Mbu'ki'6

1Yav'aga v'antu' aho v'alamulaga kwingi'ha na ku'sambala mu welelo, na v'ana v'a ki'ki'ma v'av'yalagwa ku' wav'o.2V'atundwa v'a ki'loho v'a Mulungu v'av'awonaga v'enav'o v'aniki' v'a v'antu' ku'v'a v'ali' v'asoga, na v'isogolelaga v'aki'ma ki'ti' i'vi v'atogilwe na ku'v'atoola.
3Haho Gu'ku' Mulungu wayombaga, “Myu'ye yanne ya wu'panga yi'kakowola kwikala mu muntu' nhananhana ku'nguno mweni'ki'li' ali' wa ku'fwa, na wikalo wakwe mu welelo wu'ku'v'a myaka igana li'mo na maku'mi av'i'li' du'.”4Mu nsiku' zyeni'zyo na zya ha mbele, gav'age gali'ho mantu' mu welelo ago gav'age mav'yalwa ga v'atundwa v'a ki'loho ago ndi' galala na v'aniki' v'a v'antu'. Genago hu' gav'age mantu' makowozi ago gitanagwe Manefili, mantu' genago gav'age makumalu'ku mu itungo lya nsiku' zyeni'zyo zya kale.
5Gu'ku' Mulungu wawonaga ku'v'a wu'kenagu'zi wa v'antu' wu'li' wu'hanya mu welelo, na ki'la ndaka ya miganiko ga v'antu' nsiku' zyose gav'aga ga wu'kenagu'zi du'.6Gu'ku' Mulungu wasayaga ku'v'atunda v'antu' mu welelo, na moyo gwakwe gwav'aga na wu'satu.7Haho Gu'ku' Mulungu wayombaga, “Nku'v'azimangu'zya v'antu' v'ose mu welelo av'o nav'atundile, haki'mo na ndimu zyose na vitundwa vingi' vya ku'yu'mba ha igu'lya na nsi', na nnoni zyose. Ku'nguno nu'saya ku'vitunda.”8Sumbwa Nowa wapandi'kaga wu'soga ha mbele yamwa Gu'ku' Mulungu.
9I'yi' hu' mmola yamwa Nowa na wu'v'yalwa wakwe. Mwenu'yu' wav'age muntu' mugololoku ku' Mulungu na wa lole mugati' na v'antu' v'a ha itungo lyakwe, hangi' mugati' na kwikala kwakwe wav'age ali' bi'hi' na Mulungu.10Nowa wav'age na v'ana v'adatu' v'a ki'gosya: Shemu, Hamu na Yafeti.11Ha itungo lyeni'lo Mulungu wayi'wonaga welelo ku'v'a yav'ipaga na kokala wu'kandi,12ku'nguno yi'li' nhana ki'la yu'mo wav'ipyaga nzi'la yakwe mu welelo.
13Mulungu wamuwi'laga Nowa, “Gi'si' ni'na ndaka ya ku'v'azimangu'zya v'antu' v'ose, ku'nguno v'okazyaga welelo wu'kenagu'zi. Nhana nku'v'azimangu'zya v'antu' v'ose mu welelo!14Sumbwa ev'e wiv'ezezye safina ku' mbawo zya muti' gwa muvinje, u'gawu'le masenge, na u'gav'ile lami mugati' na ha ibala.15U'layi'v'ezye i'vi: Wu'lihu wayo makono igana li'mo na maku'mi adatu' na kenda, wu'gali'nhu wayo makono maku'mi av'i'li' na itano, na wi'i'ma wayo makono iku'mi na atano.16Safina yeni'yo u'yi'tu'u'li'le muzigo mu lu'v'azu lwayo. U'v'ezye twano tu'datu': kamo ka ha nsi'li'li', ka hagati' na ka ha igu'lya. U'yi'vimbe ha igu'lya, na u'lekele kapunye ka wu'lihu wa mukono hagati', kav'e hagati' ya kano na wu'vimbe.17Nhana, ndalete kamilamasenga ya minzi' ku'zimangu'zya vitundwa vyose vya myu'ye ya wu'panga. Ki'la ki'tundwa mu welelo ki'lafwe.
18“Ali'vi ev'e ku' wako ndaki'ndi'ke ilagano lyanne. Ev'e u'lingi'le mu safina haki'mo na muki' wako, v'ana v'ako na v'aki' v'av'o.19Mugati' na vitundwa vyose vya muv'i'li' vya myu'ye ya wu'panga, u'sole vya ki'gosya na vya ki'ki'ma u'viyane mu safina, ki'gele u'vipi'zye na lu'fu viv'e na wu'zuwu'ku haki'mo nanho.
20“U'latu'u'lemo nnoni, ndimu, na vitundwa vingi' vyose vya ku'yu'mba ha igu'lya na nsi', na ki'la ki'mo ku' wu'tundwa wacho, vilize ku' wako viv'i'li' viv'i'li' ki'gele u'vitu'u'le viv'e na wu'zuwu'ku.21U'kuminge ki'la ki'liwa, u'sole vyose hekeheke ku'nguno yinywe na vitundwa i'vyo u'lingi'le navyo.”22Nawe Nowa wav'ezyaga vyeni'vyo. Wav'ezyaga ki'ti' i'vyo Mulungu wamulagi'li'zyaga.

Pioneer Bible Translators

https://app.library.bible/content/a92f442307b6f8fa