Kesikpɛkpɛ38

Yuɖa Nɛ̀ Tama

1Nɛ Kibe ɛlɛ mɛɛ, Yuɖa ashɛ nɛ yɛadzalɛ ɔbhà kɛlɛ ezhyi avɛ adɛzã Adulam anyɛ teli gɛ bekulu asɛ Xira ɔkɔ.2Ɛkɛlɛ Yuɖa atsyanà Kana anyɛ gɛ bakɔ yɛinye asɛ Sua yɛeyi adzɛnuvɔɛ. Agbanà yɛ kɛlɛ awɔsɔ̃ nɛ yɛ;3emunù ɛya kɛlɛ amɔ̃ eyianyɛ gɛ bakɔ yɛinye asɛ Er.4Eze emunù ɛya kɛlɛ amɔ́ eyianyɛ gɛ bakɔ yɛinye asɛ Onan.5Ezamɔ̃ eyianyɛ kɛlɛ akɔ yɛinye asɛ, Shila. Nɛ Kezib yɛamɔ̃ yɛ.
6Yuɖa agbanà adzɛ akɔ Aaɖi gɛedzi yɛeyi kusiɛ, kɛlɛ yɛinye kɛlɛinu Tama.7Pɔ Yuɖa yɛeyianyɛ ekusiɛ yɛtakpumɛ gagalĩ nɛ Apaleteɛ namɛ; Kliso Apaleteɛ eyíi.
8Kɛlɛ Yuɖa etseɖe Onan asɛ, "Wɔsɔ̃ nɛ̀ wɔadza edzinì tɛ ɔwɔa yɛxɔɛ nɛ yɛishu asɛ yɛakunta ana tɛ ɔmɔ̃ eyì ɔkɔ wɔadzaa."9Pɔ Onan enyì asɛ beeyiɛ etibèdzi yɛayɛ; klisoɔ kibenyiabè gɛ awɔsɔ̃ nɛ̀ yɛadza edziniɛ, ezebu yɛɔbalɛ lu kesiakpa tɛ kɛtɛ kɔ yɛamɔ́ eyi akɔ yɛadzaa.10Kibuiɛ gɛ abhɛtɛ kinu kɛtakpumɛ gagalĩ ibui nɛ Apaleteɛ namɛ soɔ, eyíi tsyɛ.
11Kɛlɛ Yuɖa etseɖe yɛeyridze Tama asɛ, "Zã asɛ anyɛ gɛ yɛenyine tsí ana nɛ wɔaka bɔpãmɛ ɔvɛnɔ ɔsɛ mɛeyianyɛ Shela eshè." Ɔmɔsɛ eɖi asɛ, "Yɛtsɛ ebetsí asɛ yɛadzalɛ ana." Kliso Tama adɛzã yɛaka bɔpãmɛ.
12Nɛ kibe dzololo mɛɛ, Yuɖa yɛedziniɛ gɛenu Sua yɛeyiadzɛ etsí. Gɛ Yuɖa azã ɔwɔnyɔnɔ̃ mɛ ebekeɛ, ewu avɛ Timna, nɛ banyɛ gɛ baatsɛ̀ tɛkãa akɔ yɛibhoshiɛ ɔkɔ, kɛlɛ yɛɔbhia gɛ bekulu asɛ Xira pɛenu Adulameyiɛ avɛ nɛ yɛ.
13Kibeɛ gɛ betseɖe Tama asɛ, "Wɔanɔ̃ akpɛsɛ kidzoɔ mɛ aba Timna abatsɛ tɛkã akɔ yɛibhoshiɛ,"14ebu yɛɔdɔ̃ kpɛkpɛ gɛ kasɛ asɛ yɛenyine etsíɛ nɛishu, alɔkɔ kɛpɔtɛ ekumũ yɛamɛ tɛ batɛmɔ̃ asɛ yɛ kɛlɛ adɛzã kedulũɔ gɛavɛ Enayim, gɛalɛ kidzoɔ gɛilí ɔvɛ Tima shu. Pɔ gɛ Shela eshè otsialɛ tsyɛ, baka lɔkɔ yɛakɔ yɛ asɛ yɛedzinì ana.
15Gɛ Yuɖa amɔ̃ yɛɛ, eɖi asɛ kedulũ azazã elete yɛenu, ɔmɔsɛ adã bɔdɔ̃ nɛ yɛamɛ.16Gɛ egiti asɛ yɛeyiridzeɛ naalɛ, avɛ yɛɔbhà nɛ kidzoɔ shu pɛ etseɖe yɛasɛ, "Ba otsiɛ tɛ mɛ wɔsɔ̃ nɛ wɔ."
Kɛlɛ ebuiliulũ asɛ, "Kɛlɛ kiɖe wɔtsyɛ ɔbɔ kɔmɛ tɛ ɛdɛ wɔsɔ̃ nɛ̀ wɔ?"
17Aɖɔ asɛ, "Ɛba sɛsɛ wɔ epigyaeyi odenɔ mɛ baagã nɛishi."
Adzɛ ebisi yɛasɛ, "Kiɖe ɔbɔ kɔmɛ kede kɛdɔ̃ ɔdɛkpɛnɔ sɛ ɔsɛsɛ yɛ?"
18Yuɖa ebisi yɛasɛ, "Kɛklagbu tɔtɔɖɔ ibui idɔ̃ ɖuwoelu wɔpɛ ɔsɛ ɛkɔ wɔ?"
Adzɛ ebuiliulũ asɛ, "Kɔmɛ wɔ kisikpɛ nɔ gɛ wɔɛnyeɛ tsiɖi kɛlɛ abha nɛ̀ wɔ osivuvũɔ gɛɔlɛ wɔahɔɛ mɛ flogo." Kliso alɔkɔ akɔɛ kɛlɛ adɛ wɔsɔ̃ nɛ̀ yɛ, kɛlɛ emunũ ɛya akɔɛ.
19Kibeɛ gɛ adzɛ ashɛ ebekeɛ, ebu yɛ kɛpɔtɛ gɛ ekumũ nɛ yɛamɛ elú, kɛlɛ edzinɔ yɛɔdɔ̃ gɛ akpɛ nɛ yɛedziniɛ butsiɛ shuɔ akpɛ.
20Kibe ɛlɛ mɛ pɔ, Yuɖa atɛ lɔkɔ epigyaeyiɛ asɛsɛ yɛ ɔganà yɛɔbhia gɛenu Aɖulameyiɛ nabha ɔsɛ tɛ edzinì kede bɔdɔ̃ ayɛkɛ nɛ adzɛ ahɔɛ, pɔ agɛmɔ̃ yɛ.21Ebisi banyɛɛ gɛazã ɛkɛlɛ asɛ, "Fakɔ kedulũ zazã eleteɛ gɛazã kidzoɔ shu nɛ Enayimuɔ alɛ dza?"
Bebuiliulũ asɛ, "Kedulũ zazã elete bɔpã nanà agɛzã ɛkɛlɛ̀."
22Kliso etsyina avɛ Yuɖa ɔkɔ editseɖe yɛasɛ, "Ɛgɛdɛ mɔ yɛ. Lɔkɔ ɔplɛnɔɔ, banyɛ gɛazã ɛkɛlɛ aɖɔ asɛ, 'Kedulũ zazã elete bɔpã nanà agɛzã ɛkɛlɛ̀.'"
23Kɛlɛ Yuɖa aɖɔ asɛ, "Kɔ yɛalɔkɔ kɛgɛ lɛ yɛahɔɛ balɛ, onu gɛnanaa babàmɔɛ bɔlɔ. Nɛ kɛkanyiaka mɛɛ, ɛsɛsɛ yɛ epigyaeyi alɛ pɔ ɔgɛ dɔmɔ̃ yɛ."
24Nɛ bewoele taata kedeɛ, betseɖe Yuɖa asɛ, "Wɔ eyiridze Tama adɔ ɔshà nɛ kedulũ zazã kibui shu, kɛlɛ nɛ kibui ɛlɛ shu soɔ, emunù ɛya otsiɛ."
Yuɖa aɖɔ asɛ, "Nɔobu yɛ oyinɔ tɛ bɔpɔɛ yɛ tɛ etsí!"
25Nɛ kibeɛ mɛ gɛ beebu yɛ oyinɔɔ, asɛsɛ yɛanɔ̃ ɔklasɔ̃. Aɖɔ asɛ, "Imunù ɛya akɔ anyɛ gɛ yɛɔdɔ̃ nɔɔlɛ." Azaɖɔ aplɛnɔ asɛ, "Ɖi sɛ ɔbɔla bakà anunɔ gɛ yɛinye kɛlɛ itsiɖi ohui nabha nɛ̀ osivuvũ ɔlɛ abha."
26Yuɖa abakà bɔdɔ̃ kɛlɛ aɖɔ asɛ, "Adzɛ alɛ ishu bhui ɔdɛ mɛ, ɔmɔsɛ ɛgɛ lɔkɔ yɛ kɔ mɛeyianyɛ Shela." Kɛlɛ aga wɔsɔ̃ nɛ̀ yɛ.
27Gɛ kibeɛ na ɔsɛ tɛ amɔ̃ eyiɛɛ, taabhà eyianyɛ balɛ azã yɛ kamɔmɔ̃vũɔ mɛ.28Gɛ aamɔ̃ beyiɛɛ, tenikpo nɔ akpɛ yɛɔhɔɛ asɛsɛ; kliso bɔmɔ̃asɔsɔlɛ eleteɛ alɔkɔ keputakpã dzadzã anyã yɛ kahɔkpɔ nulũ pɛ aɖɔ asɛ, "Yɛalɛ yɛeputɔ aba."29Pɔ gɛ edzinɔ yɛɔhɔɛ avɛnɔ, yɛadzya ekoeyì kɛlɛ adzɛ aɖɔ asɛ, "Kliso kana wɔ opú okoeyi." Kɛlɛ bakɔ yɛinye asɛ Pɛrɛz.30Kɛlɛ yɛadza gɛ keputakpã dzadzã azã yɛahɔkpɔ nulũɔ ekoeyì kɛlɛ bakɔ yɛinye asɛ Zɛra.

The Seed Company

https://app.library.bible/content/8106f4bd10cb55b6