Mbu'ki'2

1Hu' vyene vyeni'vyo ilunde na li'welelo haki'mo na vyose i'vyo vili'mo vyagelani'laga ku'tundwa.2Mu lu'siku' lwa mupungati' Mulungu wasangwa wamalaga mili'mo zyakwe zyose zya wu'tundi, haho wasuuhaga na akatu'mamile hangi' mili'mo i'zyo waziv'ezyage.3Haho Mulungu walu'dosyaga lu'siku' lwa mupungati' na ku'lu'v'ezya lu'sondo, ku'nguno lu'siku' lwenu'lo Mulungu wasuuhaga mili'mo zyose zya wu'tundi.4I'vi hu' vyene yi'li' mmola ya wu'tundwi wa ilunde na li'welelo. Mulungu ali'v'atu'u'la v'antu' mu mugu'nda gwa Edeni
Mu itungo i'lo Gu'ku' Mulungu watundaga ilunde na li'welelo,
5nsi' yav'age yi'kaali' ku'mezya mimelo zya mu ipolu ninga mimelo zya mu ilale ku'nguno Gu'ku' Mulungu wav'age akaali' ku'yi'leku'li'la nvula ku'tonya, na hav'age hadu'hu' muntu' wa ku'yi'li'ma nsi'.6Ali'vi kasela zyadu'li'kaga ha nsi' na minzi' gafumaga na ku'yi'tosya nsi' yose.7Haho Gu'ku' Mulungu wamutundaga muntu' ku' lu'wuwu lwa nsi', na wamupugi'laga myu'ye ya wu'panga mu nnindo, nawe muntu' wazuwu'kaga.
8Hangi' Gu'ku' Mulungu wahambaga mugu'nda musoga gwa kwiv'elela mugati' na Edeni, ku' lwandi' lwa mu ki'ya, na mwenu'mo wamutu'u'laga mwenu'yo muntu' u'yo wamutundaga.9Gu'ku' Mulungu wamezyaga miti' zya hekeheke ku'fuma ha nsi', miti' zya kwiv'elela mu minso, hangi' zigelani'lile mu ku'liwa. Muti' gwa wu'panga nago gwav'age hagati' na mugu'nda, haki'mo na muti' gwa ku'manya tu'soga na tu'v'i.
10Mwenu'mo mu mugu'nda gwa Edeni gwav'age gu'li'ho mongo u'go gwayelage minzi' na kwiti'li'zya mugu'nda gwenu'go, na ku'fumi'i'la henanho mongo gwenu'go gwigawu'laga ku'v'a myongo ine.11Lina lya mongo gwa kwandya gu'li'witanwa Pishoni, gwenu'go gu'yi'pilimile nsi' yose ya Havila u'ko ku'li' na zahabu,12nayo zahabu ya nsi' yeni'yo nsoga muno. Hangi' yi'li' na wisu'lyu' wa ku'mota u'wo wu'li'witanwa bedola, na mawe ga mupango ago gali'witanwa shohamu.13Lina lya mongo gwa wu'v'i'li' gu'li'witanwa Gihoni, u'go gu'yi'pilimile nsi' yose ya Kushi.14Lina lya mongo gwa wu'datu' gu'li'witanwa Tigili, nago gu'yelelile lwandi' lwa mu ki'ya ya kaya ya Ashulu, na lina lya mongo gwa wu'ne gu'li'witanwa Efulate.
15Hohene Gu'ku' Mulungu wamusolaga mwenu'yo muntu', na wamutu'u'laga mu mugu'nda gwa Edeni agu'li'me na ku'gwangali'la.16Ali'vi Gu'ku' Mulungu wafumyaga ilagi'li'zyo ku' muntu' mwenu'yo ati', “U'kowolile ku'lya visumo vya muti' ki'la muti' mu mugu'nda,17sumbwa visumo vya muti' gwa ku'manya tu'soga na tu'v'i ku'du' wize u'lye, ku'nguno lu'siku' u'lalye visumo vya muti' gwenu'go, nhana u'lafwe.”
18Gu'ku' Mulungu wayombaga, “Yi'kav'ile visoga muntu' mwenu'yu' ku'v'a inene. Nku'muv'ezezya mugwasya wa ku'mugelani'la.”19Gu'ku' Mulungu ndi' wasangwa watundile ndimu zyose zya mu ipolu na nnoni zyose zya mu chelela ku'fuma ku' wu'longo. Haho wamuletelaga mwenu'yo muntu' ki'gele awone aku'zipa mina ku'he, na mina ago wavipaga vitundwa vya myu'ye ya wu'panga hu' gav'aga mina gavyo.20Nawe muntu' mwenu'yo wazipaga mina ndimu zyose zya mu ipolu na zya ku'sav'a haki'mo na nnoni zyose zya mu chelela, ali'vi wav'age akaali' kwigela mugwasya wa ku'mugelani'la.
21Haho Gu'ku' Mulungu wamuletelaga mwenu'yo muntu' tu'lo tu'timbu, na aho walalaga wamusiniaga lu'v'azu lu'mo, na henanho wahakumbi'laga na nyama.22Ku' lu'v'azu lwenu'lo u'lo walu'fumyaga ku' mugosya mwenu'yo, Gu'ku' Mulungu walu'v'ezyaga muki'ma na wamuletaga ku' mugosya mwenu'yo.23Haho mugosya mwenu'yo wayombaga,
“Gi'si' mwenu'yu' ali' iguha ku'fuma ku' maguha ganne, na nyama ku'fuma ku' nyama zyanne, mwenu'yu' akwitanwa ‘Muki'ma’ ku'nguno wafumi'i'laga ku' mugosya.”
24Ku'nguno yeni'yo mugosya ali'v'aleka ise na nnina na ku'v'a haki'mo na muki' wakwe, na v'enav'a v'av'i'li' v'aku'v'a muv'i'li' gu'mo.
25Mwenu'yo mugosya na muki' wakwe v'av'age du'u'hu', ali'vi v'akawine nsoni.

Pioneer Bible Translators

https://app.library.bible/content/a92f442307b6f8fa