Mbu'ki'47
1Haho Yosefu wayaga ku'kamuwi'la Falao ati', “V'av'a wanne na v'adu'gu' v'anne v'izaga ku'fuma ku' nsi' ya Kanaani, haki'mo na ng'ombe, nkolo, mbu'li na vintu' vyav'o vyose. Nav'o v'ali' ku' lwandi' lwa Gosheni.”2Yosefu wasangwa wav'asogolaga v'adu'gu'ye v'atano, wav'afilaga ku'mwa Falao ki'gele v'akioleche.3Falao wav'awu'zyaga, “Muli'mo gwinywe ki'?” Nav'o v'asu'v'yaga “Iswe v'akumba v'ako ku'li' v'asav'i v'a mitugo ki'ti' v'agu'ku' v'iswe i'vyo v'av'age.”4Hangi' v'amuwi'laga Falao ati', “Iswe v'akumba v'ako kwizaga kwikala mu nsi' yeni'yi' ki'ti' v'ageni, ku'nguno nzala yi'li' ndaki muno ku' nsi' ya Kanaani, na ku'du'hu' hangi' maswa ga ku'di'mi'zya mitugo ziswe. Hohene, ku'li' kwikonga iswe v'akumba v'ako u'ku'zumi'zye kwikala ku' lwandi' lwa Gosheni.”5Falao wamuwi'laga Yosefu, “So haki'mo na v'adu'gu'yo v'izaga ku' wako,6nayo nsi' yose ya Misili yi'li' ha mbele yako. Ku'nguno yeni'yo u'v'aleke v'ikale ku' lwandi' lwa Gosheni, ku'nguno lu'li' lwandi' lu'soga ku'ki'la nsi' yose ya Misili. Hangi' u'lu' u'v'amanyile v'antu' v'akowozi mugati' na v'enav'a, u'v'atu'u'le v'av'e v'i'mi'li'zi v'a mitugo zyanne.”7Haho Yosefu wamuletaga ise Yakobo mugati', wamutu'u'laga ha mbele yamwa Falao, nawe Yakobo wamudosyaga Falao.8Falao wamuwu'zyaga Yakobo ati', “U'li' na musimo gwa myaka zinga?”9Yakobo wasu'v'yaga ati', “Ni'na musimo gwa myaka igana li'mo na maku'mi adatu'. Myaka zya wikalo wanne ki'ti' muv'i'tayi'la zili' midoo na zya lu'duko, nazyo zikagelani'la wingi wa myaka zya wikalo wa v'agu'ku' v'anne.”10Haho Yakobo wamudosyaga Falao hangi', nawe wawu'kaga henanho.11Hohene Yosefu wav'apaga lwandi' lwa kwikala, ise haki'mo na v'adu'gu'ye, mu nsi' ya Misili ku' lwandi' lwa Gosheni, ku' lina li'ngi' Lamesesi, u'lo lu'soga ku'ki'la nsi' yose. Hav'aga ha wikalo wav'o, ki'ti' Falao i'vyo wayombaga.12Hangi' Yosefu wamupaga ise, v'adu'gu'ye na v'antu' v'av'o v'ose viliwa vya ku'gelani'la wingi wa v'antu' na v'ana v'av'o.13Aho lyav'i'taga itungo viliwa vyalekaga kwigela mu nsi' yose ya Misili na Kanaani. Nzala yav'aga ndaki muno na yalengaga v'antu' v'av'o ku'tuka.14Yosefu wakumingaga hela zyose zya nsi' ya Kanaani na Misili i'zyo ndi' v'agu'li'lile viliwa. Nawe wazifilaga ku' iku'lu' lyamwa Falao.15Yav'aga aho zyamalaga hela zya v'antu' v'a Misili na Kanaani, V'amisili v'ose v'izaga ku'mwa Yosefu na ku'muwi'la, “Hela ziswe zyamalaga. Ku'page ki'liwa! Ku' ki' ku'fwe ha mbele ya minso gako?”16Yosefu wasu'v'yaga ati', “U'lu' hela zinywe zyamalaga, mundetele mitugo zinywe, nanne nku'mupa ki'liwa.”17Haho v'antu' v'enav'o v'amuletelaga Yosefu mitugo zyav'o, nazyo zyav'age falasi, ng'ombe, nkolo, mbu'li na mpunda. Hohene Yosefu wav'apaga ki'liwa ku' mwaka gwenu'go.18Hangi' mwaka u'go ndi' gwalonda v'izaga na ku'muwi'la ati', “Gu'ku', yi'li' nhana hela ziswe zyose zyamalile, na mitugo ziswe zyav'aga zyako. Gi'si' ku'du'hu' ninga ki'mo i'cho ku'kowolile ku'ku'pa hamo miv'i'li' ziswe na migu'nda ziswe.19Ku' ki' ku'fwe ha mbele ya minso gako, na migu'nda ziswe ziv'ipe? U'ku'gu'le iswe haki'mo na migu'nda ziswe, ki'gele ku'pandi'ke ki'liwa. Iswe ku'ku'v'a v'asese v'amwa Falao, na migu'nda ziswe ziku'v'a zyakwe. Hangi' u'ku'pe mbiyu' zya ku'hamba, ku'du' kwize ku'fwe na nzala na migu'nda ziswe zisigale zili' wu'du'hu' ki'ntu'.”20Hohene Yosefu wamugu'li'laga Falao migu'nda zyose zya mu Misili. V'amisili v'ose v'agu'zyaga migu'nda zyav'o, ku'nguno ya nzala yav'age ndaki muno. Ku'nguno yeni'yo nsi' yose ya Misili yav'aga yamwa Falao,21nawe Yosefu wav'av'ezyaga v'antu' v'ose ku'v'a v'asese, ku'fuma lwandi' lu'mo mpaka lwandi' lu'ngi' lwa nsi' ya Misili.22Ali'vi Yosefu akagu'lile migu'nda zya v'ahozya, ku'nguno v'eni'ki'li' v'av'age v'ali'gawu'lwa lwandi' lwav'o ku'fuma ku'mwa Falao, nav'o v'av'age na viliwa vya ku'v'agelani'la ku'nguno ya wu'gawu'lwa u'wo wav'apage Falao. Yeni'yo hu' nguno ya ku'leka ku'gu'zya migu'nda zyav'o.23Yosefu wav'awi'laga v'antu' ati', “Lolagi, namugu'laga walelo inywe haki'mo na nsi' yinywe, na inywe mwav'aga nsawo yamwa Falao. Gi'si' mbiyu' i'zi mukav'i'v'e mu migu'nda.24Ali'vi ha itungo lya lyi'mbu'la u'lu' lyafika, ifungu li'mo mugati' na atano mulamupe Falao. Mafungu ane ago galasigali'le galav'e ga mbiyu' na ki'liwa chinywe, v'ana v'inywe, na migana zinywe.”25Nav'o v'ayombaga “Gu'ku' waku'pi'zyaga! Ku'nguno kwapandi'kaga wu'soga ha mbele yako, niswe ku'ku'v'a v'asese v'amwa Falao.”26Hohene Yosefu wayi'v'ezyaga yi'v'e nhama ya mu nsi' ya Misili ninga walelo, ku'v'a ifungu li'mo mugati' na atano lya lyi'mbu'la yi'li' nsawo yamwa Falao. Migu'nda zya v'ahozya du' hu' zyene zikav'ile zyamwa Falao.27Hohene V'aizilaeli v'ikalaga ku' lwandi' lwa Gosheni ku' nsi' ya Misili. Aho v'av'aga kwenu'ko, v'apandi'kaga nsawo nyingi muno, na v'iv'yalaga na kwingi'ha muno.28Yakobo wikalaga ku' nsi' ya Misili myaka iku'mi na mupungati', na musimo gwakwe wav'age na myaka igana li'mo na maku'mi ane na mupungati'.29Itungo lyakwe lya ku'fwa aho lyegelaga, Yakobo wamwitanaga mwane Yosefu na ku'muwi'la, “U'lu' nhana u'ntogilwe, tu'u'la mukono gwako mu matango ganne u'ndahi'li'le ati', u'kasye u'nzyi'ki'le henanha ha nsi' ya Misili. Nu'kwikonga wize u'mbezezye igambo lyeni'li' ku' chelu' na nhana.30Ali'vi aho ndav'e nalala na v'agu'ku' v'anne, wize u'nsole u'nsinie mu nsi' ya Misili, na u'kanzyi'kile ku' viv'i'mbi' vyav'o.” Yosefu wasu'v'yaga ati', “Ndav'ezye ki'ti' i'vyo wayombaga.”31Yakobo wamuwi'laga “Ndahi'li'le!” Yosefu wamulahi'li'laga. Haho Yakobo wakundamyaga mutwe gwakwe ku' nsagamutwe ya wu'li'li' wakwe.
Pioneer Bible Translators