona ebi abanyamurwa abakuru n'abakuru b'abantu baabagambira.24Ku baabihuriire, baimutsya amaraka gaabo ahari Ruhanga n'omutima gumwe, nibagira bati: Mukama waitu, niiwe owaahangire eiguru n'ensi n'enyanja n'ebirimu byona;25kandi okagambira omu kanwa ka tatenkuriitwe Daudi, omugaragwa waawe, naagambisibwa Omwoyo Orikwera ati:N'enki ekyajagaraize Abanyamahanga,N'amahanga nigateekateekyera ki ebitaine mugasho?26Abagabe b'ensi bakatenga orugamba,N'abategyeki bakeeteerana hamweKurwanisa Mukama na Kristo we.27N'eky'amazima omu rurembo oru Heroode na Pontio Pilaato hamwe n'abanyamahanga n'enganda za Israeli bakeeteerana kurwanisa Omuheereza waawe orikwera Yesu, ou waashukireho amajuta,28ngu bahikiirize ebi waamaririire ira omu bwengye bwawe kukora n'omukono gwawe.29Hati mbwenu, Mukama waitu, reeba okukangisa kwabo, obaasise abahuuku baawe kugamba ekigambo kyawe n'obumanzi bwona,30iwe ogoroire omukono gwawe kukiza, haza obumanyiso n'eby'okutangaaza bikorwe omu iziina ry'Omuheereza waawe orikwera Yesu.31Ku baaherize kushaba, omwanya ogu baabaire bateeraniiremu gwatengyeta; boona baijura Omwoyo Orikwera, baagamba ekigambo kya Ruhanga n'obumanzi.Obumwe bw'abaikiriize ab'okubanza
32Abo boona abaikiriize bakaba baine omutima gumwe n'enaama emwe; omuribo tihariho owaabaire aine obunyakantu aha bintu bye, bakaba nibakwatirana omu bintu byabo byona.33Kandi entumwa zikagira amaani maingi g'okuhamya okuzooka kwa Mukama waitu Yesu; n'embabazi nyingi zaabagumaho boona.34Omuribo tihaine owaabaire aine eki akyenire, ahabw'okuba abaabaire baine ebibanja nari amaju bakabitunda, baareeta empiiha ezaabirugiremu,35baazita aha bigyere by'entumwa; baazibabaganisiza nk'okwetenga kwa buri muntu oku kwabaire kuri.36Na Yosefu, ou entumwa zaayetsire Barunaba, amakuru ngu, Omwana w'Okwezirikisa, Omuleevi enzaarwa ya Kupuro,37akaba aine omusiri, yaagutunda, yaareeta empiiha, yaazita aha bigyere by'entumwa.Bible Society of Uganda