Sam50ntu_wbt

Blz Angidr Nangi Nzawi-ngrbz Mz Gct

Nabz ne Asaf.

Nzyrlwrkr Leplz Neng Yawe

1Yawe, nide Gct kc tqxplr esz'ngr.X zluli rde pnamilxtile mzteadau Jerusalem kc tqlqngi.A' nrlc ycngrlrlzm mz nzvz-krmle,Murde nyr wounepx kai mz nzangc-krde da amrlx,X nounenq o-ngalelvzle nide.X kqlele lr Heven mz nzayrlwr-lxblr-krdr leplz amrlx mz nrlc.4Navzmqng mz nzmc-krdr nztubqkr natqde,Mz nzpipx-krde nzvz-rbrkr leplz nedeng.5X rpibzle mz lr Heven kx, “Vzmimamu krkcng tzlxngitilr ninge,X drtwrgr badr tqesz'ti mz nzangc-krmlr bange blz krdr, murde nayrlwr-ngalelvzlr ninge.”6X lr Heven nzrpilr kx, “Gct, nzaclve-krm rsakrlrngr.Murde tubqq mz nzryrlq-krm drtwr.”

Gct Atubqtile Leplz Nedeng

7Rpi Gct kx, “Leplz nengeng, xlrmamu natqnge.Murde ninge Gct rmu x na-aelwa-ngrbo mrkc tqvz-rbrtiamu.8Animol kc tqngi blz tqkamamu bange, trngiu da kx myapxbz,Mz nzangco-zvz-krmamuleng mz olta.9X trngi-kzu da kx myapxbz nzangc-krmamu bangeGout x kzu kxncblongr dalr nardzng nyzmu.10Murde dalr peto amrlx nyzngeng,X wai-kzle kzu amrlx kcng tzmncng mz siu r newz.11Utc ngr peto amrlx nengeng,Nidr badr animol ngr nardzng.12Nzmu nabrtalex x drtwrnge brlxkz tr-rlxpwc'u bamu da.Murde nrlc nyznge x dalrdeng amrlx.13X trmuwxu ncvr kzu.X tr-rmnqwxu mepyr ngr gout.14A' blz angidr nangi nzawi-krmamu bange,X nzangidati-krmu da kx esalz-ngrmamu bange.15X mrlz nzkrka'-krmamu bange mzli kc tqkxpu-ngrnamu,Murde naglqlzamu ninge kalr mz nzarlapx-krnge nimu.”

Alwx Ngr Kxdrka'-ngrng

16A' rpibz Gct mz leplz kxdrka'-ngrng kx, “Trtakitrdeu nzyapwxti-zvz-krmu Loukxtr scnge,Mz nzycmnetr-krmu Nzryrngrkxtrng.17Murde pxtxpx-ngrnamu nzatubqti-krnge nimu,X rtctx-ngrnamu natqnge.18Alwx ngrmung nidr seleng:Mrlzbz bamu nzngi-kzte-krmu ncblo kx pna da,X nzprtr-ngrbz mz leplz kcng tzrmwimi-abeaneng leplz kx trngiu krnalzdr.19Ycmnetrpwzmu mz da kxtrka,X naomu tresakiu nzrpi-twzti-krdr da kx nzesabrtingr.20Pikiti-zvzamu kztemung,X pibqti-kzamu mzlemung.21Mz nzale-krmu da lcng sc tqmnc-lrpinebo.X rpiamu mz drtwrmu, mrlzm bange nzale-krmuleng.A' trtingr! Murde da kcng tqvz-rbrtiamu delcng tqaplxtipx-atebo bamu.

Yawe Sa Na-ayrplapxle Leplz Kalr

22“Mzli ka natekqtramu nqmq krmu,Murde ma tqodatitxne nimuX sc trpengr kx na-arlapxle nimu.X bzkq mrbrtr mz drtwrmu nzamatq-krmu ninge.23Blz angidr nangi nzawi-krmamu bange.Murde narmctiamu nzarlapx-krnge nimu, mz nzvz-nqblq-krmu ninge.”
expand_more
Search