Aefeso5
1Anyiimwe ni wana a Mnungu yawo wakundani kupunda, chimwecho mjhitahidi kukhala ngati iye.2Mkhale kwa chikondi, ngati umo Kilisito wadatikondela, wadajhichocha ndande ya ife kukhala njhembe iyo inunghila yakumkwadilicha Mnungu.3Anyiimwe ni wandhu a Mnungu, chimwecho chighololo, ukhalo waliyojhe woipa kapina chipili, sividakhala pakati panu, pakuti anyiimwe ni wandhu a Mnungu.4Chimwecho, siyadakhalapo mawu ya njhoni, mawu ya mtafu kapina ya vibwana, yonjheyo siyafunika, icho chifunika ni kumuyamika Mnungu.5Mjhiwe kuti wachigololo waliyonjhe, kapina mkazuzu kapina wokhumbila, mundhu ngati mmeneyo siwapata chilinjhonjhe muufumu wa Kilisito ni Mnungu. Mundhu wakhumbilo walambila chiboliboli.6Siwadakunyengani mundhu kwa mawu yopande mate, ndande ya vindhu ngati vimenevo, mbhwai ya Mnungu yajhela onjhe yao samvela,7chimwecho, simudagwilizana ni wandhu yao achita vindhu vimenevo.8Kale anyiimwe mdali mumdima simmamjhiwe Mnungu, nambho chipano muli mudangalila, mumjhiwa Mnungu kwa kulunjana ni Ambuye Yesu. Mkhale umo wafunila Mnungu,9pakuti yayo yachokela mdangalila ni ubwino, uzene ni kukhala kwa kuvomelezeka ni Mnungu.10Namwe yafunefuneni yayo yakhadwilicha Ambuye.11Simudagwilizana kuchita vichito ivo sivifunika va mumdima, nambho yaikeni pandhandala dala wandhu ayajhiwe.12Vindhu ivo avichita kwa chisisi vilengecha njhoni ata kuvichula.13Nambho chilichonjhe icho chavumbula ni dangalila, sichioneke,14ndande chilichonjhe icho chavumbulidwa, chikhala dangalila. Nde ndande yalembedwa Mumalembo ya Mnungu, “Uka iwe waghona, uhyuke, Kilisito siwakuwalichile dangalila lake.”15Ndiipo mjhijhipenyelela umo mukhalila. Simudakhala ngati asabobwa, nambho mkhale wandhu a hekima.16Muitumile bwino dhawi iyo mulinayo, ndande masiku yaya ni yoipa.17Chimwecho, simudakhala asabobwa, nambho muyajhiwe yayo ayafuna Ambuye.18Msiye kulojhela mowa, imeneyo siikutaizeni, nambho mchoghozedwe ni Mzimu wa Mnungu.19Mjhiimbilana kwa mawu ya zabuli, nyimbo za matamando ni nyimbo zina za Mzimu wa Mnungu, muimbileni ni kumtamanda Mnungu kwa mitima yanu yonjhe.20Muyamikeni Mnungu Atate masiku yonjhe kwa vindhu vonjhe, kwa kupitila Ambuye wathu Yesu Kilisito.21Kila mmojhi wajhichiche kwa mnjake kwa ulemu uwo muli nawo kwa Kilisito.22Anyiimwe wachikazi mjhavela achamunanu ngati kwa vela Ambuye Yesu.23Mate yake wammuna nayo wali ni ulamuli kwa mkazake, ngati umo Kilisito wali ni ulamuli kwa gulu la wandhu amkulupilila Kilisito, ndande Kilisito mwene wake nde waliombola gulu limenelo ni nde thupi lake.24Ngati umo gulu la wandhu amkhulupilila Kilisito limvelela iye, chimchijha wachikazi ajhavela achamunao kwa vindhu vonjhe.25Anyiimwe wachimuna, mjhakonda achakazanu ngati Kilisito umo wadalikondela gulu lake, wadajhichocha njhembe ndande yawo,26dala kwa mawu lake, walipatule kwa Mnungu kwa kulichuka mumajhi,27dala wapate gulu la wandhu amkhulupilila, ilo la sanghidwa ndande ya Mnungu ni labwino, gulu ilo lilibe machimo, kupunduka kapina chilichonjhe cha mtundu umeneo.28Chimwecho wachimuna afunika kwakonda achakazao ngati matupi yawo. Uyo wamkonda mkazake mmeneyo wajhikonda mwene.29Palibe mundhu uyo waliipila thupi lake, nambho walidyecha ni kuliveka. Nde umo Kilisito walisungila gulu lake,30pakuti ife ni viwalo va thupi lake.31“Chimwecho, wammuna siwaasiye atate wake ni amaye wake, siwalunjane ni mkazake nao awili sakhale thupi limojhi.”32Kuli ni uzene uwo wabisika pa mawu yaya, ila ine nakamba nghani ya Kilisito ni gulu ilo la mkhulupilila.33Nambho kila wammuna ifunika wamkonde mkazake ngati mwene wake ni wamkazi wafunika kumsamala mmunake.
The Word for the World International