Kesikpɛkpɛ40
Bunùeshishi elete nɛ̀ Aboloapɔpɔɛ elete
1Kibe teli kidiɛ, Egipte ekusiɛ yɛ bunueshishi elete eshesheɛ nɛ̀ aboloapɔpɔɛ elete eshesheɛ babhɛtɛ kibui kpa nɛ balɛ apalete, Egipte ekusiɛ ishu.2Faɖawo akpɛ ɔmɔpɔɛ nɛ yɛ ɔzãkɔanɔ taabha ishu, gɛenu bunueshishi elete eshesheɛ nɛ̀ aboloapɔpɔɛ elete eshesheɛ,3kɛlɛ akpɛ balɛ buvũ nɛ banɔepopo elete eshesheɛ yɛ bɔpã mɛ, nɛ ɔɖa buvũɔ mɛ gɛ badã Yosɛf tsyɛ akpɛɛ.4Banɔepopoelete eshesheɛ alɔkɔ balɛ akpɛ Yosɛf ahɔɛ kɛlɛ eɖi balɛ abha.Gɛ bazã buvũ nɛ kibe teli kidiɛ,5banyɛ edi taabha-Egipte ekusiɛ yɛ bunueshishi elete nɛ̀ aboloapɔpɔɛ eleteɛ, gɛ bakpɛ buvũɔɔ-ɔmaimɛ kanyiaka azá bɔlala elishi tenikpo, kɛlɛ bɔlala kanyiaka nɛ̀ bɔlɛ kesi bubú.6Gɛ Yosɛf aba balɛ ɔbha kɛvɔlɔɔ, amɔsɛ balɛ ishumɛ gbã.7Kliso ebisi Faɖawo yɛ ɔzãkɔanɔnɔ gɛ akpasɛ buvũ nɛ yɛ apaleteɛ bɔpã mɛ asɛ, "Kiɖe sopɛ wɔnɔ baamɛɛ beku otumũ ana obuɔ?"8Bebuiliulũ asɛ, "Bɔlɔ taabhaa zá bɔlala, pɔɔ anɔ nanà amá gɛ ebebu balɛ esi."
Kɛlɛ, Yosɛf etseɖe balɛ asɛ, "Kesi bubuɔ pɔ gɛnɛ Owusoso Akaa ayɛ dza? Notseɖe mɛ wɔnɔ balala."9Kliso bunueshishi elete eshesheɛ etseɖe Yosɛf yɛ bɔlala. Etseɖe yɛasɛ, "nɛ mɛ bɔlala mɛɛ, ɛmɔ wain kihui nɛ mɛ otugba,10kɛlɛ bɔshɛ tɔɔta zã wain kihui nabha. Kibeɛ gɛ ata eyiɛ, eyiɛ efu, kɛlɛ yɛ efufuɔ eyù beyuyu gɛ beshe akɔ tɛpɔ̃pɔ.11Faɖawo kayintse nɔ azã mɛ ahɔɛ mɛ, kɛlɛ mɛlɔkɔ wain eyuyuɔ, ɛ́kã alɛ kpɛ Faɖawo kayintse nɔ mɛ kɛlɛ mɛlɔkɔ kayintse nɔ kpɛ yɛahɔɛ mɛ."12Yosɛf etseɖee yɛasɛ kɛlɛ kesi bubuɔ naalɛ, "Bɔshɛɛ tɔɔta enu ewui taata.13Nɛ ewui taata mɛɛ, Faɖawo ebebu wɔ kɛtakpuɔ wunɔ kabha kɛlɛ ebedzinɛ wɔ edzu wɔ ɔzãkɔ, kɛlɛ ɔbɔ lɔkɔ Faɖawo kayintse nɔ kpɛ yɛahɔɛ mɛ, asɛ kana gɛ ɔzɔbhɛtɛ baflanɔ gɛ odzi yɛ bunueshishi eleteɛ.14Pɔɔ, onu pɛ kɛkanyiaka vɛ kɛlɛ abha piapi kɔ wɔɔ, bakà mɛ tɛ ɔkasɛ mɛ ɛyamɛ gbangbã; ɖɔ mɛibui otseɖe Faɖawo tɛ ebumɛ oyinɔ nɛ ɔɖavũ ɛlɛ mɛ.15Ɔmɔsɛ tɛgagalĩ mɛ balɔkɔ mɛ ashɛnɔ nɛ Hebrianɛ kesiakpa nabha, kɛlɛ nɛ ɛkɛlɛ tsyɛ ɛgɛ bhɛtɛ kibui nanà gɛ shɔnɔ ɔsɛ tɛ bakpɛ mɛ buvũ flogo."16Gɛ aboloapɔpɔɛlete eshesheɛ amɔsɛ Yosɛf akɔ kesi bubu gbangbãa, etseɖe Yosɛf asɛ, "Mɛ tsyɛ ɛza bɔlala; Abolo bɔshɔɛ tɔɔta bazã mɛ kɛtakpu nabha.17Bɔdɔ̃pɔpɔɛ ediedi azã adãmɛ kɛshɔɛ nɔ mɛ kɔ Faɖawo, pɔɔ bɔzhɔɛ nɔ zɛŋã bɔdɔ̃ odenɔ kɛshɔɛ nɔ mɛ nɛ mɛ kɛtakpuɔ."18Yosɛf etseɖee yɛasɛ "Kɛlɛ kesi bubuɔ naalɛ, "Bɔshɔɛ tɔɔta bunu ewui taata.19Nɛ ewui taata mɛɛ Faɖawo ebebu wɔ kɛtakpuɔ wunɔ kabha kɛlɛ aba kpɛ wɔ asɔ̃ nɛ busi abha. Kɛlɛ bɔzyɔɛ nɔ batsyuĩ wɔ ishudzaa shɛnɔ."20Otsinɔ kiwui taɖamɛ kɛlɛinu Faɖawo yɛ kidzewui, kɛlɛ atɔɖɔ ketsukpu kɔ yɛ banɔgbagbla petee. Ebu bunueshishi elete eshesheɛ nɛ̀ abolopɔpɔɛ elete eshesheɛ balɛ kɛtakpu wunɔ kabha nɛ yɛ ɔzãkɔanɔ gbagbla namɛ:21Edzinɔ bunueshishi elete eshesheɛ edzu yɛ ɔzãkɔ kukuɔ, kɛlɛ aza lɔkɔ kayintse akpɛ Faɖawo yɛ ahɔɛ mɛ,22pɔɔ akpɛ aboloapɔpɔɛ elete eshesheɛ asɔ̃ asɛ kana gɛ Yosɛf aɖɔ etseɖe balɛ nɛ yɛ kesi bubuɔ mɛ.23Pɔɔ, bunueshishi elete otugbaanɔ, agɛ baka Yosɛf; adzɛkɛ yɛibui.
The Seed Company