Kxdrka'-ngrng Nzapulr Ningidoe Kcng Tzrmakxng Nabz ne Devet kx yrbzle mz kxrmailz ngr dzbe kxnzngrng.
Kxnzetung Kxdrka'-ngrng 1 ?Kxnzetung, myx kxmule, nzaclve-krmu tubq, X rsakrlrngr angidr? 2 Trtingr! Murde yrlqamu drtwr kx atrkatile leplz nemung, Mz nzaetq-krbzmu drtqdr mz nrlc ka. 3 Nimu kxdrka'-ngrng. X ale-zvzamu da kxtrka, Yzuo pnz mzli kc tzmcngr mzpu. 4 Apuamu ningidoe kcng tzrmakxng Mz nzatrkati-krmu leplz. 5 X apu-kzamu kxnradrtqdr ngq murde pxtxpx-zvz-ngrnamu nzxlr-krmu nzyrni-krdr, X nzayzlu-krbzmu natqdr. Nzayrplapxkr Gct Kxdrka'-ngrng 6 Yawe, ayrplapx leplz lcng tzapulr ningidoe, mz nzyrvilz-krme nipna scdr. X mz nzapu-krdr poi kz peto, taglctr-kzpz nqngidr. 7 Mrlzvxitx nzbatr-krbzme nzmyakr nipna scdr, X nzmrbr-krdr na-apule lue kc tqmrbrlqo mz drtc'. 8 X mrlzvxi kz nzapu-krdr zwqwq r wagq kc tqlrprnebz mq mz nzngrla-krde x mz nibrde sc tqmrbrpe mou mz nztiokr nepi le. X na-apu-kzlr itoto kx bz murde nzmika mzli kc tqpoobe-ngrde. 9 Gct, mzli kc tzlube-ngrdr, apusrngr nidr nabr kc tzikzti, Mz nzodati-krm nidr mz zngya ngr drtwrm. Nzabrtzkr Leplz Neng Gct 10 Zbz nigr kxnztubq nemqng sa na-abrtz-zlwz-ngrgr nznibqti-krm kxdrka'ngr lcng. X sa naelalvzkr nzyrlekr mepyr ngrdr. 11 X sa napibzkr bam kx, “Gct, da zpwxtx! Sa nakabzme da kxmrlzting mz leplz kxnztubqng, Murde nzaclve-krm lr nrlc tubq-esz'ngr.”