2 Corinthians10
1Ine Paulo uyo nioneka kuti mpole nikakhala pamojhi namwe, nambho nikalipa yapo nikhala patali namwe. Nambho ine nikupembhani kupunda kwa kujhichicha ni kwa ubwino wa Kilisito.2Nikupembhani simudanichiticha nikhale okalipa yapo sinijhe, ndande nikhoza kukhala okalipa kwa onjhe yao atiganizila kuti tikhala ngati wandhu ajhiko.3Ingakhale tikhala pajhiko la panjhi nambho sitibulana nghondo ngati wandhu ajhiko panjhi umo abulana,4pakuti vida va nghondo yathu asati za jhiko, nambho ni mbhavu ya Mnungu iyo iwananga maphupa yonjhe yolimba, tiwananga mayaluzo yonjhe ya mthila,5tibomola kila chichekelezo chadama icho chichekeleza wandhu kumjhiwa Mnungu, nitiyateka maganizo yao yonjhe yopanduka nikwayaluza dala amjhiwe Mnungu.6Mkathokhala okwanila pa kuvomela, tili tayali kulanga kila mundhu uyo siwavomela.7Vipenyeni vindhu ivo mviona kwa maso yanu. Bwanji, walipo waliyonjhe uyo waganiza kuti iye mundhu wa Kilisito? Ndiipo chimchijha watione ife ngati wandhu a Kilisito.8Ata ngati nikajhidama kwa ukulu uwo watipacha Mnungu, kukoza kumanga asati kubomola, chimenecho ine siniona njhoni ata pang'ono.9Sinifuna mganize kuti nifuna nikuopecheni kwa kalata zanga.10Mundhu wakhoza kukamba, “Kalata za Paulo zokalipa ni zolimba, nambho yapo wakhala pamojhi niife ni mundhu ogooka, ni ata yapo wakamba mawu yake ngati yalibe mate!”11Mundhu uyo wakamba chimwecho wajhiwe kuti, palibe kulekana kwa yajha tiyalemba mkalata yapo tikhala patali, ni yajha tiyachita yapo tikhala namwe.12Sitifuna kujhiika kapina kujhilinganicha ni anyiyao ajhielekela achinawene. Nambho yapo ajhipima achinawene kwa achinawene, ni kujhilinganicha achinawene kwa achinawene aoneka asabobwa.13Nambho sitijhidama kupitilila, dama lathu silikhale pachipimo cha njhito iyo watipacha Mnungu, njhito iyo ndeiyo tiichita kwanu.14Sitidajhidama kupitilila ngati sitidajhepo kwanu. Ata chimwecho ife nde tidachogolela kujha kwanu kukupelekelani Uthenga Wabwino ya Kilisito.15Chimwecho ife sitipitilila kujhidamila njhito iyo adaichita wina, tikhulupilila kuti chikhulupi chanu sichiendekele kukula kwa unyinji. Ni njhito yathu kwanu ikhala yaikulu kwa kuchata umo wafunila Mnungu.16Pamenepo tikhoza kulalikila Uthenga Wabwino mjhiko lina, patali namwe, yapo tifuna kujhidamila njhito izo azichita wandhu wina pamalo pina.17Nambho ngati umo yalembedwa mumalembo ya Mmnungu, “Mundhu wafuna kujhidama wajhidamile njhito ya Ambuye.”18Uyo wavomelezedwa asati yujha wajhielekela mwene, nambho uyo waelekeledwa ni Ambuye nde uyo wavomelezedwa.
The Word for the World International