Nɔɔneŋ94
Wurubuarɛ nombiadiira pou nyee
1Degbeŋgyoo yɛna Wurubuarɛ ŋon ɔ ne tɔ kom,Ao Wurubuarɛ ŋon n ne tɔ kom, lese n wose wola.2Tɛɛle kei nombiadiiri, koro seŋ,tɔ baŋ bee gyina ba wose nɛ kom ŋgba mena keŋ kaboena wɔ nɛ.3Kelii woromɔ Degbeŋgyoo,Kelii woromɔ te akpanyanyaŋtena baa nyaŋee?4Bee kolosi agaŋtaŋ man,nombiakumɛɛ yɛɛra ne kolosi gyɔ konɔɔ.5Degbeŋgyoo, bɛɛ yɛlɛɛ n balaŋ,bɛɛ ŋere n dedii do.6Bɛɛ kɛrɛɛ liala na ŋɔɔla nyeeya,bɛɛ koe yoyolobia.7Bɛɛ yako nyiaa, <Degbeŋgyoo bɛɛ naa ya,Yakɔbe Wurubuarɛ ŋon bɛɛ gyene ya.>8Ɛ gyene, ɛmɛɛ baŋ ɛ ba gyeŋ daale ya balaŋ baŋ man,ɛmɛɛ ayiŋtena, woromɔ yaa ɛ sia gyae kekara?9Ŋon ɔ be yɛɛ deŋele nɛ, ɔ bee nyii yee?Ŋon ɔ be yɛɛ sibii nɛ, ɔ bɛɛ naa yee?10Ŋon ɔ ne wɔŋ tɛɛlese deŋele nɛ, ɔ be wɔŋ ɛ deŋele yee?Ŋon ɔ na wola denibalaŋ nombia nɛ, ɔ be dana nyeempɔ yee?11Degbeŋgyoo gyeŋ denibalaŋ nyeempɔse pou,ɔ gyeŋ nyi ŋe yɛɛ yakaa.12Degbeŋgyoo, walaŋ ŋon n ne kalena e,te n na wola e lee nyaŋ mmaraase man nɛ, ŋonna nyeebam.13N ne yele bee nyiŋ ba wose lee ba wose kekyaŋ man,kelii debaŋ keŋ baa wula bɔɔ fa akpanyanyaŋtena.14Nawolo nyi Degbeŋgyoo be gyae waa bɛɛ ɔ balaŋ ya,ɔ be gyae waa bɛɛ ɔ dedii ya.15Baa di nombia kegbɛɛ dɔɔ fa baŋ ba tenɛɛ nɛ,te baŋ be konɔɔse man dei nɛ baa sila ke.16Amɔte ne gyaela waa seŋ tia akpanyanyaŋtena dɔɔ fa maŋ?Amɔte ne gyaela waa seŋ tia nombiakumɛɛ yɛɛra dɔɔ fa maŋ?17Na Degbeŋgyoo kyɔɔna maŋ ya nɛ,nafɔ nnɛ me ta yem me doo woyadɛɛ.18Akpaa me yako nyi, <Me nawɔɔ ne sarakee nɛ,>nyaŋ Degbeŋgyoo, n kegyae keŋ taŋ ɔto ya nɛ, ne kyaŋana maŋ seŋ keŋkeŋ.19Nyi nombia de takaa maŋ me konɔɔ man nɛ,n kekolosido ne yele me wɔe ne fɛɛ maŋ.20Gyoorogbeli keŋ bee di anokoare ya,gyoorogbeli keŋ ɔ dana kawolase kumɛɛ nɛ, waa tale mo ɔ wose dona neŋ?21Akpanyanyaŋtena ne yɛɛ nɔɔ tia baŋ ba tenɛɛ nɛ,bu baŋ be nombia dei nɛ fɔɔ nyi baa ko wɔ.22Mɔna Degbeŋgyoo yɛna me gyeere,te me Wurubuarɛ yɛna kpanaŋ keŋ mee yeu kagyoo.23Waa tɔ wɔ be nombiakumɛɛ keyɛɛ kom,na waa wɔlɛɛ wɔ lee ba akpanyanyaŋ keyɛɛ dɔɔ,Degbeŋgyoo de Wurubuarɛ waa wɔlɛɛ wɔ.The Seed Company