Sam82ntu_wbt
Gct Pipxle Kx Kxnzetung Nzvz-rbrng
Nabz ne Asaf.
1Gct wxbuom me matq nyzde,Murde napipxle kx kxnzetung nzvz-rbrng.2Rpibzle badr kx, “Nzaclve-krmu leplz narsakrlrngr.A' bzkq okatramu kxdrka'-ngrng nzmyaszpx-krdr kxnztubqng.3Murde mz nzwz-krmu natubzmu mz nibr kx trpnzngr scdr da x doa kxnzbzszng,X naokatramu kxnzkxpung x kxtrnzxplrung.4Murde na-arlapxbzmu krkcng trpnzngr scdr zmatqMz mq kxdrka'-ngrng.5Ngqngu-plxsramu x trpnzngr da kx krlzamu, murde nqmq krmung amrlx trka-zlwzng.X trpnzngr da kx opxm mzli ka mz nrlc.6Nimu kxnzetung murde kapebo bamu zmatq ngr nzrmailz-krmu.X nimu amrlx apuamu mrlxng Gct kc tqmyalz-esz'ngr.7Kxmule-esz', a' mrbrtr mz drtwrmuKx zmatq kc tqwz-xgleamu nzkrlz nzrkatxpx-ngrbz,Da kc tzwai nzrkatxpxpe-ngrbz zmatq mz kzdung kxnzetung.X nabz-kzamu da kc tzwai leplz amrlx mz nzbz-krdr.”8Gct, vzm mz nzaclve-krm leplz mz nrlc tulvzo,Murde lr drtc' amrlx nzmnclzbzng mz zmatq ngrm.