Sam72ntu_wbt

Nzaclvekr King Kxnzmcpx

Nabz ne Solomon.

Nztubq-krde

1Gct, batrpz nzaxvctr-krbz king rgr mz zmrlz ngrm,X okatrpz nide mz nzvz-nqblq-krde nztubq-krm.2Murde nzaclve-krde nigr leplz nemqng namrlz,X na-atubqtibzle da mz kxnzobqszong.3X nigr amrlx sa namnc-zpwxkr,Mz nzmnclz-krbzkr mz nztubqkr nzaclvekr king rgr.4Sa natubz mz nibr kxnzobqszong,X sa na-arlapxle kx trpnzngr scdr zmatq mz nzaovxio-krde kxnzakxputilr nidr.

Nzamrlz-krde Leplz Nedeng

5Nzamrluekr leplz nim sa navz zvz,Da kc tqwai nzyzlr-zvzkr nepi x temz.6X King nem sa na-amrlzle nigr leplz nedeng,Mz nzapu-krde tewa kc tqdcom mz nrlanc.7Mzli kc tqngini-ngrde king nztubqngr naetunepx mz nrlc,X nzmnc-zpwxkr leplz navz zvz da kc tqwai nzyzlr-zvzkr temz.

Mrkc Tqaclve

8Nzaclve-krde yzutrle mz Lue Yufretis,Nakrlzbzle mz nrlc tulvzo.9Enqmi rdeng sa na-aovxioleng,X nayrngzobzng bade.10King mz nrlc tulvzo sa nartwzmqng bade dalr nzrle-kangr,Myapxbz king r trmctung, x Arabia, x Afrika, murde namnc-lxblrng badr mz nrwx.11King amrlx sa nayrngzobzng bade,X leplz amrlx sa na-angiolr nide.

Nivz Lrde

12King lc sa natubz mz nibr kx trpnzngr scdr da, mz nzkqle-krdr nide.X naokatrle kxnzobqszong kcng tzmncng esz'-krdr.13Sa naycngr drtwrde kxtrnzxplrung x kx trpnzngr scdr zmatq.X na-arlapxle nra-nzlung ngr leplz.14Sa naxpepxle nidr mz mq kxnzakxputing x kxnzatrkatilr nidr,Murde matq mz drtwrde nzlu-krdr.

Da Kxmrlzting Kx Navzpxmqng Mz Nzaclve-krde

15Leplz amrlx sa nakrka'-ngrdr nideMurde Gct na-amrlz-zvzle nide,Mz nzrpi-krdr kx, “Gct, king lc nalu angidr zvz.X lr Arabia narkabzng gol kxpnapr bade.”16Krka'-ngrgr kx nrlanc nyzgrng nalvc-angidrngr dakxnzng.X nounc nyzgrng nadobeting na-apule nounc ngr drtc' kc Lebanon.X taon nyzgrng nayrbu mz leplzNa-apule nzyrukr nabr ngr nardzng.17King lc nadcpx zvz mz drtwr.X drtqde nayc zvz mz nzapu-krde nzti-zvzkr nepi.Murde sa nanginide nou nzamrlzkr Gct leplz amrlx mz nrlc,Mz nzkrlz-krdr kx matq-esz'ngr mz nzobqkr Gct.

Nabz Kx Yrkrpxngr Buk Krali

18Naglqlzku Yawe, Gct r melrmqgung.Nide txpwz kxnzkctipx. Naglqlzku Yawe.19Navz navz zvz nzangiongr drtqde.Nzrglqlzngr nide navz navz zvz.20Krlc me yrkrpxngr nabz x nzkrka'-ngrng kx yr King Devet, mrlx Jesi.
expand_more
Search