1 Akolinso1
1Ine Poolo, uyonatanidwa ni Mnungu kukhala mtumwi wa Kilisito Yesu ngati Mnungu wafunila, nili pano ni mbale Sositene.2Kwa gulu la wandhu amkhulupilila Yesu ilo lali ku Kolinso, anyiimwe mwachitidwa kukhala wandhu a Mnungu, ndande mwalunjana ni Kilisito Yesu, mudatanidwa kukhala wandhu a Mnungu pamojhi ni onjhe kila pamalo paliponjhe waapembha Ambuye wathu Yesu Kilisito, Mbuye wao, ni Mbuye wathu.3Nikupembhelani Ubwino ni mtendele kuchoka kwa Mnungu Tate wathu ni Mbuye wathu Yesu Kilisito.4Niayamika Amnungu wanga siku zonjhe ndande ya Ubwino uwo akupachani kupitila Yesu Kilisito.5Pa kulunjana ni Kilisito mwakhala ni mwayi kwa kila kandhu, yaani pakukamba konjhe ni njelu.6Uthenga wa Kilisito uwo mudakambidwa ni wauzene,7chimwecho simulepela kulandila mbhaso yaliyonjhe, yapo mulindilila kujha kwa Ambuye wathu Yesu Kilisito.8Iye siwaendekele kupachani mbhavu pa kumtumikila Mnungu, ni palibe uyo siwakupacheni mlandu mbaka siku lothela yapo Mbuye wathu Yesu yapo siwabwele.9Mnungu ni okhulupilika, Mnungu adakusanghani anyiimwe mkhale ni umoyo pamojhi ni mwana wake Yesu Kilisito, Mbuye wathu.10Kwa ulamulilo wa Ambuye wathu Yesu Kilisito nikupembhani kupunda, achabale wanga, mvanichane kwa kila chindhu icho mukamba, sikudakhala ni kupatukana pakati panu, mukhale ni maganizo yamojhi ni dala imojhi.11Ndande wandhu wina kuchokela mnyumba ya Kiloe, anikambila, kuti yao mwamkhulupilila Yesu palibe mvano pakati panu.12Nikamba chimwechi, “Kila mmojhi pakati panu wakamba chake, mmojhi wakamba, ‘Ine nimchata Poolo,’ mwina, ‘Ine nimchata Apolo,’ mwina, ‘Ine nimchata Petulo,’ ni mwina, ‘Ine nimchata Kilisito.’”13Bwanji, Kilisito wadajhipatula magulumagulu? Bwanji, Poolo nde uyo wadapachikidwa pa mtanda ndande yanu? Bwanji mudabatizidwa ngati oyaluzidwa a Poolo?14Naayamika Amnungu pakuti sinidambatize waliyonjhe pakati panu, nambho Kilisipo ni Gayo pe.15Chimwecho palibe uyo wakhoza kukambi wabatizidwa kuti wakhale oyaluzidwa wanga.16Nakumbukila, nidambatiza Sitefano ni wandhu amnyumba mwake, nambho sinikumbukila ngati nidambatiza mundhu mwina waliyonjhe.17Kilisito siwadanitume kubatiza. Wanituma kulalikila Uthenga Wabwino, nilalikile popande kukhulupilila mawu ya hekima za wandhu, dala mbhavu ya nyifa ya Kilisito pamtanda siidaoneka yopandemate.18Nghani ya nyifa ya Kilisito pamtanda ni chindhu chopande mate kwa anyiyawo asowa, nambho kwaife taomboledwa iyi ni mbhavu ya Mnungu.19Pakuti Malembo ya Mnungu yakamba chimwechi, “Siniziwanange hekima za anyiyawo ali ni hekima, ni njelu zawo anyiyawo asoma siwazichite kuti zilibemate.”20Chimwecho walikuti uyo wali ni hekima? Walikuti oyaluza thauko? Walikuti wakhoza kuchuchana pa jhiko lino? Mnungu wailangiza hekima ya jhiko lino kukhala yopande mate.21Mnungu ni wa hekima, wandhu sakhoza kumjhiwa Mnungu kwa kukhulupilila hekima yao achinawene. Chimwecho Mnungu wadautumila uthenga wa Yesu Kilisito uwo uoneka kuti ulibe mate, nambho anyiwajha aukhulupilila uthenga umenewo aomboledwa.22Ayahudi afuna vizindikilo dala akhulupilile, ni Agiliki afuna hekima.23Nambho ife timlalikila Kilisito uyo wadapachikidwa, kwa Ayahudi chindhu ichi ni choipicha, ni kwa Agiliki chopande mate.24Nambho kwa anyiyawo atanidwa ni Mnungu Ayahudi kwa Agiliki, Kilisito uyu wadapachikidwa ni mbhavu ya Mnungu ni hekima ya Mnungu.25Pakuti icho chioneka kuti usabwabwa wa Mnungu, ni hekima yopitilila hekima ya mundhu, ni kufooka kwa Mnungu, ni mbhavu kupitilila mbhavu ya mundhu.26Chipano okhulupila Yesu anjanga mganizile nghani iyi kuti Mnungu wadakutanani ili mukhale wake. Kwa maganizo ya wandhu mdaoneka kuti ambili wanu mulibe hekima wandhu ambili adalibe mbhavu kapina wandhu acheo chachikulu.27Nambho Mnungu wadasangha yao oneka usabwabwa kwa jhiko, dala wavipache mwano yavo vili ni hekima, Mnungu wadasangha ofooka a jhiko dala walengeche mwano yawo ali ni mbhavu.28Mnungu wadasangha wandhu ofooka a jhiko lino ni yawo adeleledwa, dala walengeche mwano wandhu yawo ali ni mbhavu.29Ichi mateyake wali ni thupi waliyonjhe siwadajhi elekela pachogolo pa Mnungu.30Nambho Mnungu wakulunjani ni Kilisito Yesu, ni Mnungu wamchita Kilisito wakhale hekima yathu. Kwa kupitila Yesu tali ovomelezeka, ni tikhala wandhu Mnungu ni anyiyao taomboledwa.31Chimwecho ngati umo yakambila malembo ya Mnungu, “Iye wajhi elekela wajhielekele mwa Mbuye.”
The Word for the World International