Nɔɔneŋ73
Wurubuarɛ nombia kedi kegbɛɛ dɔɔ73:1 Asafe nɔɔneŋ
1Ampaŋ, Degbeŋgyoo dei fa Iserae,na baŋ be konɔɔse man dei nɛ.2Mɔna maŋ dɔɔ, kaa kyomii na maa sarakee.kaa kyomii na maa gyɔ me nae.3Nawolo nyi me yoo agaŋtaŋtena nuŋkurili,debaŋ keŋ mɔɔ naa mena keŋ abɔɔ ne dee fa akpanyanyaŋtena nɛ.4Bɔɔ ne nyii weeleŋ ya,be dana wosedoŋ te be dana doŋ.5Ba wose bɛɛ kyaŋ wɔ ŋgba balaŋ akaŋ baŋ ya,kayeyɛɛ bɛɛ kɔŋ be dɔɔ ŋgba deniwalaŋ kawee ya.6Mena dɔɔ wose kegyina yɛna ba agbaraagbaraa,nyeeman doŋ yɛna kegba keŋ bɛɛ doo.7Nombiakumɛɛ te wulu be konɔɔse mante ba nyeempɔkum be dana ɔto ya.8Bee kulu balaŋ, na bee kolosi nombiakumɛɛ,bɛɛ mo ba agaŋtaŋ do baŋ bɔɔ ŋere do nɛ gyakoloŋ.9Bee kolosi nombiakumɛɛ tia adido,te be laakemse ne diina doŋ tɛɛle keŋ dɔɔ.10Mena dɔɔ be balaŋ ne nyii wɔ,te bɔɔ ne naa dukum be man ya.11Bɛɛ yako nyiaa, <<Sena yaa Wurubuarɛ waa yɛɛ gyeŋ?Adidote ŋon gyeŋ nombia?>>12Kɛɛ, nnɛ te akpanyanyaŋtena doo,bɔɔ ne naase ba wose diyem ya, mɔna be gyakaa bee nyiŋ dedii kpu.13Ampaŋ ke yɛɛ yakaa te me yɛɛ n kegyaebii,te me faafo me nyiŋmaase deŋele kedi man.14Wee kamasɛ mɛɛ naa diyem,te bɛɛ wɔŋ ma deŋele nebo kamasɛ.15Nyi meŋ yakowɔ mena nɛ,nafɔ meŋ lese n bia fa.16Ma ke yɛɛ kakyeŋ maa nyii kɛŋa pou man nɛ,ke kaa takaa maŋ nideli.17kelii debaŋ keŋ mɔɔ gyoo Wurubuarɛ man,pɛte me naa botɔɔ keŋ ba mo wɔ kelii.18Ampaŋ n moo wɔ see botɔɔ keŋ ne sarakee,n yela be yalawɔ gyoo kewɔlɛɛ man.19Be wɔlɛɛwɔ karatetee dokoloŋ,gyakoloŋ te kuu wɔ pou laŋ.20Be yɛɛ ŋgba ŋolo foŋala lee dosɛɛ man nɛ.Degbeŋgyoo, akpaa n koro nɛ,nyaŋ ke yɛɛ wɔ ŋgba be foŋae lee dosɛɛ man nɛ.21Debaŋ keŋ mee nyii weeleŋ me konɔɔ man,te ma woo ne nyii weeleŋ nɛ,22ma bese diyiŋte ŋon mɔɔ gyeŋ daale ya,me yɛɛ ŋgba wonembu nɛ n siaman.23Mɔna me kyaa n gyaŋ debaŋ kamasɛ,n dana maŋ me dunoluŋ nyiŋmaa man.24N moo n kagyeŋ wola maŋ nombia,kenaŋ wɔle na nyaŋ ke lɛɛ maŋ gyu n gyoorobiiri keŋ man.25Nyaŋ wɔle na, amɔte yaa me dana adido?Te mɔɔ ne gyae ŋolo tɛɛle kei dɔɔ kpuna neŋ ya.26Ma wosenaane na me konɔɔ gyae ke tale yɔkɔse,mɔna Wurubuarɛ na doona me konɔɔ doŋ,me yɛɛ ɔ wui kekpaakekpaa.27Baŋ bɔɔ wɔŋ ba wose lee n gyaŋ gyu lem nɛ baa munu,nyaŋ ke wɔlɛɛ baŋ pou bɔɔ ne di anokoare fa neŋ ya nɛ.28Mɔna maŋ dɔɔ, dei nyi maa benaa Wurubuarɛ.Degbeŋgyoo Doŋ Pou Nyee te mee yeu kagyoo,na maa gyɔ ŋan pou n ne yɛɛ nɛ dekpeŋkpeŋ.The Seed Company